ఆగస్టు 15 నుంచి ప్రారంభం కానున్న శ్రీలంక 2 -టెస్టుల సిరీస్తో భారత క్రికెట్ జట్టు మళ్లీ రెడ్-బాల్ సమరానికి సిద్ధమవుతోంది. వరల్డ్ టెస్ట్ ఛాంపియన్షిప్ (WTC) ఫైనల్ ఆశలను సజీవంగా ఉంచుకోవాలంటే గౌతమ్ గంభీర్ నేతృత్వంలోని టీమిండియాకు ఈ సిరీస్ అత్యంత కీలకం కానుంది. ప్రస్తుతం డబ్ల్యూటీసీ పాయింట్ల పట్టికలో భారత్ 5వ స్థానంలో నిలవడంతో హెడ్ కోచ్ గంభీర్ మార్గదర్శకత్వంపై తీవ్ర విమర్శలు ఎదుర్కొంటున్నాడు.
WTC ఫైనల్ సమీకరణాలు:
ప్రస్తుతం డబ్ల్యూటీసీ రేసులో ఆస్ట్రేలియా, సౌతాఫ్రికా జట్లు తొలి రెండు స్థానాల్లో ఆధిక్యంలో కొనసాగుతున్నాయి. భారత్ ఫైనల్కు అర్హత సాధించాలంటే రాబోయే 9 టెస్టుల్లో అద్భుతాలు చేయాల్సి ఉంటుంది. శ్రీలంక టూర్: 2 టెస్టులు, న్యూజిలాండ్ టూర్: 2 టెస్టులు, ఆస్ట్రేలియా సిరీస్: 5 టెస్టులు ఆడాల్సి ఉంది.
దిశ స్పష్టంగా లేదు.. గంభీర్పై తీవ్ర ఒత్తిడి: దీప్ దాస్గుప్తా
గౌతమ్ గంభీర్ కోచ్గా బాధ్యతలు చేపట్టిన తర్వాత న్యూజిలాండ్, ఆస్ట్రేలియా, సౌతాఫ్రికా చేతుల్లో భారత్ ఓడిపోవడంతో ఆయన కోచింగ్ సామర్థ్యంపై ప్రశ్నలు తలెత్తుతున్నాయని మాజీ ఆటగాడు దీప్ దాస్గుప్తా విశ్లేషించారు. జట్టు సరిగ్గా ఆడనప్పుడు కోచ్, కెప్టెన్ ప్రమేయం ఉన్న అందరినీ ప్రశ్నలు అడగడం సహజం. స్వదేశంలో ఓడిపోవడంతో పాటు విదేశీ పర్యటనల్లోనూ వరుసగా మ్యాచ్లు కోల్పోవడం ఆందోళనకరం. ప్రస్తుతం జట్టు ఒక పరివర్తన దశ (Transition Phase) గుండా వెళుతోంది. కానీ ఈ ట్రాన్సిషన్లో మనం ఏ దిశగా వెళ్తున్నామో స్పష్టత కొరవడింది. గంభీర్, శుభ్మన్ గిల్లపై కచ్చితంగా ఒత్తిడి ఉంటుందని దాస్గుప్తా పేర్కొన్నారు.