తిండి తినకపోతే కడుపులో శబ్దం ఎందుకు వస్తుంది? కారణం తెలిస్తే ఆశ్చర్యపోతారు!

ప్రతిఒక్కరు కూడా ఎప్పుడో ఒకసారి ఇలాంటి పరిస్థితి ఎదుర్కొనే వుంటారు. అదే సమయానికి అన్నం తినకపోయినా లేదా బాగా ఆకలి వేస్తున్నప్పుడు కడుపులోంచి గురగుర అని శబ్దాలు రావడం మనందరికీ అనుభవమే. “ఆకలితో కడుపులో ఎలుకలు పరిగెడుతున్నాయి” అని నవ్వుకుంటూ సరదాగా అంటుంటాం. కానీ, అసలు ఆహారం తీసుకోనప్పుడు పొట్టలో ఇలాంటి వింత శబ్దాలు ఎందుకు వస్తాయి? దీని వెనుక ఉన్న అసలు వైద్య కారణం ఏంటో ఇప్పుడు  తెలుసుకుందాం..

వైద్య పరిభాషలో ‘బోర్బోరిగ్మి’: మనం తిండి తిన్నా, తినకపోయినా జీర్ణవ్యవస్థలోని కండరాలు నిరంతరం పనిచేస్తూనే ఉంటాయి. ఆకలి వేసినప్పుడు కడుపులో వచ్చే ఈ శబ్దాలను వైద్య పరిభాషలో ‘బోర్బోరిగ్మి’ అని పిలుస్తారు. ఇక ఇది జీర్ణవ్యవస్థలో జరిగే సహజమైన కండరాల కదలికలు మరియు గ్యాస్ వల్ల ఏర్పడే శబ్దం.

క్లీనింగ్ ప్రాసెస్ – ఎంఎంసి: మనం తిన్న ఆహారం అరిగిపోయి కడుపు ఖాళీ అయిన రెండు గంటల తర్వాత మెదడు జీర్ణవ్యవస్థకు ప్రత్యేక సంకేతాలు పంపుతుంది. ఇక దీనివల్ల కడుపులోని కండరాలు ఒక క్రమ పద్ధతిలో కదులుతాయి. దీనిని ‘మైగ్రేటింగ్ మోటార్ కాంప్లెక్స్’ అంటారు. పొట్టలో మిగిలిపోయిన చిన్న చిన్న ఆహార కణాలు, శ్లేష్మం, బ్యాక్టీరియాను శుభ్రం చేయడానికే ఈ ప్రక్రియ జరుగుతుంది.

గాలి, ద్రవాలు ఢీకొనడం: కడుపు ఖాళీగా ఉన్నప్పుడు అందులో ఆహారం ఉండదు, కేవలం వాయువులు (గాలి), జీర్ణరసాలు (ద్రవాలు) మాత్రమే ఉంటాయి. ఇక కండరాల కదలికల వల్ల ఈ గాలి, ద్రవాలు ఒకదానితో ఒకటి వేగంగా ఢీకొన్నప్పుడు గుడగుడ అనే శబ్దాలు బయటకు వస్తాయి.

మైక్ లా మారే ఖాళీ పొట్ట: పొట్టలో ఆహారం నిండి ఉన్నప్పుడు అది లోపల వచ్చే చిన్న శబ్దాలను బయటకు రాకుండా నొక్కివేస్తుంది (అబ్జార్బ్ చేస్తుంది). కానీ కడుపు పూర్తిగా ఖాళీగా ఉన్నప్పుడు ఒక ఖాళీ డ్రమ్ లేదా మైక్రోఫోన్ లా మారిపోతుంది. ఇక దానివల్ల లోపల జరిగే చిన్న కదలికల శబ్దం కూడా చాలా స్పష్టంగా, పెద్దదిగా బయటకు వినబడుతుంది.

‘గ్రెలిన్’ హార్మోన్ ప్రభావం: మనం సాధారణంగా తినే సమయం రాగానే మెదడు సంకేతాల వల్ల కడుపులో ‘గ్రెలిన్’ (Ghrelin) అనే ఆకలి హార్మోన్ విడుదలవుతుంది. ఇక ఇది జీర్ణ వ్యవస్థను మరింత చురుకుగా మార్చి, కడుపులోని కదలికలను పెంచుతుంది. తద్వారా శబ్దాలు ఇంకా ఎక్కువగా వస్తాయి.

కడుపులో శబ్దాలు రావడం అనేది మన శరీరం మనకు ఇచ్చే ఒక సహజమైన అలారమ్ లాంటిది. “కడుపు ఖాళీ అయ్యింది, వెంటనే ఆహారం అందించు” అని శరీరం మనకు చెప్పే తీరు ఇది. కాబట్టి సమయానికి పౌష్టికాహారం తింటూ జీర్ణవ్యవస్థను ఆరోగ్యంగా ఉంచుకోవడం చాలా ముఖ్యం.

గమనిక: ఖాళీ కడుపుతో ఉన్నప్పుడు శబ్దాలు రావడం చాలా సహజం. అయితే ఈ శబ్దాలతో పాటు తీవ్రమైన కడుపునొప్పి, వాంతులు, వికారంగా ఉండటం లేదా గ్యాస్ సమస్యలు ఉంటే మాత్రం నిర్లక్ష్యం చేయకుండా వైద్యులను సంప్రదించడం మంచిది.

The post తిండి తినకపోతే కడుపులో శబ్దం ఎందుకు వస్తుంది? కారణం తెలిస్తే ఆశ్చర్యపోతారు! appeared first on Manalokam – Latest Telugu News & Updates.