సాధారణ ఫోల్డబుల్ ఫోన్లలో ఎదురయ్యే ఇబ్బందులను పూర్తిగా తొలగిస్తూ వెడల్పాటి ఆస్పెక్ట్ రేషియోతో పాటు అత్యుత్తమ డిజైన్ హంగులతో మోటరోలా నుంచి తొలి వైడ్ ఫోల్డబుల్ ఫోన్ ఆవిష్కరించబడుతోంది. క్రీజ్లెస్ డిస్ప్లే, స్లిమ్ లుక్తో యూజర్లను ఆకట్టుకునే లక్ష్యంతో రూపుదిద్దుకుంటున్న ఈ హ్యాండ్సెట్ మార్కెట్లో భారీ అంచనాలను రేకెత్తిస్తోంది. అత్యాధునిక హంగులతో రూపుదిద్దుకుంటున్న ఈ ఫోన్ విశేషాలను తెలుసుకుందాం.
కెమెరా బార్ డిజైన్
తాజా లీక్స్ ప్రకారం ఈ ఫోన్ వెనుక భాగంలో నిలువుగా కాకుండా అడ్డంగా ఉండే కెమెరా బార్ను అందించబోతుండగా శాంసంగ్ ఫోల్డ్ ఫోన్లలో కెమెరాలు ఒకే వైపు నిలువుగా ఉండటం వల్ల ఫోన్ను టేబుల్పై ఉంచి వాడుతున్నప్పుడు అది ఊగుతుంది కానీ మోటరోలా డిజైన్ వల్ల ఫోన్ ఫ్లాట్ సర్ఫేస్పై స్థిరంగా ఉంటుంది, ఈ కెమెరా బార్లో మూడు కటౌట్స్ కనిపిస్తున్నాయి. సాధారణంగా చాలా ఫోల్డబుల్ ఫోన్లు తెరిచినప్పుడు చాలా పొడవుగా లేదా చిన్న స్క్రీన్తో ఉంటాయి కానీ మోటరోలా దీనికి భిన్నంగా వెడల్పాటి ఆస్పెక్ట్ రేషియోతో ఈ ఫోన్ను రూపొందిస్తోంది. దీంతో ఫోన్ మూసి ఉన్నప్పుడు సాధారణ స్మార్ట్ఫోన్లాగే సౌకర్యవంతంగా వాడుకోవచ్చు అలాగే తెరిచినప్పుడు పెద్ద టాబ్లెట్ లాంటి అనుభవాన్ని ఇస్తుంది తద్వారా టైపింగ్ చేయడం, గేమ్స్ ఆడటం మరియు వీడియోలు చూడటం చాలా సులభమవుతుంది.
క్రీజ్లెస్ డిస్ప్లే
స్క్రీన్ మడతపడే చోట గీత లేదా మడత కనిపిస్తుందేమోననే భయం చాలామందిలో ఉంటున్నప్పటికీ మోటరోలా ఈ డివైజ్లో గీత లేని క్రీజ్లెస్ డిస్ప్లేను ఉపయోగిస్తున్నట్లు తెలుస్తోంది. దీనికి తోడు చాలా సన్నని బాడీ, త్రీడీ గ్లాస్ మరియు ప్రీమియం ఫినిషింగ్తో ఈ ఫోన్ రాబోతుండగా ఫోన్ను చాలా తేలికగా తెరిచేందుకు వీలుగా ఈజీ ఓపెన్ ప్రొఫైల్ అనే ప్రత్యేక డిజైన్ను కూడా ఇందులో అందిస్తున్నారు. మోటరోలా ఈ ఫోన్ పేరును, పూర్తి ఫీచర్లను అధికారికంగా ఇంకా ప్రకటించనప్పటికీ లీకైన వార్తల ప్రకారం రాబోయే కొన్ని నెలల్లోనే ఈ వైడ్ ఫోల్డబుల్ ఫోన్ మార్కెట్లోకి అడుగుపెట్టే అవకాశం ఉంది. డిజైన్ మరియు వాడకంలో ఉన్న ప్రధాన సమస్యలను పరిష్కరిస్తూ వస్తున్న ఈ ఫోల్డబుల్ డివైజ్ విడుదలయ్యాక స్మార్ట్ఫోన్ ప్రేమికులను కచ్చితంగా ఆకట్టుకుంటుందని టెక్ నిపుణులు భావిస్తున్నారు.