బాడీ టైర్డ్.. కానీ నిద్ర లేదు? ఇలా చేస్తే రిలీఫ్

రోజంతా కష్టపడి పనిచేసి, ఒళ్లు హూనమైపోయి పడకపై చేరుతాము. శరీరం విశ్రాంతి కోరుకుంటున్నా, మైండ్ మాత్రం పాత జ్ఞాపకాలు లేదా రేపటి టెన్షన్లతో విపరీతంగా ఆలోచిస్తూ ఉంటుంది. శరీరం అలసిపోయినా నిద్ర పట్టకపోవడం అనేది ఇప్పుడు చాలామందిని వేధిస్తున్న సమస్య. దీని వెనుక మన శరీరంలో జరిగే కొన్ని రసాయన మార్పులే కారణమని నిపుణులు చెబుతున్నారు. ఈ ఆలోచనల చక్రం నుంచి బయటపడి ప్రశాంతంగా ఎలా నిద్రపోవాలో ఇప్పుడు తెలుసుకుందాం.

మైండ్ ఎందుకు చురుకుగా మారుతుంది?: మనం నిద్రపోవాలని ప్రయత్నించేటప్పుడు మెదడులోని ‘డిఫాల్ట్ మోడ్ నెట్‌వర్క్’ అనే భాగం యాక్టివ్‌గా మారుతుంది. ఇది గడిచిన విషయాలను విశ్లేషించడం లేదా భవిష్యత్తు గురించి ఆందోళన చెందడానికి బాధ్యత వహిస్తుంది. ముఖ్యంగా ఇక ఒత్తిడిలో ఉన్నప్పుడు, ఈ భాగం మనల్ని ప్రశాంతంగా ఉండనివ్వదు. పదేపదే నెగిటివ్ ఆలోచనలు రావడం వల్ల మెదడు విశ్రాంతి తీసుకోలేక మేల్కొనే ఉంటుంది.

హార్మోన్ల ప్రభావం: నిద్రలేమితో బాధపడేవారిలో ‘కార్టిసాల్’ వంటి ఒత్తిడి హార్మోన్లు ఎక్కువగా విడుదలవుతాయి. శరీరం అలసిపోయినా, ఈ హార్మోన్ల వల్ల మన మెదడు ఇంకా ఏదో ముప్పులో ఉన్నట్లు లేదా పనిలో ఉన్నట్లు భావిస్తుంది. ఇక మెదడులోని కెమికల్స్ బ్యాలెన్స్ తప్పినప్పుడు మనసు ప్రశాంతపడదు. దీనివల్ల శరీరం సహకరించినా, మెదడు సహకరించక నిద్ర మనకు దూరమవుతుంది.

చిన్న విషయాలు కూడా పెద్దవిగా: నిద్ర సరిగ్గా లేనప్పుడు మన మెదడు భావోద్వేగాలను నియంత్రించలేకపోతుంది. దీనివల్ల పగలు పట్టించుకోని చిన్న సమస్య కూడా రాత్రి వేళల్లో చాలా పెద్దదిగా, భయంకరంగా అనిపిస్తుంది. ఈ ఆందోళన వల్ల గుండె వేగం పెరగడం, ఆలోచనలు ముసురుకోవడం జరిగి నిద్ర అస్సలు పట్టదు. ఇది క్రమంగా మానసిక ఆరోగ్యంపై కూడా ప్రభావం చూపుతుంది.

ప్రశాంతమైన నిద్ర కోసం చిట్కాలు: పడుకునే ముందు ఫోన్ లేదా ల్యాప్‌టాప్ వంటి గ్యాడ్జెట్స్‌కు దూరంగా ఉండాలి. మెదడును ప్రశాంతపరిచేందుకు పుస్తకాలు చదవడం లేదా మెల్లని సంగీతం వినడం మంచిది. అలాగే గదిలో వెలుతురు లేకుండా చూసుకోవాలి. ఇక ఆలోచనలు ఎక్కువగా వస్తుంటే, వాటిని ఒక డైరీలో రాసి పక్కన పెట్టేయండి. దీనివల్ల మనసు తేలికపడి త్వరగా నిద్ర పట్టే అవకాశం ఉంటుంది.

శరీరానికి విశ్రాంతి ఎంత అవసరమో, మనసుకు ప్రశాంతత కూడా అంతే ముఖ్యం. రాత్రిపూట ఆలోచనలను కట్టడి చేయడం నేర్చుకుంటే నిద్రలేమి సమస్యను సులభంగా జయించవచ్చు. మన జీవనశైలిలో చిన్న చిన్న మార్పులు చేసుకుంటే ఆరోగ్యకరమైన నిద్ర మీ సొంతమవుతుంది.

గమనిక: ఈ సమాచారం కేవలం మీ అవగాహన కోసం మాత్రమే. ఒకవేళ మీరు దీర్ఘకాలికంగా నిద్రలేమి లేదా తీవ్రమైన ఆందోళనతో బాధపడుతుంటే, వెంటనే నిపుణులైన వైద్యుడిని సంప్రదించి సలహా తీసుకోవడం మంచిది.

The post బాడీ టైర్డ్.. కానీ నిద్ర లేదు? ఇలా చేస్తే రిలీఫ్ appeared first on Manalokam – Latest Telugu News & Updates.