మధ్యప్రాచ్యంలో జరుగుతున్న ఘర్షణల వల్ల ముగ్గురు భారతీయ నావికులు ప్రాణాలు కోల్పోయారు. ఒమన్ తీరమైన హోర్ముజ్ జలసంధి సమీపంలో అమెరికా సైన్యం జరిపిన దాడిలో ఓ వాణిజ్య నౌక దెబ్బతిన్నదని, ఈ ప్రమాదంలో ముగ్గురు భారతీయులు చనిపోయారని కేంద్ర షిప్పింగ్ శాఖ మంత్రి సర్బానంద సోనోవాల్ గురువారం తెలిపారు. దాడి జరిగిన సమయంలో ఆ నౌకలో మొత్తం 24 మంది భారతీయ సిబ్బంది ఉన్నారు.
మంత్రి సర్బానంద సోనోవాల్ ఏమన్నారంటే?
పలావు దేశపు జెండాతో ప్రయాణిస్తున్న ‘MT సెట్టెబెల్లో’ అనే నౌకపై జరిగిన ఈ దాడి చాలా విచారకరం. మొదట ముగ్గురు భారతీయ నావికులు కనిపించకుండా పోయారని అనుకున్నాం. కానీ, వారిలో ఇద్దరి మృతదేహాలు దొరకడంతో వారు చనిపోయినట్లు నిర్ధారణ అయింది అని మంత్రి సోనోవాల్ ఎక్స్ లో ప్రకటించారు.
అలాగే, ప్రాణాలతో బయటపడిన మిగిలిన సిబ్బందిని వెంటనే మన దేశానికి రప్పించాలని, చనిపోయిన వారి పార్థివ దేహాలను అంత్యక్రియల కోసం త్వరగా భారత్కు తీసుకురావాలని అధికారులను ఆదేశించినట్లు మంత్రి పేర్కొన్నారు.
21 మంది సురక్షితం.. రంగంలోకి విదేశాంగ శాఖ
ఈ నౌకపై దాడి జరిగిన వెంటనే విదేశాంగ మంత్రిత్వ శాఖ (MEA) అలర్ట్ అయింది. నౌకలోని 24 మంది భారతీయ సిబ్బందిలో 21 మందిని రక్షించినట్లు అధికారులు తెలిపారు. గల్లంతైన వారి కోసం ఒమన్ దేశ అధికారుల సహాయంతో గాలింపు చర్యలు చేపట్టారు.
ఈ ‘MT సెట్టెబెల్లో’ నౌక ఒమన్ గల్ఫ్ మీదుగా వెళ్తుండగా ఈ ప్రమాదం జరిగింది. అయితే, గతంలో దాడికి గురైన కొన్ని నౌకలలాగా ఇది అమెరికా ఆంక్షల బ్లాక్లిస్ట్లో లేదని, సాధారణ వాణిజ్య నౌక అని అధికారులు స్పష్టం చేశారు. ప్రపంచవ్యాప్తంగా చమురు రవాణాకు అత్యంత కీలకమైన ‘హోర్ముజ్ జలసంధి’ ప్రాంతంలో రోజురోజుకూ పెరుగుతున్న ఉద్రిక్తతలకు ఈ ఘటనే నిదర్శనం.
అమెరికా-ఇరాన్ ఉద్రిక్తతలు:
మధ్యప్రాచ్యంలో జరుగుతున్న ఈ యుద్ధ వాతావరణంపై భారతదేశం తీవ్ర ఆందోళన వ్యక్తం చేసింది. ఈ సమస్యకు కేవలం దౌత్యపరమైన చర్చల ద్వారానే పరిష్కారం దొరుకుతుందని భారత్ గట్టిగా నమ్ముతోంది. అంతర్జాతీయ సముద్ర మార్గాల్లో ఏ దేశ నౌకలకైనా స్వేచ్ఛగా ప్రయాణించే హక్కు ఉందని, వాణిజ్య నౌకలను, సాధారణ ప్రజలను లక్ష్యంగా చేసుకుని దాడులు చేయవద్దని భారత్ అన్ని దేశాలను కోరింది. ఈ యుద్ధాల వల్ల అమాయక ప్రజలు ప్రాణాలు కోల్పోతున్నారని, వేల మంది ఇళ్లు లేక రోడ్డున పడుతున్నారని భారత్ ఆవేదన వ్యక్తం చేసింది.
ఇక్కడి సముద్ర మార్గాల్లో దాడులు జరగడం వల్ల ప్రపంచ దేశాల వ్యాపారాలు దెబ్బతింటాయని, అంతర్జాతీయంగా చమురు (పెట్రోల్, డీజిల్) ధరలు పెరిగి ఆర్థిక సంక్షోభం వచ్చే ప్రమాదం ఉందని కేంద్ర ప్రభుత్వం హెచ్చరించింది. సమస్యను శాంతియుతంగా పరిష్కరించే ప్రతి ప్రయత్నానికి భారత్ మద్దతు ఇస్తుందని స్పష్టం చేసింది.
వాణిజ్య నౌకలు, పౌర జనాభా, కీలక మౌలిక సదుపాయాలను టార్గెట్ చేసుకుని సైనిక చర్యలకు పాల్పడవద్దని న్యూఢిల్లీ అన్ని పక్షాలను కోరింది. ఘర్షణలను త్వరగా ముగించాలని పిలుపునిస్తూ, సంక్షోభానికి శాంతియుత పరిష్కారం సాధించే లక్ష్యంతో చేసే అన్ని ప్రయత్నాలకు మద్దతు తెలిపింది.
ఆ ప్రాంతంలో తీవ్రమవుతున్న ఘర్షణలపై భారతదేశం తీవ్ర ఆందోళన వ్యక్తం చేసింది. ప్రాణనష్టం, గాయాలు, బలహీన వర్గాల పౌరులు పెద్ద ఎత్తున నిరాశ్రయులవడం వంటి భారీ మానవతా నష్టం వాటిల్లుతోందని నొక్కి చెప్పింది. ఈ ఘర్షణ వల్ల నౌకల స్వేచ్ఛ, ప్రపంచ వాణిజ్య ప్రవాహం, స్థిరపడిన సరఫరా గొలుసులు, అంతర్జాతీయ ఇంధన మార్కెట్లకు అంతరాయాలు ఏర్పడతాయని, తద్వారా ఆర్థిక పరిణామాలు కలుగుతాయని ప్రభుత్వం హెచ్చరించింది.