భారతీయ జీవిత బీమా సంస్థ (LIC) పెట్టుబడిదారులకు మరియు షేర్ హోల్డర్లకు ఒక భారీ తీపి కబురు అందించింది. తన చరిత్రలోనే మొట్టమొదటిసారిగా 1:1 నిష్పత్తిలో బోనస్ షేర్లను ప్రకటించింది. అంటే, రికార్డు తేదీ నాటికి కంపెనీ షేర్లను కలిగి ఉన్న ప్రతి ఒక్క షేర్ హోల్డర్కు, వారు కలిగి ఉన్న ఒక్కో షేరుకు అదనంగా మరో షేరు ఉచితంగా లభిస్తుంది.
ఎల్ఐసీ బోర్డు ఏప్రిల్ 13, 2026న జరిగిన సమావేశంలో ఈ బోనస్ షేర్ల జారీకి ఆమోదం తెలిపింది. ఈ నిర్ణయం వల్ల సుమారు 22 లక్షల మంది ఇన్వెస్టర్లకు లబ్ధి చేకూరనుంది. దీని కోసం సంస్థ తన వద్ద ఉన్న రిజర్వులు , సర్ప్లస్ నిధుల నుంచి సుమారు రూ.6,325 కోట్లను వినియోగించనుంది.
కంపెనీ నిర్ణయించే ‘రికార్డు తేదీ’ నాటికి ఎవరైతే తమ డీమ్యాట్ ఖాతాలో ఎల్ఐసీ షేర్లను కలిగి ఉంటారో, వారు మాత్రమే ఈ బోనస్ షేర్లకు అర్హులు. రికార్డు తేదీని కంపెనీ త్వరలోనే అధికారికంగా ప్రకటించనుంది. ఈ బోనస్ షేర్ల ప్రక్రియను జూన్ 12, 2026 లోపు పూర్తి చేయాలని కంపెనీ లక్ష్యంగా పెట్టుకుంది.
బోనస్ షేర్ల వల్ల ఇన్వెస్టర్ల వద్ద ఉన్న షేర్ల సంఖ్య రెట్టింపు అవుతుంది. దీనివల్ల షేర్ మార్కెట్లో లిక్విడిటీ పెరగడమే కాకుండా.. షేర్ ధర సామాన్య ఇన్వెస్టర్లకు అందుబాటులోకి వస్తుంది. దీర్ఘకాలంలో ఇది ఇన్వెస్టర్ల సంపదను పెంచడానికి తోడ్పడుతుంది.
ఎల్ఐసీ తన 2025-26 ఆర్థిక సంవత్సరం మూడవ త్రైమాసికంలో (Q3) అద్భుతమైన ఫలితాలను నమోదు చేసింది. సంస్థ నికర లాభం 17.46 శాతం పెరిగి రూ.12,930.44 కోట్లుగా నమోదైంది. ఈ బలమైన ఆర్థిక పునాది వల్లే కంపెనీ తన ఇన్వెస్టర్లకు బోనస్ రూపంలో రివార్డును ప్రకటించగలిగింది.
లిస్టింగ్ అయినప్పటి నుంచి స్థిరంగా డివిడెండ్లు ఇస్తున్న ఎల్ఐసీ, ఇప్పుడు బోనస్ షేర్ల వైపు మొగ్గు చూపడం మార్కెట్ నిపుణులను ఆకర్షిస్తోంది. ఇది ప్రభుత్వ రంగ సంస్థపై ఇన్వెస్టర్లకు ఉన్న నమ్మకాన్ని మరింత బలపరుస్తుంది. మీ వద్ద ఎల్ఐసీ షేర్లు ఉంటే, రికార్డు తేదీ కోసం కంపెనీ ఇచ్చే తదుపరి సమాచారం వరకు వేచి ఉండండి.