వంటగదిలో మనం వాడే చింతపండు (Tamarind) చర్మ సౌందర్యానికి, ముఖ్యంగా పిగ్మెంటేషన్ ( మంగు మచ్చలు) తగ్గించడానికి ఒక అద్భుతమైన ఔషధంగా పనిచేస్తుంది. చర్మంపై ఏర్పడిన నల్లటి మచ్చలు, పిగ్మెంటేషన్, ట్యాన్ను తొలగించడానికి చింతపండు ఫేస్ ప్యాక్ ఒక సహజ సిద్ధమైన పరిష్కారం. చింతపండులో విటమిన్ సి, బి, యాంటీ ఆక్సిడెంట్స్ పుష్కలంగా ఉంటాయి. ఇందులో ఉండే టార్టారిక్ యాసిడ్ చర్మంపై ఉండే మురికిని మరియు మృతకణాలను తొలగించి సహజమైన గ్లోను ఇస్తుంది. చర్మం రంగును మెరుగుపరచడానికి, పిగ్మెంటేషన్ సమస్యను దూరం చేయడానికి చింతపండును ఎలా ఉపయోగించాలో ఇప్పుడు చూద్దాం..
చింతపండుతో తయారు చేయగల ఫేస్ ప్యాక్స్:
పిగ్మెంటేషన్ తగ్గించడానికి (చింతపండు + శనగపిండి): చింతపండును కొద్దిగా నీటిలో నానబెట్టి గుజ్జు తీయాలి. ఈ గుజ్జుకు ఒక స్పూన్ శనగపిండి, కొంచెం పసుపు కలపాలి. ఈ మిశ్రమాన్ని ముఖానికి రాసి 15 నిమిషాల తర్వాత కడిగేయాలి. ఇది చర్మంపై ఉన్న మొండి మచ్చలను తగ్గించడంలో సహాయపడుతుంది.
కాంతివంతమైన చర్మం కోసం (చింతపండు + తేనె): చింతపండు గుజ్జులో ఒక స్పూన్ తేనె కలిపి ముఖానికి అప్లై చేయాలి. తేనె చర్మాన్ని తేమగా ఉంచుతుంది. చింతపండు చర్మం రంగును మెరుగుపరుస్తుంది. ఈ ప్యాక్ పొడి చర్మం ఉన్నవారికి చాలా మేలు చేస్తుంది.
ట్యాన్ తొలగించడానికి (చింతపండు + పెరుగు): ఎండవల్ల చర్మం నల్లగా మారితే (Tan), చింతపండు గుజ్జును పెరుగుతో కలిపి రాసుకోవాలి. ఇందులోని లాక్టిక్ యాసిడ్ మరియు విటమిన్ సి కలిపి చర్మాన్ని త్వరగా చల్లబరుస్తాయి. ట్యాన్ను తొలగిస్తాయి. మెరిసే, అందమైన చర్మం కోసం చింతపండు గుజ్జులో అర చెంచా పెరుగు, అర టీస్పూన్ తేనెను ఉపయోగించి చిక్కటి ఫేస్ ప్యాక్ తయారు చేసి వాడొచ్చు. తేనె, పెరుగు మీ చర్మానికి మరింత నిగారింపును ఇస్తాయి.
అయితే, చింతపండు ఫేస్ఫ్యాక్ అప్లై చేసే ముందు కొన్ని జాగ్రత్తలు కూడా తప్పనిసరి. ఎందుకంటే.. చింతపండులో ఎసిడిక్ గుణాలు ఉంటాయి. కాబట్టి ముఖానికి రాసే ముందు చేతిపై ప్యాచ్ టెస్ట్ చేయడం మర్చిపోవద్దు. మీకు చర్మంపై గాయాలు లేదా ఇన్ఫెక్షన్లు ఉంటే చింతపండును నేరుగా వాడకూడదు. చింతపండు ప్యాక్ వేసుకున్న తర్వాత ఎండలోకి వెళ్లేటప్పుడు ఖచ్చితంగా సన్స్క్రీన్ వాడాలి. ఖరీదైన బ్యూటీ ప్రొడక్ట్స్ కంటే వంటగదిలో దొరికే ఇలాంటి సహజమైన వస్తువులతో క్రమం తప్పకుండా సంరక్షణ తీసుకుంటే, చర్మం ఆరోగ్యంగా, అందంగా ఉంటుంది.