సాంకేతిక రంగంలో ఎప్పుడూ ముందంజలో ఉండే చైనా, ఇప్పుడు ఆహార రంగంలో కూడా సరికొత్త విప్లవాన్ని తీసుకొచ్చింది. తూర్పు చైనాలోని హ్యాంగ్జౌ నగరంలో కొన్ని రెస్టారెంట్లు అత్యాధునిక ఆర్టిఫిషియల్ ఇంటెలిజెన్స్ (AI) రోబోలను ప్రవేశపెట్టాయి. ఇవి కేవలం భోజనం వడ్డించడమే కాకుండా, కస్టమర్ల ఆరోగ్యాన్ని విశ్లేషించి వారికి ఏ వంటకం మేలు చేస్తుందో కూడా నిర్ణయిస్తున్నాయి. గత కొన్ని నెలలుగా మూడు ఇటువంటి రెస్టారెంట్లు విజయవంతంగా నడుస్తున్నాయి. ఇందులో ’24 జిక్కీ రోబో రెస్టారెంట్’ ప్రత్యేక గుర్తింపు పొందింది. ఈ రెస్టారెంట్లలో రోబోలే ఆర్డర్లు తీసుకోవడం, వండడం, వడ్డించడం క్లీనింగ్ వంటి పనులను చేస్తున్నాయి.
ఆరోగ్య విశ్లేషణ..
ఈ రెస్టారెంట్లలోని రోబోలు కస్టమర్లు ఆర్డర్ ఇచ్చే ముందే వారి ముఖాలను నాలుకలను స్కాన్ చేస్తాయి. దీనితో పాటు కొన్ని ప్రాథమిక ప్రశ్నలతో కూడిన ప్రశ్నావళిని పూర్తి చేయమని కోరుతాయి. ఈ డేటా ఆధారంగా సదరు కస్టమర్ జీవనశైలి, వారి ప్రస్తుత మానసిక స్థితి జీర్ణక్రియ పరిస్థితిని విశ్లేషించి ఒక నివేదికను తయారు చేస్తాయి. ఆ నివేదిక ఆధారంగా ఆ కస్టమర్కు ఆ సమయంలో ఏ ఆరోగ్యకరమైన ఆహారం అవసరమో రోబోలే సూచిస్తాయి. సీజన్కు అనుగుణంగా ఉండే ఆరోగ్యకరమైన వంటకాలను ఇవి సిఫార్సు చేయడం ఇక్కడి ప్రత్యేకత.
వందకు పైగా వంటకాలు..
ఈ రోబోలు సుమారు 100 రకాల వంటకాలను చేయగలవు. హ్యాంగ్జౌ ప్రత్యేక వంటకమైన ‘పియాన్ ఎర్ చువాన్’ నుండి త్రీ కప్ చికెన్, బ్రేజ్డ్ పోర్క్ ట్రాటర్ వంటి క్లిష్టమైన వంటకాలను కూడా ఇవి మనిషి వండినంత రుచిగా చేస్తున్నాయి. ఇంజనీర్ల ప్రకారం, ఈ రోబోలు నిపుణులైన హ్యూమన్ చెఫ్స్ వంట చేసేటప్పుడు ఉపయోగించే మంట స్థాయి, గరిటె తిప్పే విధానం ఇతర కదలికలను డేటా రూపంలో భద్రపరుచుకుని, వాటిని ఖచ్చితత్వంతో అనుకరిస్తాయి. దీనివల్ల వంటకాల నాణ్యత ఎప్పుడూ ఒకేలా ఉంటుంది. వంటలో నూనె ఉప్పు కూడా మితంగా ఉండటంతో వృద్ధులు కూడా ఈ రోబోలు వండిన భోజనాన్ని అమితంగా ఇష్టపడుతున్నారు.
తగ్గుతున్న ఖర్చులు..
రోబోల వాడకం వల్ల వంటగదిలోని సిబ్బంది పనిభారం 60 శాతం వరకు తగ్గుతోందని రెస్టారెంట్ నిర్వాహకులు చెబుతున్నారు. పీక్ అవర్స్లో డజన్ల కొద్దీ వంటలు చేయాల్సి వచ్చినప్పుడు చెఫ్లకు ఇవి గొప్ప సహాయకారిగా మారుతున్నాయి. రోబోల వినియోగం వల్ల లేబర్ ఖర్చులు తగ్గి, కస్టమర్లకు తక్కువ ధరకే భోజనం అందుబాటులోకి వస్తోంది. అయితే, ఈ టెక్నాలజీ భవిష్యత్తులో హ్యూమన్ చెఫ్స్ ఉపాధిని దెబ్బతీస్తుందా అనే అంశంపై సోషల్ మీడియాలో పెద్ద ఎత్తున చర్చ నడుస్తోంది. ఏదేమైనా, చైనాలో పెరుగుతున్న ఈ ఏఐ రెస్టారెంట్ సంస్కృతి భవిష్యత్తులో ప్రపంచ ఆహార రంగం ఎలా ఉండబోతుందో కళ్లకు కడుతోంది.