నందమూరి ఫ్యాన్స్ కు పూనకాలు తెప్పించే వార్త ఒకటి నెట్టింట హల్ చల్ చేస్తోంది. నటసింహం బాలకృష్ణ మళ్లీ ఖాకీ యూనిఫాం ధరించి వెండితెరపై గర్జించడానికి సిద్ధమవుతున్నారు. ‘నాంది’, ‘ఉగ్రం’ వంటి విలక్షణమైన, సందేశాత్మక చిత్రాలతో టాలీవుడ్లో తనకంటూ ఒక ప్రత్యేక ముద్ర వేసుకున్న యంగ్ డైరెక్టర్ విజయ్ కనకమేడల ఇటీవల బాలయ్యకు ఒక పవర్ఫుల్ పోలీస్ స్టోరీని వినిపించారు. సామాజిక ఇతివృత్తంతో కూడిన ఈ కథకు బాలయ్య ఫిదా అయిపోయి, వెంటనే గ్రీన్ సిగ్నల్ ఇచ్చేశారని సమాచారం.
పవర్ఫుల్ పోలీస్ ఆఫీసర్గా బాలయ్య..
సాధారణంగా బాలయ్య సినిమా అంటేనే బాక్సాఫీస్ వద్ద రికార్డుల వేట. అందులోనూ ఆయన పోలీస్ డ్రెస్ వేశారంటే థియేటర్లలో విజిల్స్ మోత ఆగదు. గతంలో ‘రౌడీ ఇన్స్పెక్టర్’గా రౌడీల గుండెల్లో రైళ్లు పరిగెత్తించినా, ‘లక్ష్మీ నరసింహ’గా ధర్మం కోసం పోరాడినా అది బాలయ్యకే చెల్లింది. ఇటీవలే ‘భగవంత్ కేసరి’లో ఒక రిటైర్డ్ పోలీస్ ఆఫీసర్గా తనలోని పరిణతి చెందిన నటనను చూపించిన బాలయ్య, ఇప్పుడు విజయ్ కనకమేడల దర్శకత్వంలో పూర్తిస్థాయి పోలీస్ ఆఫీసర్గా కనిపించబోతున్నారు. విజయ్ కనకమేడల సినిమాల్లో ఉండే ‘రా’ అండ్ ‘రస్టిక్’ మేకింగ్, బాలయ్య మాస్ ఇమేజ్కు తోడైతే ఫలితం నెక్స్ట్ లెవల్లో ఉంటుందని ట్రేడ్ వర్గాలు విశ్లేషిస్తున్నాయి.
వరుస ప్రాజెక్టులతో దూకుడు
ప్రస్తుతం బాలయ్య తన 111వ (NBK 111) చిత్రంతో బిజీగా ఉన్నారు. గోపీచంద్ మలినేని దర్శకత్వంలో రూపొందుతున్న ఈ భారీ యాక్షన్ ఎంటర్టైనర్లో నయనతార కథానాయికగా నటిస్తోంది. ఇది కాకుండా, విలక్షణ దర్శకుడు వివేక్ ఆత్రేయతో కూడా ఒక ప్రాజెక్ట్ చర్చల దశలో ఉంది. దీనికి ‘కురుక్షేత్రం’ అనే టైటిల్ పరిశీలనలో ఉన్నట్లు తెలుస్తోంది. ఈ రెండూ పూర్తయిన తర్వాత విజయ్ కనకమేడల ప్రాజెక్ట్ పట్టాలెక్కే అవకాశం ఉంది.
కొత్త తరం దర్శకులపై మొగ్గు
ఒకవైపు మాస్ సినిమాలు చేస్తూనే, మరోవైపు కొత్త తరం దర్శకుల వైవిధ్యమైన ఆలోచనలకు బాలయ్య ప్రాధాన్యత ఇస్తున్నారు. సామాజిక ఇబ్బందులను తనదైన శైలిలో ప్రశ్నించే పాత్రల కోసం ఆయన ఎదురుచూస్తున్నారు. ఈ క్రమంలోనే వివేక్ ఆత్రేయ వంటి న్యూ ఏజ్ డైరెక్టర్తో కూడా ఒక సినిమా చర్చల్లో ఉంది. విజయ్ కనకమేడల సినిమాలో బాలయ్య కేవలం యాక్షన్ మాత్రమే కాకుండా, వ్యవస్థలోని లోపాలను ఎత్తిచూపే సుదీర్ఘమైన డైలాగులతో ప్రేక్షకులను ఆలోచింపజేయనున్నారని తెలుస్తోంది. సామాజిక బాధ్యత, పవర్ఫుల్ యాక్షన్ కలగలిసిన ఈ ‘పోలీస్ డ్రామా’ నందమూరి అభిమానులకు ఒక కనువిందు కానుంది.