ఈ రోజుల్లో చాలామందిని వేధించే ప్రధాన చర్మ సమస్యల్లో గోళ్ల ఫంగస్ ఒకటి. వెచ్చని, వానాకాలం తేమతో కూడిన వాతావరణం, బిగుతుగా ఉండే బూట్లు వేసుకోవడం లేదా స్విమ్మింగ్ పూల్స్, జిమ్ల వంటి పబ్లిక్ ప్రదేశాలలో ఖాళీ కాళ్లతో తిరగడం వల్ల ఈ ఫంగల్ ఇన్ఫెక్షన్ వేగంగా వ్యాపిస్తుంది. అంతేకాకుండా అపరిశుభ్రమైన మానిక్యూర్, పెడికూర్ పరికరాలు వాడటం వల్ల కూడా ఇది సోకుతుంది. మరి ఈ గోళ్ల ఫంగస్, నొప్పి, దురద నుంచి ఉపశమనం పొందేందుకు పాటించాల్సిన చిట్కాలేంటో ఇప్పుడు తెలుసుకుందాం..
గోళ్లను ఎల్లప్పుడూ శుభ్రంగా, పొడిగా ఉంచండి: ఫంగస్ తేమ ఉన్న చోట వేగంగా పెరుగుతుంది. కాబట్టి కాళ్లు, చేతులను ఎప్పటికప్పుడు శుభ్రం చేసుకుని, తడి లేకుండా ఆరబెట్టుకోవాలి. చెమట పట్టినప్పుడు సాక్స్లను వెంటనే మార్చడం, ఊపిరి ఆడటానికి అనువుగా ఉండే వెడల్పాటి బూట్లు ఎంచుకోవడం వల్ల ఫంగస్ వ్యాప్తిని అరికట్టవచ్చు.
గోళ్లను సరిగ్గా కత్తిరించే పద్ధతి: గోళ్లను కత్తిరించేటప్పుడు అంచులు గుండ్రంగా కాకుండా నేరుగా అడ్డంగా కత్తిరించాలి. ఇక గోళ్లు కొరికే అలవాటు ఉంటే వెంటనే మానుకోవాలి, ఎందుకంటే గోరు చుట్టూ ఉండే చిన్న గాయాల ద్వారా ఫంగస్ లోపలికి ప్రవేశిస్తుంది. అలాగే కొబ్బరి నూనె లేదా మాయిశ్చరైజర్ రాసి గోళ్లను తేమగా ఉంచడం శ్రేయస్కరం.
పోషకాహారంతో బలమైన గోళ్లు: లోపలి నుంచి ఇన్ఫెక్షన్తో పోరాడటానికి సరైన ఆహారం చాలా ముఖ్యం. గోళ్ల పెరుగుదలకు, బలానికి గుడ్లు, పప్పుధాన్యాలు వంటి ప్రొటీన్ కలిగిన ఆహారాలు తీసుకోవాలి. ఇక వీటితో పాటు బయోటిన్, మెగ్నీషియం, ఐరన్ మరియు విటమిన్ డి లభించే పండ్లు, కూరగాయలను రోజూవారీ ఆహారంలో భాగం చేసుకోవాలి.
ఇక గోళ్ల ఫంగస్ రాకుండా ఉండాలంటే వ్యక్తిగత పరిశుభ్రత పాటించడం మరియు పోషకాహారం తీసుకోవడం చాలా అవసరం. ఇక ముందస్తు జాగ్రత్తలు పాటించడం ద్వారా నొప్పి, దురద సమస్యల నుంచి సులభంగా ఉపశమనం పొందవచ్చు.
గమనిక: గోళ్ల ఫంగస్ తీవ్రంగా ఉండి, గోరు రంగు మారిపోవడం లేదా విపరీతమైన నొప్పి ఉంటే సొంత చిట్కాలపై ఆధారపడకుండా వెంటనే చర్మవ్యాధి నిపుణుడిని (Dermatologist) సంప్రదించి యాంటీఫంగల్ చికిత్స తీసుకోవడం శ్రేయస్కరం.
The post గోళ్లకు ఫంగస్ వచ్చిందా..? నొప్పి, దురద తగ్గేందుకు ఈ చిట్కాలు ట్రై చేయండి! appeared first on Manalokam – Latest Telugu News & Updates.