Credit Card: క్రెడిట్ కార్డ్ వాడే వ్యక్తి అకస్మాత్తుగా చనిపోతే.. ఆ బిల్లు కుటుంబ సభ్యులు కట్టాలా? అసలు నిజమేంటంటే..

Credit Card Bill Dues: ఈ రోజుల్లో డెబిట్ కార్డుల కంటే క్రెడిట్ కార్డుల వాడకం చాలా విస్తృతంగా మారింది. రివార్డ్ పాయింట్లు, క్యాష్‌బ్యాక్, బిల్లు చెల్లింపులకు అదనపు సమయం వంటి ప్రయోజనాలను అందించడం వల్ల, ప్రజలు ఆన్‌లైన్ షాపింగ్, ప్రయాణ బుకింగ్‌లు, రోజువారీ ఖర్చుల కోసం క్రెడిట్ కార్డులను ఉపయోగిస్తున్నారు. అయితే, తరచుగా ఒక ప్రశ్న తలెత్తుతుంది. ఒకవేళ క్రెడిట్ కార్డ్ హోల్డర్ అనుకోకుండా మరణిస్తే చెల్లించని బిల్లును ఎవరు చెల్లిస్తారు? ఈ డౌట్‌ చాలా మందికి వస్తుంటుంది. ఈ మొత్తాన్ని కుటుంబం చెల్లించాలా, లేక బ్యాంకు స్వయంగా ఈ సమస్యను పరిష్కరిస్తుందా?

మరణం తర్వాత క్రెడిట్ కార్డ్ బిల్లు ఎవరు కడతారు?

చట్టపరంగా క్రెడిట్ కార్డ్ బ్యాలెన్స్‌లు వ్యక్తిగత బాధ్యతలుగా పరిగణిస్తారు. ఒకవేళ కార్డ్ హోల్డర్ మరణిస్తే బ్యాంక్ మొదట వారి పేరు మీద ఉన్న ఆస్తులు, పెట్టుబడులు లేదా ఇతర ఆదాయాలను మదింపు చేస్తుంది. ఈ ఆస్తులను బకాయి ఉన్న మొత్తాన్ని వసూలు చేయడానికి ఉపయోగిస్తారు. అందువల్ల ఒక వ్యక్తి మరణం తర్వాత క్రెడిట్ కార్డ్ రుణాన్ని ఎలా పరిష్కరిస్తారో తెలుసుకుందాం.

అయితే దీనికి సమాధానం ఎప్పుడూ సూటిగా ఉండదు. కానీ ఒక విషయం స్పష్టంగా అర్థం చేసుకోవచ్చు. క్రెడిట్ కార్డ్ అప్పు దానంతట అదే తీరిపోదు. రిజర్వ్ బ్యాంక్ ఆఫ్ ఇండియా (RBI) ప్రకారం, భారతీయులు సమిష్టిగా క్రెడిట్ కార్డ్ బ్యాలెన్స్‌ల రూపంలో రూ.2.91 లక్షల కోట్లకు పైగా బాకీ ఉన్నారు.

మరణించిన వ్యక్తి క్రెడిట్ కార్డ్ అప్పు నేరుగా ఏ కుటుంబ సభ్యునికీ సంబంధం ఉండదు. జీవిత భాగస్వామి, పిల్లలు లేదా తల్లిదండ్రులు తమ సొంత నిధుల నుండి ఆ అప్పును తిరిగి చెల్లించాల్సిన అవసరం లేదు. అంటే క్రెడిట్ కార్డు తీసుకున్న వ్యక్తి చనిపోతే ఆ కార్డుపై ఉన్న బకాయిలను ఆ వ్యక్తి ఆస్తుల నుండి మాత్రమే స్వాధీనం చేసుకుంటారు. ఒక వ్యక్తి మరణించిన తర్వాత వారి క్రెడిట్ కార్డ్ అప్పు వారికి మిగిలిపోయిన ఆస్తుల నుండి తిరిగి చెల్లింపు ఉంటుంది. ఈ ఎస్టేట్‌లో బ్యాంకు పొదుపు ఖాతాలు, ఫిక్స్‌డ్ డిపాజిట్లు, ఆస్తి/భూమి, ఇతర విలువైన వస్తువులు లేదా పెట్టుబడులు ఉంటాయి.

ఈ ఆస్తులను వారసులకు అందజేయడానికి ముందే, వాటిలోని బ్యాలెన్స్‌ను వసూలు చేసుకునేందుకు బ్యాంకుకు లేదా క్రెడిట్ కార్డ్ కంపెనీకి చట్టపరంగా హక్కు ఉంటుంది. అందువల్ల కుటుంబ సభ్యులు తమ సొంత డబ్బు చెల్లించాల్సిన అవసరం లేనప్పటికీ, అప్పు తీరిపోయే వరకు వారు మరణించిన వ్యక్తి ఆస్తులను ఉపయోగించుకోలేరు.

రుణాన్ని తిరిగి చెల్లించే బాధ్యత ఎవరిది?

మరణించిన వ్యక్తి ఆస్తిని నిర్వహించే వ్యక్తి, అప్పులను తీర్చడానికి చట్టపరంగా బాధ్యత వహిస్తారు. ఈ వ్యక్తిని రెండు విధాలుగా నిర్ణయిస్తారు. వీలునామా ఉన్నప్పుడు, అందులో ఒక కార్యనిర్వాహకుడిని (ఎగ్జిక్యూటర్‌ను) నియమిస్తారు. ఈ వ్యక్తి మరణించిన వ్యక్తి ఆస్తి నుండి అప్పులను తీర్చే ప్రక్రియను పూర్తి చేస్తారు. ఆ తర్వాత మిగిలిన ఆస్తులను వారసులకు పంపిణీ చేస్తారు. వీలునామా లేని పక్షంలో న్యాయస్థానం ఒక నిర్వాహకుడిని (అడ్మినిస్ట్రేటర్‌ను) నియమిస్తుంది. అతని ద్వారా అన్ని కార్యకలాపాలు పూర్తి అవుతాయి.

ఇది కూడా చదవండి: Silver Anklet: మహిళలు ధరించే కాళ్ల పట్టీలు త్వరగా అరిగిపోకుండా ఉండాలంటే ఏం చేయాలి? సూపర్‌ టిప్స్‌..!

మరిన్ని బిజినెస్ వార్తల కోసం ఇక్కడ క్లిక్ చేయండి