Ronin Hero Rat: సాధారణంగా ఎలుకలు కనిపిస్తే మనం భయపడతాం లేదా తరిమికొడతాం. కానీ కంబోడియాలోని ఉత్తర ప్రాంతమైన ‘ప్రీహ విహార్’లో మాత్రం ఒక ఎలుకను అందరూ ‘హీరో’ అని పిలుస్తున్నారు. దాని పేరు ‘రోనిన్’. ఇదొక ‘జెయింట్ ఆఫ్రికన్ పౌచ్డ్ రాట్’ జాతికి చెందిన ఎలుక. ఇది చేస్తున్న పని వింటే మీరు ఆశ్చర్యపోవాల్సిందే. అంతగా ఈ ఎలుక ఏం పని చేస్తుంది, అసలు అది గిన్నిస్ రికార్డును ఎలా సృష్టించింది అనేది ఈ స్టోరీలో తెలుసుకుందాం.
READ ALSO: MS Dhoni-Rohit Sharma: ముగిసిన ధోనీ, రోహిత్ శకం.. అభిమానుల మదిలో చెరగని ముద్ర!
ల్యాండ్మైన్లను పసిగట్టడంలో దిట్ట..
యుద్ధం ముగిసిన దశాబ్దాల తర్వాత కూడా కంబోడియాలో వేల సంఖ్యలో ల్యాండ్మైన్లు అలాగే ఉన్నాయి. వీటి వల్ల ఎంతో మంది ప్రాణాలు కోల్పోతున్నారు. ఇక్కడే ‘రోనిన్’ తన అద్భుతమైన స్మెల్ పవర్తో రంగంలోకి దిగింది. మెటల్ డిటెక్టర్లతో మనుషులు చేయలేని పనిని రోనిన్ కేవలం నిమిషాల్లోనే పూర్తి చేస్తుంది. పేలుడు పదార్థాల వాసనను పసిగట్టి, మైన్ ఉన్న చోట నేలను గీరుతూ అధికారులను అప్రమత్తం చేస్తుంది. దీని బరువు చాలా తక్కువ కాబట్టి, ఆ బాంబులపైకి వెళ్లినా అవి పేలిపోయే ప్రమాదం ఉండదు.
తాజాగా రోనిన్ అత్యధిక సంఖ్యలో ల్యాండ్మైన్లను గుర్తించి వేల ఎకరాల భూమిని సురక్షితంగా మార్చింది. దీని అసాధారణ ప్రతిభకు గాను ఇప్పటికే అంతర్జాతీయ గుర్తింపు లభించగా, తాజాగా ప్రపంచ రికార్డులకెక్కి వార్తల్లో నిలిచింది. గతంలో ‘మగావా’ అనే ఎలుక కూడా ఇదే తరహాలో సేవలు అందించి మరణించగా, ఇప్పుడు ఆ బాధ్యతను రోనిన్ విజయవంతంగా ముందుకు తీసుకెళ్తోంది. ఈ ఎలుకలకు ‘APOPO’ అనే స్వచ్ఛంద సంస్థ ప్రత్యేక శిక్షణ ఇస్తుంది. రోనిన్కు చిన్నప్పటి నుంచే పేలుడు పదార్థాల వాసనను గుర్తించడంపై ఈ సంస్థ వారు ప్రత్యేక శిక్షణ ఇచ్చారు. పని పూర్తి చేసిన ప్రతిసారి దానికి బహుమతిగా అరటిపండ్లు, వేరుశెనగలను అందిస్తారు. ప్రస్తుతం కంబోడియా ప్రజలకు రోనిన్ ఒక రక్షకుడిగా మారింది. బెల్జియన్ స్వచ్ఛంద సంస్థ APOPO ప్రకారం.. ఆగస్టు 2021 నుంచి రోనిన్ 109 ల్యాండ్మైన్లను, 15 ఇతర పేలని ఆయుధ సామగ్రిని (UXO) కనుగొంది. దీంతో ఈ ఎలుక అత్యధిక ల్యాండ్మైన్లను కనుగొన్న ఎలుకగా గిన్నిస్ వరల్డ్ రికార్డులో చోటు దక్కించుకుంది.