బరువు తగ్గాలని కోరుకునే వారు ఈ మధ్య కాలంలో మార్కెట్ లోకి ఎన్నో బరువు తగ్గే మెడిసిన్ వచ్చాయి.కొందరు ఆ మందుల వైపు మొగ్గు చూపుతున్నారు. అయితే, వేగంగా బరువు తగ్గడం వల్ల ముఖం పీక్కుపోయినట్లుగా, ముసలివారిలా కనిపించే ‘ఓజెంపిక్ ఫేస్’ అనే సమస్య ఇప్పుడు చర్చనీయాంశమైంది. ఇది మందు వల్ల వచ్చే డైరెక్ట్ సైడ్ ఎఫెక్ట్ కాకపోయినా, అతి తక్కువ సమయంలో కిలోల కొద్దీ బరువు తగ్గడం వల్ల వచ్చే మార్పు. అసలు ఈ ‘ఓజెంపిక్ ఫేస్’ అంటే ఏమిటి? ఇది ముఖంపై ఎలాంటి ప్రభావం చూపుతుందో ఇప్పుడు చూద్దాం.
ఓజెంపిక్ ఫేస్ అంటే ఏమిటి?: మనం తీసుకునే కొన్ని వెయిట్ లాస్ మందుల వల్ల శరీరంతో పాటు ముఖంలో ఉన్న కొవ్వు కూడా చాలా వేగంగా కరిగిపోతుంది. దీనివల్ల బుగ్గలు లోపలికి పోవడం, చర్మం సాగడం, ముఖంపై ముడతలు రావడం వంటి మార్పులు కనిపిస్తాయి. దీనినే వైద్య నిపుణులు ‘ఓజెంపిక్ ఫేస్’ అని పిలుస్తున్నారు. ఇక ఇది కేవలం మందుల వల్ల మాత్రమే కాదు, సర్జరీలు లేదా కఠినమైన డైట్ ద్వారా వేగంగా బరువు తగ్గినా కనిపిస్తుంది.
ముఖంలోని కొవ్వు తగ్గిపోవడం: మన ముఖం నిండుగా, యవ్వనంగా కనిపించడానికి చర్మం కింద ఉండే కొవ్వు (Subcutaneous fat) చాలా ముఖ్యం. బరువు వేగంగా తగ్గినప్పుడు ఈ కొవ్వు కరిగిపోతుంది. దీనివల్ల ముఖం సన్నబడటమే కాకుండా, ముఖంలో ఉండాల్సిన నిరుపు తగ్గిపోయి, పీక్కుపోయినట్లుగా కనిపిస్తుంది. ఇక ఇది ఒక రకంగా వయసు పెరిగిన వారి ముఖంలా అనిపిస్తుంది.
ముడతలు మరియు సాగిన చర్మం: బరువు తగ్గే వేగం పెరిగే కొద్దీ చర్మంలో ఉండే ‘కొల్లాజెన్’, ‘ఎలాస్టిన్’ అనే ప్రోటీన్లు తగ్గిపోతాయి. ఇవి చర్మానికి బిగుతును, ఆకారాన్ని ఇస్తాయి. ఇక ఇవి తగ్గడం వల్ల చర్మం తన స్థితిస్థాపకతను కోల్పోయి వేలాడుతున్నట్లుగా మారుతుంది. దీనివల్ల కళ్ల కింద గుంతలు పడటం, పెదవులు పల్చగా మారడం వంటి లక్షణాలు కనిపిస్తాయి.
ఎవరిలో ఈ సమస్య ఎక్కువ?: వయసు పైబడిన వారు బరువు తగ్గినప్పుడు ఈ సమస్య మరింత స్పష్టంగా కనిపిస్తుంది. ఎందుకంటే వారికి సహజంగానే ముఖంలో కొవ్వు నిల్వలు తక్కువగా ఉంటాయి. అలాగే, తక్కువ సమయంలో టార్గెట్ రీచ్ అవ్వాలని మందుల డోస్ పెంచే వారిలో కూడా ఈ ‘వెయిట్ లాస్ షాక్’ ప్రభావం ఎక్కువగా ఉంటుంది.
బరువు తగ్గడం అనేది ఒక నిరంతర ప్రక్రియలా ఉండాలి. మరీ వేగంగా బరువు తగ్గాలని చూస్తే అది మన అందాన్ని దెబ్బతీసే అవకాశం ఉంది. బరువు తగ్గుతున్నప్పుడు సరైన పోషకాహారం తీసుకోవడం, చర్మాన్ని జాగ్రత్తగా చూసుకోవడం ద్వారా ముఖం పీక్కుపోకుండా చూసుకోవచ్చు.
గమనిక: వెయిట్ లాస్ మందులను వాడే ముందు లేదా బరువు తగ్గే ప్రయాణాన్ని మొదలుపెట్టే ముందు తప్పనిసరిగా డాక్టర్ సలహా తీసుకోవాలి. తప్పుడు పద్ధతుల్లో బరువు తగ్గడం ఆరోగ్యానికి, అందానికి చేటు చేస్తుంది.
The post వెయిట్ లాస్ షాక్.. ముఖం పీక్కుపోయినట్లు కనిపించే కారణం appeared first on Manalokam – Latest Telugu News & Updates.