దానిమ్మ పండు పోషకాల గని. రక్తహీనతను తగ్గించడం నుండి గుండె ఆరోగ్యాన్ని మెరుగుపరచడం వరకు ఇది చేసే మేలు అంతా ఇంతా కాదు. అయితే, దానిమ్మ పండును వలవడానికి పట్టే సమయం దానివల్ల చేతులు నల్లబడతాయనే భయంతో చాలా మంది దీనిని తినడానికి బద్ధకిస్తుంటారు. పండును అడ్డదిడ్డంగా కోయడం వల్ల లోపల ఉండే గింజలు పగిలిపోయి రసం వృథా అవుతుంది. ఎటువంటి శ్రమ లేకుండా, మీ గోళ్లు నొప్పి పెట్టకుండా దానిమ్మ గింజలను ఎలా వలవాలో ఇప్పుడు స్టెప్-బై-స్టెప్ చూద్దాం.
పైభాగాన్ని ఇలా కట్ చేయండి
చాలా మంది దానిమ్మను మధ్యలోకి కోస్తారు, అది తప్పు. మొదట దానిమ్మ పండు పైభాగంలో కిరీటంలా ఉండే భాగాన్ని కత్తితో వృత్తాకారంలో (సర్కిల్ ఆకారంలో) మెల్లగా కట్ చేసి తీసేయండి. ఇప్పుడు మీకు పండు లోపల ఉండే తెల్లటి పొరలు, వాటి మధ్యలో ఉన్న గింజలు చాలా స్పష్టంగా కనిపిస్తాయి. దీనివల్ల గింజలు నలిగిపోయే అవకాశం అస్సలు ఉండదు.
గాట్లు పెట్టండి
పండు లోపల గమనిస్తే గింజల మధ్య తెల్లని పొరలు (సెక్షన్స్) కనిపిస్తాయి. ఇప్పుడు కత్తి తీసుకుని, ఆ తెల్లని పొరలు ఎక్కడెక్కడ ఉన్నాయో చూసి, సరిగ్గా ఆ పొరల మీదుగా పండు బయటి తొక్కపై పైనుంచి కింద వరకు నిలువుగా గాట్లు పెట్టండి. గుర్తుంచుకోండి, గాటు కేవలం తొక్క వరకు మాత్రమే ఉండాలి, లోపల ఉన్న గింజలకు కత్తి తగలకూడదు.
పువ్వులా విడదీసి..
గాట్లు పెట్టిన తర్వాత, పండును రెండు చేతులతో పట్టుకుని మెల్లగా ప్రెస్ చేస్తే అది ఒక పువ్వులా వికసిస్తుంది. ఇప్పుడు ఒక లోతైన గిన్నె తీసుకోండి. ఆ వికసించిన పండును మీ అరచేతిలో బోర్లించి (గింజలు గిన్నె వైపు ఉండేలా) పట్టుకోండి. ఒక బరువైన గరిటె లేదా మందపాటి చెంచాతో పండు వెనుక భాగంలో గట్టిగా తట్టండి. ఇలా చేయడం వల్ల కేవలం 30 సెకన్లలో గింజలన్నీ ఎక్కడా నలగకుండా నేరుగా గిన్నెలోకి రాలిపోతాయి.
ఈ పద్ధతిని పాటించడం వల్ల మీ చేతులు జిగటగా మారవు, గోళ్లు నల్లబడవు. దానిమ్మ రసం ఒంటిపై పడే అవకాశం కూడా ఉండదు. ఈ స్మార్ట్ కిచెన్ హ్యాక్ను ఉపయోగించి ప్రతిరోజూ తాజాగా దానిమ్మ గింజలను ఆస్వాదించండి.