మీ నిద్రలో ఈ దశ లేకపోతే… ఆందోళనకు కారణం అదే కావచ్చు!

రాత్రంతా పడుకున్నా పొద్దున్నే లేవగానే ఏదో తెలియని అలసట, టెన్షన్, చికాకు అనిపిస్తున్నాయా? “నేను బాగానే నిద్రపోతున్నాను కదా, మరి ఎందుకు ఇంత ఆందోళనగా (Anxious) ఉంది?” అని మిమ్మల్ని మీరు ప్రశ్నించుకుంటున్నారా? అయితే సమస్య మీరు ఎన్ని గంటలు పడుకుంటున్నారు అనేదానిలో లేదు, ఎలాంటి నిద్ర పోతున్నారు అనేదానిలో ఉంది. మన నిద్రలో ఉండే ఒక ప్రత్యేకమైన దశ లోపిస్తే, అది మన మెదడును తీవ్రమైన ఆందోళనలోకి నెట్టేస్తుందని శాస్త్రవేత్తలు చెబుతున్నారు. ఆ దశ ఏంటో, దాని ప్రాధాన్యత ఏంటో ఇప్పుడు చూద్దాం.

ఆ మాయా దశే.. ‘రెమ్ స్లీప్’: మన నిద్రలో వేర్వేరు దశలు ఉంటాయి. అందులో అత్యంత కీలకమైనది ‘రెమ్’ (REM – Rapid Eye Movement) స్లీప్. సాధారణంగా మనం గాఢనిద్రలోకి వెళ్లి, కలలు కనే సమయం ఇదే. ఈ దశలో మన కనుగుడ్లు వేగంగా కదులుతుంటాయి, మెదడు చాలా యాక్టివ్‌గా ఉంటుంది. ఇక మనం రోజంతా చూసిన, విన్న విషయాలను మెదడు ఒక క్రమపద్ధతిలో సర్దుకునేది, మన ఫీలింగ్స్‌ని బ్యాలెన్స్ చేసేది ఈ సమయంలోనే.

ఈ దశ మిస్ అయితే ఆందోళన ఎందుకు?: మనం పడుకున్నాక ‘రెమ్ స్లీప్’ సరిగ్గా అందకపోతే, మెదడుకు రీఛార్జ్ అయ్యే అవకాశం దొరకదు. దీనివల్ల మరుసటి రోజు చిన్న చిన్న విషయాలకే విపరీతమైన కోపం, చిరాకు, టెన్షన్ వచ్చేస్తాయి. ఇక భయం, ఆందోళనలను కంట్రోల్ చేసే మెదడు భాగం ఈ దశ లేకపోవడం వల్ల సరిగ్గా పనిచేయదు. ఫలితంగా, ఏ పైనా శ్రద్ధ పెట్టలేకపోవడం, లేనిపోని కంగారు పడటం జరుగుతుంది.

రెమ్ స్లీప్ పెంచుకోవడం ఎలా?: మన నిద్రలో ఈ దశను పెంచుకోవడానికి పెద్ద పెద్ద ప్రయోగాలు అక్కర్లేదు. ప్రతిరోజూ ఒకే సమయానికి పడుకోవడం, ఒకే సమయానికి లేవడం అలవాటు చేసుకోవాలి.ఇక  పడుకునే ముందు ల్యాప్‌టాప్స్, మొబైల్ ఫోన్స్ చూడటం పూర్తిగా బంద్ చేయాలి. అలాగే రాత్రిపూట కాఫీ, టీలకు దూరంగా ఉంటే మెదడు ప్రశాంతంగా గాఢనిద్రలోకి, ఆపై రెమ్ స్లీప్‌లోకి వెళ్తుంది.

ఇక సగం రోగాలు ప్రశాంతమైన నిద్రతోనే మాయమవుతాయి. కెరీర్, పనుల పరుగులో నిద్రను నిర్లక్ష్యం చేయడం అంటే మన మానసిక ఆరోగ్యాన్ని పణంగా పెట్టడమే. కాబట్టి, రోజుకు 7 నుండి 8 గంటల నాణ్యమైన నిద్ర ఉండేలా చూసుకోండి. మీ నిద్ర బాగుంటే, మీ మైండ్ హ్యాపీగా ఉంటుంది, ఆందోళనలు దానంతట అవే దూరమవుతాయి.

గమనిక: ఈ సమాచారం కేవలం మీ అవగాహన కోసం మాత్రమే. నిద్రలేమి, విపరీతమైన ఆందోళనతో ఎక్కువ కాలం బాధపడుతుంటే మాత్రం నిర్లక్ష్యం చేయకుండా ఖచ్చితంగా డాక్టర్ లేదా సైకాలజిస్ట్‌ను సంప్రదించడం మంచిది.

The post మీ నిద్రలో ఈ దశ లేకపోతే… ఆందోళనకు కారణం అదే కావచ్చు! appeared first on Manalokam – Latest Telugu News & Updates.