కేవలం 15 ఏళ్ల వయసులోనే క్రికెట్ ప్రపంచం దృష్టిని ఆకర్షించిన యువ బ్యాటర్ వైభవ్ సూర్యవంశీపై ఆస్ట్రేలియా మాజీ పేసర్ బ్రెట్ లీ ప్రశంసలు కురిపించాడు. వయసు గురించి జరుగుతున్న చర్చను పక్కనపెట్టి, మైదానంలో అతను చూపిస్తున్న ప్రతిభను మాత్రమే చూడాలని లీ సూచించాడు. సూర్యవంశీ భవిష్యత్తులో మరిన్ని గొప్ప విజయాలు సాధిస్తాడని ఆయన అభిప్రాయపడ్డాడు.
ఐపీఎల్లో ఫియర్లెస్ బ్యాటింగ్
ఐపీఎల్ 2026లో సూర్యవంశీ తన ఫియర్లెస్ బ్యాటింగ్తో అందరి దృష్టిని ఆకర్షించాడు. పెద్ద పేరున్న బౌలర్లు, వారి ప్రతిష్ట తన బ్యాటింగ్ను ప్రభావితం చేయకుండా అటాకింగ్ క్రికెట్ ఆడాడు. విస్తృత శ్రేణి షాట్లు, అద్భుతమైన బ్యాట్ స్పీడ్తో వేగంగా పరుగులు సాధిస్తూ టోర్నమెంట్లో అత్యంత చర్చనీయాంశమైన యువ ఆటగాళ్లలో ఒకడిగా నిలిచాడు. ఐపీఎల్లోని ప్రదర్శనలతో సూర్యవంశీకి భారత టీ20 జట్టులో చోటు దక్కింది. ఇంగ్లండ్తో జరిగిన సిరీస్లో అంతర్జాతీయ క్రికెట్ను కొంత నెమ్మదిగా ప్రారంభించినప్పటికీ, జింబాబ్వే పర్యటనలో అతను పుంజుకున్నాడు. ఆ సిరీస్లో ప్లేయర్ ఆఫ్ ది సిరీస్గా నిలిచి తన ప్రతిభను మరోసారి చాటుకున్నాడు.
అతని వయసు ఎంత అనేది అనవసరం
సూర్యవంశీ వయసుపై ప్రపంచవ్యాప్తంగా జరుగుతున్న చర్చపై బ్రెట్ లీ స్పందించాడు. అతనికి 15 ఏళ్లే అయితే అద్భుతమేనని, 17 లేదా 18 ఏళ్లు ఉన్నా తన ప్రతిభలో మార్పేమీ ఉండదని పేర్కొన్నాడు. ఈ యువ ఆటగాడు క్రికెట్ ఆడగలడని, భారతదేశానికి దొరికిన గొప్ప ఆణిముత్యాల్లో అతను ఒకడని ప్రశంసించాడు. ఐపీఎల్లో సన్రైజర్స్ హైదరాబాద్తో జరిగిన మ్యాచ్లో సూర్యవంశీ సాధించిన 97 పరుగుల ఇన్నింగ్స్ను బ్రెట్ లీ ప్రత్యేకంగా ప్రస్తావించాడు. ఆస్ట్రేలియా బౌలర్లు వేగంగా బంతులు వేసినప్పటికీ, సూర్యవంశీ వాటిని భయపడకుండా ఎదుర్కొన్న తీరు తనను ఆకట్టుకుందని చెప్పాడు. సరైన క్రికెటింగ్ షాట్లతో పాటు అసాధారణమైన పవర్ కూడా అతనిలో ఉందని పేర్కొన్నాడు.
ఒత్తిడి లేకుండా ఎదగనివ్వాలి
సూర్యవంశీకి వచ్చిన వేగవంతమైన గుర్తింపుతో పాటు భారీ అంచనాలు కూడా ఏర్పడుతున్నాయని బ్రెట్ లీ అభిప్రాయపడ్డాడు. అయితే అవే అతనిపై ఒత్తిడిగా మారకుండా జాగ్రత్తపడాలని సూచించాడు. అతన్ని చిన్నపిల్లాడిలాగే ఉండనివ్వండి.. అతనిపై ఎక్కువ ఒత్తిడి పెట్టవద్దు అనే పేర్కొన్నాడు. సూర్యవంశీకి తాను బౌలింగ్ చేయాల్సి వస్తే షార్ట్ బంతులతో అతడిని పరీక్షించేవాడినని బ్రెట్ లీ చెప్పాడు. యువ బ్యాటర్ హుక్ లేదా పుల్ షాట్తో సిక్స్ కొట్టినా, అది తనకు మరింత ఆసక్తికరమైన పోటీగా మారుతుందని పేర్కొన్నాడు. సూర్యవంశీ ప్రతిభను సవాలు చేసే అవకాశం తనకు ఎంతో నచ్చేదని లీ వెల్లడించాడు.