ఆయుష్మాన్ భారత్ (PM-JAY) పథకం లబ్ధిదారులకు కేంద్ర ప్రభుత్వం తీపి కబురు చెప్పింది. ఆధార్ కార్డులోని వివరాలకు, ఆయుష్మాన్ యోజన రికార్డులకు మధ్య తేడాలు (Data Mismatch) ఉన్నా ఇకపై ఆందోళన చెందాల్సిన అవసరం లేదు. అలాంటి వారు కూడా సులభంగా ఆయుష్మాన్ కార్డు పొందేందుకు లేదా అప్డేట్ చేసుకునేందుకు ప్రత్యేక అవకాశం కల్పించింది. అసలు వివరాలు ఎలా మార్చుకోవాలి, ప్రాసెస్ ఏంటో ఇప్పుడు వివరంగా తెలుసుకుందాం..
ఏ వివరాలను సవరించుకోవచ్చు?: మీ ఆధార్తో పోలిస్తే ఆయుష్మాన్ డేటాలో ఏమైనా తప్పులు ఉంటే వాటిని సులభంగా సరిచేసుకోవచ్చు. ఇక తండ్రి పేరులో స్పెల్లింగ్ పొరపాట్లు, పుట్టిన తేదీ, లింగం వివరాలు, అలాగే చిరునామా సరిగ్గా లేకపోయినా సరిచేయమని దరఖాస్తు చేసుకోవడానికి ప్రభుత్వం అవకాశం ఇచ్చింది.
ఆన్లైన్లో అప్డేట్ చేసుకోండిలా: ఆన్లైన్ ద్వారా వివరాలు మార్చుకోవడానికి అధికారిక పోర్టల్ లేదా ‘Ayushman App’ లో లాగిన్ అవ్వాలి. ఇక మీ గుర్తింపు వివరాలతో OTP లేదా ఫేస్ అథెంటికేషన్ ద్వారా e-KYC ప్రక్రియ పూర్తి చేయాలి. సరిచేయాల్సిన వివరాలను నమోదు చేసి, తగిన ఆధార పత్రాలను అప్లోడ్ చేసి సబ్మిట్ చేస్తే సరిపోతుంది.
సిఎస్సి కేంద్రాలు, ఆసుపత్రులలో సేవలు: ఒకవేళ ఆన్లైన్లో చేయడం రాకపోతే, సమీపంలోని కామన్ సర్వీస్ సెంటర్ (CSC) లేదా పథకం నమోదైన ఆసుపత్రిలోని ‘ఆరోగ్య మిత్ర’ సహాయం తీసుకోవచ్చు. ఇక అక్కడ మీ బయోమెట్రిక్ (వేలిముద్రలు లేదా ఐరిస్) ఉపయోగించి వివరాలను సులభంగా అప్డేట్ చేయించుకోవచ్చు.
కావాల్సిన ముఖ్యమైన పత్రాలు: ఈ ప్రక్రియ కోసం సరైన వివరాలు ఉన్న ఆధార్ కార్డు, రేషన్ కార్డు లేదా కుటుంబ గుర్తింపు పత్రం మరియు మొబైల్ నంబర్ దగ్గర ఉంచుకోవాలి. ఈ పథకం ద్వారా అర్హులైన కుటుంబానికి ఏడాదికి రూ. 5 లక్షల వరకు ఉచిత వైద్య చికిత్స లభిస్తుంది.
డేటా మిస్మ్యాచ్ వల్ల ఆయుష్మాన్ భారత్ ప్రయోజనాలు కోల్పోతున్న వారికి ఇది చాలా మంచి అవకాశం. వెంటనే మీ వివరాలను సరిచేసుకుని రూ. 5 లక్షల ఉచిత వైద్య సదుపాయాన్ని పొందండి.
గమనిక: సాంకేతిక సమస్యలు లేదా ఇతర సందేహాల కోసం ఆయుష్మాన్ భారత్ అధికారిక టోల్-ఫ్రీ నంబర్ 14555 కు కాల్ చేసి సహాయం పొందవచ్చు.
The post ఆయుష్మాన్ కార్డు విషయంలో కీలక అప్డేట్.. ఆధార్ వివరాలు తప్పు వున్నా ఇలా చేయండి! appeared first on Manalokam – Latest Telugu News & Updates.