ఏ సీజన్లోనైనా మందార మొక్కలు నిండుగా పూయాలంటే సరైన సంరక్షణ చాలా అవసరం. చాలామంది మందార మొక్కల నుండి ఆశించిన స్థాయిలో పూలు రావడం లేదని, మొగ్గలు రాలిపోతున్నాయని ఆందోళన చెందుతారు. ఈ సమస్యలకు పరిష్కారంగా వర్షాకాలం ప్రారంభంలో కొన్ని చిట్కాలను పాటించడం ద్వారా పూలు గుత్తులుగా పూస్తాయి.. మందార మొక్కల సంరక్షణకు సంబంధించిన సమగ్ర వివరాలను ఈ కథనంలో తెలుసుకుందాం. ఇందులో నాటు మందారం, హైబ్రిడ్ మందారం మధ్య తేడాలు, వాటికి సరైన మట్టి మిశ్రమం, సూర్యరశ్మి అవసరాలు, తెగుళ్ల నియంత్రణ, అధిక పూత కోసం ప్రత్యేక ఫర్టిలైజర్ తయారీ విధానం ఉంటాయి.
నాటు మందారం వర్సెస్ హైబ్రిడ్ మందారం
నాటు మందారాలు మన వాతావరణానికి బాగా అలవాటుపడి, వేడిని తట్టుకునే శక్తిని కలిగి ఉంటాయి. ఇవి 40 డిగ్రీల ఉష్ణోగ్రతలో కూడా నిరంతరం పూతను ఇస్తాయి. వాటి వేర్లు బలంగా ఉంటాయి. అదే హైబ్రిడ్ మందారాలు పెద్ద, ఆకర్షణీయమైన పువ్వుల కోసం అభివృద్ధి చేయబడినప్పటికీ, అవి వేడికి చాలా సున్నితంగా ఉంటాయి. వేసవిలో వాటి ఎదుగుదల మందగిస్తుంది.. ఆకులు పసుపు రంగులోకి మారి రాలిపోవచ్చు, పూత తగ్గిపోవచ్చు.. వర్షాకాలం ఎదుగుదల మళ్లీ పుంజుకుంటుంది. హైబ్రిడ్ మందారాలకు ప్రత్యేక శ్రద్ధ అవసరం. తక్కువ నిర్వహణ, ఎక్కువ పూలు కావాలంటే నాటు మందారాన్ని ఎంచుకోవచ్చు. పెద్ద, రంగురంగుల పువ్వులు కావాలంటే హైబ్రిడ్లను పెంచుకోవచ్చు, కానీ అదనపు శ్రద్ధ అవసరం..
మట్టి మిశ్రమం – వాటరింగ్
మందార మొక్కలకు ప్రధాన సమస్య మట్టి త్వరగా ఎండిపోవడం. మట్టి పూర్తిగా ఎండిపోతే మొగ్గలు రాలిపోతాయి, ఆకులు వాడిపోతాయి, పూత తగ్గుతుంది. కాబట్టి, మట్టిని ఎప్పుడూ తేలికగా తడిగా ఉంచాలి, కానీ నీరు నిల్వ ఉండకుండా చూసుకోవాలి. రీపోటింగ్ చేసేటప్పుడు మంచి సాయిల్ మిక్స్ చాలా ముఖ్యం. గార్డెన్ సాయిల్, కంపోస్ట్, ఇసుక, కొబ్బరి పీచు (లేదా వరి పొట్టు) కలిపి ఉపయోగించడం మంచిది. కొబ్బరి పీచు తేమను ఎక్కువసేపు నిలిపి ఉంచుతుంది, వేళ్లను చల్లగా ఉంచుతుంది. వరి పొట్టు మట్టిని గుల్లగుల్లగా ఉంచి డ్రైనేజీని మెరుగుపరుస్తుంది. కంపోస్ట్ పోషకాలను నెమ్మదిగా విడుదల చేసి మొక్కకు బలాన్నిస్తుంది.
