WhatsApp New Feature: ప్రపంచవ్యాప్తంగా కోట్లాది మంది ఉపయోగిస్తున్న ప్రముఖ ఇన్స్టంట్ మెసేజింగ్ యాప్ వాట్సాప్ మరో సరికొత్త ఫీచర్ను తీసుకురానుంది. వ్యాపార సంబంధిత సందేశాలను సులభంగా గుర్తించేందుకు, బిజినెస్ చాట్లను ఆటోమేటిక్గా ఒక ప్రత్యేక విభాగానికి తరలించే ఫీచర్పై సంస్థ పనిచేస్తోంది. ఈ కొత్త ఫీచర్కు ‘ఆటో-ఆర్గనైజ్ బిజినెస్ చాట్’ అనే పేరు పెట్టినట్లు సమాచారం. వాట్సాప్ రాబోయే ఫీచర్లను ట్రాక్ చేసే ప్రముఖ పోర్టల్ వాబెటాఇన్ఫో ఈ విషయాన్ని వెల్లడించింది. ప్రస్తుతం ఈ ఫీచర్ బీటా వెర్షన్లో పరీక్ష దశలో ఉంది. గూగుల్ ప్లే స్టోర్లో అందుబాటులో ఉన్న తాజా బీటా అప్డేట్లో దీన్ని గుర్తించినట్లు తెలుస్తోంది.
ఎలా పనిచేస్తుంది?
ప్రస్తుతం వినియోగదారులకు వచ్చే అన్ని సందేశాలు ఒకే చాట్ జాబితాలో కనిపిస్తాయి. అందులో వ్యక్తిగత చాట్లు, గ్రూప్ చాట్లు, బిజినెస్ ఖాతాల నుంచి వచ్చే సందేశాలు కూడా ఉంటాయి. బిజినెస్ సందేశాలు ఎక్కువైతే అవసరమైన చాట్ను కనుగొనడం కష్టంగా మారుతుంది. ఈ సమస్యకు పరిష్కారంగా వాట్సాప్ కొత్త ఫీచర్ను తీసుకొస్తోంది. దీని ద్వారా బిజినెస్ ఖాతాల నుంచి వచ్చే చాట్లన్నీ ఆటోమేటిక్గా ఒక ప్రత్యేక జాబితాలోకి వెళ్లిపోతాయి. దీంతో యూజర్లు వ్యాపార చాట్లను ఒకే చోట సులభంగా చూడగలుగుతారు.
24 గంటల తర్వాత ప్రత్యేక విభాగానికి
నివేదికల ప్రకారం, బిజినెస్ ఖాతాల నుంచి వచ్చిన సందేశాలు 24 గంటల తర్వాత ప్రత్యేక బిజినెస్ విభాగానికి తరలించబడే అవకాశం ఉంది. అయితే, ఏ చాట్లు ప్రధాన చాట్ లిస్టులో ఉండాలి, ఏవి వేరే విభాగానికి వెళ్లాలి అనే ఎంపికను యూజర్లకే ఇవ్వనున్నట్లు తెలుస్తోంది.
స్పామ్ తగ్గించే అవకాశం
ఈ ఫీచర్ వల్ల అవసరం లేని ప్రమోషనల్ మెసేజులు, బిజినెస్ నోటిఫికేషన్లు ప్రధాన చాట్లను డిస్టర్బ్ చేయకుండా ఉండే అవకాశం ఉంది. స్పామ్ మెసేజులు తగ్గడమే కాకుండా, వ్యక్తిగత చాట్లను మరింత క్రమబద్ధంగా ఉంచేందుకు ఇది సహాయపడుతుంది.
ఇంకా అభివృద్ధి దశలోనే
ప్రస్తుతం ఈ ఫీచర్ అభివృద్ధి దశలో ఉందని, ఇంకా అధికారికంగా విడుదల కాలేదని సమాచారం. త్వరలోనే బీటా యూజర్లకు అందుబాటులోకి వచ్చి, అనంతరం సాధారణ వినియోగదారులకు విడుదలయ్యే అవకాశం ఉంది. కాగా, వాట్సాప్ తరచూ యూజర్ అనుభవాన్ని మెరుగుపరిచే కొత్త ఫీచర్లను తీసుకొస్తుండగా, ఈ బిజినెస్ చాట్ మేనేజ్మెంట్ ఫీచర్ కూడా ఎంతో ఉపయోగకరంగా మారే అవకాశముంది.
WhatsApp is working on automatic separation of business chats to reduce spam!
WhatsApp is reportedly working on a feature to automatically organise business chats into a separate section on Android.https://t.co/0WBmxuYys4 pic.twitter.com/Or6cZRvg6x
— WABetaInfo (@WABetaInfo) April 15, 2026