పైలోనెఫ్రైటిస్ అనేది మూత్రపిండాల తీవ్రమైన బ్యాక్టీరియా సంక్రమణ, ఇది మూత్రపిండాల వాపుకు దారితీస్తుంది. ఇది సాధారణంగా మూత్ర మార్గ అంటువ్యాధుల (యూరినరీ ట్రాక్ట్ ఇన్ఫెక్షన్స్ – యూటీఐల) సమస్యగా ఏర్పడుతుంది, ముఖ్యంగా యువతులలో ఎక్కువగా కనిపిస్తుంది. మూత్రపిండాల ఇన్ఫెక్షన్లను అప్పర్ యూరినరీ ట్రాక్ట్ ఇన్ఫెక్షన్లుగా వర్గీకరిస్తారు. ఇవి మూత్రాశయం, మూత్రనాళంలో వచ్చే లోవర్ యూరినరీ ట్రాక్ట్ ఇన్ఫెక్షన్ల కంటే చాలా తీవ్రమైనవి, ఎందుకంటే అవి కిడ్నీ పనితీరుపై చాలా ప్రభావాన్ని చూపవచ్చు. తక్షణ రోగ నిర్ధారణ, చికిత్స కిడ్నీల ఆరోగ్యాన్ని కాపాడటంలో కీలక పాత్ర పోషిస్తాయి.
లక్షణాలు, వాటి గుర్తింపు
కిడ్నీ ఇన్ఫెక్షన్ల లక్షణాలు వ్యక్తిని బట్టి మారవచ్చు. కొంతమందిలో, ఇన్ఫెక్షన్ ఉన్నప్పటికీ ఎటువంటి లక్షణాలు కనిపించవు; దీనిని అసింప్టమాటిక్ బాక్టీరియురియా అంటారు. అయితే, లక్షణాలు కనిపించినప్పుడు అవి చాలా ముఖ్యమైనవి. సాధారణ లక్షణాలలో తరచుగా మూత్ర విసర్జన చేయాలనే కోరిక, మూత్రాన్ని ఆపుకోలేకపోవడం (అర్జెన్సీ), మూత్ర విసర్జన సమయంలో నొప్పి లేదా మంట (డిస్యూరియా), తీవ్రమైన నొప్పి (స్ట్రాంగ్యూరియా) వంటివి ఉంటాయి. శ
శరీరంలోని ఇతర ప్రాంతాలలో కనిపించే లక్షణాలు:
నడుము నొప్పి: ఇది కేవలం నడుము నొప్పి కాకుండా, గజ్జల వైపు వ్యాపించే అవకాశం ఉంది. దీనిని కోస్టోవర్టిబ్రల్ టెండర్నెస్ అంటారు.
సుప్రాప్యూబిక్ నొప్పి: మూత్రాశయం ఉన్న ప్రదేశంలో, పొత్తికడుపు పైభాగంలో నొప్పి.
మూత్రం వాసన:మూత్రం నుంచి దుర్వాసన రావడం.
మూత్రంలో మార్పులు: మూత్రం నురుగుగా ఉండటం లేదా అరుదుగా రక్తం కనిపించడం. ఈ లక్షణాలలో ఏవి కనిపించినా, వెంటనే వైద్య పరీక్షలు చేయించుకుని అవసరమైన చికిత్స తీసుకోవడం చాలా మంచిది.
ఇన్ఫెక్షన్ వ్యాప్తి చెందే మార్గాలు కిడ్నీ ఇన్ఫెక్షన్లు మూడు ప్రధాన మార్గాలలో శరీరంలో వ్యాప్తి చెందుతాయి:
1. పైకి చేరడం (అసెండింగ్ స్ప్రెడ్): ఇది అత్యంత సాధారణ మార్గం. మూత్రనాళం (యూరెత్రా) చుట్టూ ఉన్న బ్యాక్టీరియా నెమ్మదిగా పైకి కదులుతుంది. ముందుగా మూత్రాశయం (బ్లాడర్) చేరుకుని, అక్కడి నుండి మూత్రపిండాలకు విస్తరిస్తుంది. మలద్వారం చుట్టూ ఉండే బ్యాక్టీరియా మూత్రనాళంలోకి ప్రవేశించి ఈ రకమైన ఇన్ఫెక్షన్కు కారణమవుతుంది.
2. పక్క అవయవాల నుండి (కాంటిగ్యువస్ స్ప్రెడ్): పొత్తికడుపులోని ఇతర అవయవాలలో (ఉదాహరణకు, కాలేయం, ప్లీహము లేదా పొత్తికడుపులో ఏదైనా చీము గడ్డ) అంటువ్యాధులు ఉన్నప్పుడు, అవి పక్కన ఉన్న మూత్రపిండాలకు కూడా వ్యాప్తి చెందే అవకాశం ఉంది.
3. రక్తం ద్వారా (హెమటోజీనస్ స్ప్రెడ్): శరీరంలోని ఇతర భాగాలలో తీవ్రమైన ఇన్ఫెక్షన్లు ఉన్నప్పుడు, బ్యాక్టీరియా రక్తం ద్వారా ప్రయాణించి మూత్రపిండాలను చేరుకుంటుంది. ఉదాహరణకు, మెదడులో మెనింజైటిస్, ఊపిరితిత్తులలో న్యుమోనియా, లేదా గుండెలో ఇన్ఫెక్షన్లు ఉన్నప్పుడు, రక్తం ద్వారా ఈ బ్యాక్టీరియా మూత్రపిండాలకు చేరి ఇన్ఫెక్షన్లకు కారణమవుతుంది. ఈ వ్యాప్తి మార్గాలను అర్థం చేసుకోవడం ద్వారా నివారణ, చికిత్సా వ్యూహాలను రూపొందించవచ్చు. కిడ్నీ ఇన్ఫెక్షన్లను సకాలంలో గుర్తించి చికిత్స చేయకపోతే, అవి తీవ్రమైన ఆరోగ్య సమస్యలకు దారితీయవచ్చు.