సూర్యరశ్మి అవసరాలు
నాటు మందారాలకు పూర్తి సూర్యరశ్మి అంటే చాలా ఇష్టం. రోజుకు ఆరు నుండి ఎనిమిది గంటలు డైరెక్ట్ ఎండ తగిలినా బాగా పెరుగుతాయి. వేడి ఎక్కువగా ఉన్నా పూతను కొనసాగిస్తాయి. హైబ్రిడ్ మందారాలకు మాత్రం ఉదయం సూర్యరశ్మి మాత్రమే సరిపోతుంది. ఉదయం ఎండ మృదువుగా ఉంటుంది, ఆకులు కాలిపోవు, మొగ్గలు ఆరోగ్యంగా ఉంటాయి. మధ్యాహ్నం వచ్చే తీవ్రమైన ఎండ వాటి ఆకులను, పువ్వులను దెబ్బతీస్తుంది. కాబట్టి, హైబ్రిడ్ మొక్కలను ఉదయం ఎండ వచ్చే ప్రదేశంలో ఉంచాలి.
తెగుళ్ల నియంత్రణ (మీలీ బగ్స్)
మీలీ బగ్స్ (పిండినల్లి) మందార మొక్కలకు సాధారణ సమస్య. ఇవి మొక్కల రసాన్ని పీల్చి ఆకులు ముడుచుకుపోవడం, మొగ్గలు రాలిపోవడం వంటి సమస్యలను కలిగిస్తాయి. నివారణకు వారానికి ఒకసారి లీటరు నీటిలో 5 మిల్లీలీటర్ల వేపనూనె కలిపి సాయంత్రం వేళల్లో పిచికారీ చేయాలి. సమస్య తీవ్రంగా ఉంటే, ఆక్టారా వంటి రసాయన పురుగుల మందును ఒక గ్రాము లీటరు నీటిలో కలిపి పిచికారీ చేయవచ్చు. ఎండ ఎక్కువగా ఉన్నప్పుడు పిచికారీ చేయకూడదు.
అధిక పూతకు ప్రత్యేక ఫర్టిలైజర్
మందార మొక్కలు నిరంతరం పూతను ఇవ్వడానికి ఒక బెస్ట్ ఫర్టిలైజర్ ఉంది. ముందుగా, నెలకొకసారి రెండు గుప్పెళ్ళ వర్మీ కంపోస్ట్ ను మొక్కకు ఇవ్వాలి. ఇందులో నైట్రోజన్, ఫాస్ఫరస్, పొటాషియం, సూక్ష్మజీవులు పుష్కలంగా ఉంటాయి. ఇది కొత్త చిగుళ్లకు, ఆకులు పచ్చగా మారడానికి, పూతను మెరుగుపరచడానికి సహాయపడుతుంది.
వర్మీ కంపోస్ట్ తో పాటు, ఈ క్రింది లిక్విడ్ ఫర్టిలైజర్ ను తయారు చేయండి:
ఒక బౌల్లో ఒక స్పూన్ ఆవ చెక్కల పొడి (Mustard Cake Powder), ఒక స్పూన్ వేప పిండి (Neem Cake Powder) వేయండి. ఆవ చెక్క పొడి నైట్రోజన్ తో సమృద్ధిగా ఉంటుంది, ఇది మొక్క వేగంగా పెరగడానికి, కొమ్మలు, మొగ్గలు ఎక్కువగా రావడానికి ఉపయోగపడుతుంది. ఇందులో NPK 4:1:1 నిష్పత్తిలో ఉంటుంది. వేప పిండిలో మైక్రో న్యూట్రియంట్స్, యాంటీ ఫంగల్ గుణాలు ఉంటాయి, ఇవి మట్టిలో ఫంగస్, తెగుళ్లు రాకుండా వేర్లను ఆరోగ్యంగా ఉంచుతాయి. ఈ రెండింటిని 2 లీటర్ల నీటిలో కలిపి 24 గంటల పాటు నానబెట్టండి. 24 గంటల తర్వాత, ఈ ద్రావణాన్ని పలుచబరచకుండా నేరుగా మొక్కలకు పోయండి. ఈ ఫర్టిలైజర్ పువ్వుల సైజును మెరుగుపరుస్తుంది, మొగ్గలు ఎక్కువగా వస్తాయి, ఆకులు ముదురు పచ్చగా మారతాయి.. ఇంకా మొక్క ఒత్తిడిని తట్టుకునే శక్తిని పెంచుతుంది.
ఈ చిట్కాలను సమతుల్యంగా పాటిస్తే, మీ మందార మొక్కలు ఎప్పుడైనా నిండుగా పూలతో నిండి అందంగా కనిపిస్తాయి. నాటు మందారాలకు తక్కువ శ్రద్ధ అవసరం కాగా, హైబ్రిడ్ మందారాలకు మాత్రం కొద్దిగా అదనపు సంరక్షణ తప్పనిసరి.. అని నిపుణులు చెబుతున్నారు.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..