భారతీయ చలనచిత్ర చరిత్రలో మునుపెన్నడూ లేని విధంగా ఒక సరికొత్త అధ్యాయం లిఖించబడింది. బాలీవుడ్ హీరో రణవీర్ సింగ్, దర్శకుడు ఆదిత్య ధర్ కాంబినేషన్లో వచ్చిన ‘ధురంధర్’ (Dhurandhar) ఫ్రాంచైజీ బాక్సాఫీస్ వద్ద సరికొత్త రికార్డుల సునామీని సృష్టించింది. ప్రపంచవ్యాప్తంగా రూ. 3000 కోట్ల క్లబ్ లో చేరిన మొట్టమొదటి ఇండియన్ ఫిల్మ్ ఫ్రాంచైజీగా ధురంధర్ చరిత్ర సృష్టించింది. కేవలం రెండు సినిమాలతోనే ఈ ఘనత సాధించడం బాలీవుడ్ సత్తాను ప్రపంచానికి చాటిచెప్పింది.
నిశ్శబ్ద సంచలనం
2025 డిసెంబర్ 5న విడుదలైన ‘ధురంధర్’ మొదటి భాగం, ఎలాంటి భారీ ప్రచార ఆర్భాటాలు లేకుండా థియేటర్లలోకి వచ్చింది. మొదట్లో నెమ్మదిగా మొదలైనప్పటికీ, బలమైన కంటెంట్, రణవీర్ సింగ్ పవర్ఫుల్ పర్ఫార్మెన్స్తో పుంజుకుని ఏకంగా రూ. 1000 కోట్ల మార్కును దాటేసింది. భారత మార్కెట్లో రూ. 840.20 కోట్ల నెట్ వసూళ్లను సాధించింది. ఓవర్సీస్లో రూ. 299.50 కోట్లు కొల్లగొట్టి మొత్తం రూ. 1307.35 కోట్లతో ఘనంగా ముగిసింది.
ధురంధర్ 2: బాక్సాఫీస్ విధ్వంసం!
సీక్వెల్ ‘ధురంధర్ 2: ది రివెంజ్’ అయితే అంచనాలను తలకిందులు చేస్తూ బాక్సాఫీస్ వద్ద విధ్వంసం సృష్టించింది. ఏప్రిల్ 13 నాటికి ఈ చిత్రం ప్రపంచవ్యాప్తంగా రూ. 1763 కోట్లకు పైగా వసూలు చేసింది. ముఖ్యంగా భారతీయ సినిమా చరిత్రలో నెట్ వసూళ్ల పరంగా రూ. 1000 కోట్ల మార్కును దాటిన తొలి హిందీ చిత్రంగా ఇది రికార్డు సృష్టించింది. ఓవర్సీస్లో రూ. 415.50 కోట్లు సాధించిన ఈ చిత్రం ‘పుష్ప 2’ (రూ. 1742 కోట్లు) రికార్డులను బద్దలు కొట్టింది. ఒకటి రెండు రోజుల్లోనే ‘బాహుబలి 2’ (రూ. 1788 కోట్లు) లైఫ్ టైమ్ కలెక్షన్లను ఈ మూవీ అధిగమించడానికి సిద్ధంగా ఉంది.
బాహుబలి, పుష్ప రికార్డులు కనుమరుగు!
ఫ్రాంచైజీ పరంగా చూస్తే ధురంధర్ ఇప్పుడు తిరుగులేని నంబర్ 1 స్థానానికి చేరుకుంది. ధురంధర్ ఫ్రాంచైజీ రూ. 3070 కోట్లు. బాహుబలి ఫ్రాంచైజీ రూ. 2438 కోట్లు . పుష్ప ఫ్రాంచైజీ రూ. 2092.20 కోట్లు రాబట్టాయి. ఇక్కడ గమనించాల్సిన విషయం ఏంటంటే.. బాహుబలి, పుష్ప చిత్రాలకు చైనా, గల్ఫ్ మార్కెట్లలో భారీ వసూళ్లు వచ్చాయి. కానీ ధురంధర్ ఆ దేశాల అండ లేకుండానే కేవలం డొమెస్టిక్, మేజర్ ఓవర్సీస్ మార్కెట్ల సహాయంతో ఈ ఫీట్ సాధించడం విశేషం.
ఎందుకు ఇంత ప్రత్యేకం?
రెండు సినిమాలు కూడా విడివిడిగా రూ. 1000 కోట్ల మార్కును దాటడం భారతీయ సినిమాల్లో అరుదైన విషయం. ప్రమోషన్ల కంటే కథనంపైనే చిత్ర బృందం నమ్మకం పెట్టింది. ఆదిత్య ధర్ టేకింగ్, రణవీర్ సింగ్ ఎనర్జీ సినిమాను మరో స్థాయికి తీసుకెళ్లాయి. లార్జ్ స్కేల్ యాక్షన్ సినిమాలకు ఇండియాలో ఉన్న క్రేజ్ను ఈ చిత్రం సరిగ్గా వాడుకుంది. మొత్తానికి, ఇండియన్ సినిమా గ్లోబల్ బాక్సాఫీస్ వద్ద తన సత్తా ఏంటో ధురంధర్ ద్వారా నిరూపించింది. మున్ముందు రాబోయే సినిమాలకు ఇది ఒక పెద్ద బెంచ్ మార్క్ గా మారింది.