Trump Freebie Politics: అమెరికా అధ్యక్షుడు డొనాల్డ్ ట్రంప్ కూడా భారతీయ ఎన్నికల నుంచి ప్రభావితమైనట్లు కనిపిస్తోంది. నవంబర్లో అమెరికాలో మిడ్ టర్మ్ ఎన్నికలు ముంచుకొస్తున్న సమయంలో సంచలన హామీ ఇచ్చారు. రిపబ్లికన్ పార్టీ హౌస్ ఆఫ్ రిప్రజెంటేటివ్స్, సెనేట్ రెండింటిపైనా నియంత్రణ కొనసాగించే అవకాశం ఇస్తే ప్రతీ వయోజన అమెరికన్ పౌరుడికి 5000 డాలర్ల డివిడెంట్ ఇస్తామని ప్రకటించారు. డల్లాస్లో జరిగిన ఓ కార్యక్రమంలో ట్రంప్ ఈ హామీ ఇచ్చారు. అయితే, ఈ డబ్బును ఎలా చెల్లిస్తారు.? ఎక్కడి నుంచి ఇస్తారు? అనే దానిపై క్లారిటీ లేదు.
భారతదేశ ‘‘ఉచితాల’’తో పోలిక:
ట్రంప్ హామీని భారత దేశంలో వివిధ రాజకీయ పార్టీలు ఓటర్లకు ఇచ్చే ‘‘ఉచితాల’’తో పోల్చారు. మన దేశంలో ఎన్నికల్లో ఓటర్లను ఆకట్టుకోవడానికి మిక్సీలు, టీవీలు, ల్యాప్టాప్లు, స్కూటీలు ఇలా ఉచితాలను ప్రకటించడం చూస్తూనే ఉంటాం. తమిళనాడులో సంక్షేమ పథకాలతో ప్రారంభమైన ఈ సంస్కృతి అన్ని రాష్ట్రాలకు, అన్ని పార్టీలకు పాకింది. ఉచితాలు లేకుంటే గెలిచి అధికారంలోకి వచ్చే పరిస్థితి లేదంటే అతిశయోక్తి కాదు. ఇప్పుడు ట్రంప్ హామీ కూడా భారత రాజకీయ పార్టీలు ఇచ్చే ఉచిత హామీలాగే ఉంది.
ట్రంప్కు ఈ ఎన్నికలు డూ ఆర్ డై:
2026 నవంబర్లో మిడ్టర్మ్ ఎన్నికల్లో గెలిస్తే ట్రంప్కు ఆ దేశ చట్టసభలపై నియంత్రణ ఉంటుంది. కాంగ్రెస్లోని రెండు సభల్లో నియంత్రణ కోల్పోతే రాజకీయంగా ఎదురుదెబ్బ తగిలే అవకాశం ఉంది. ఇప్పటికే, ట్రంప్ అప్రూవల్ రేటింగ్ యూఎస్లో నానాటికి పడిపోతోంది. ఇక ఇరాన్ యుద్ధం ట్రంప్ వ్యూహానికి బెడిసికొట్టింది. ఈ నేపథ్యంలో ఈ ఎన్నికలు కీలకంగా మారాయి. దీంతోనే తన పార్టీకి ఓటేస్తే 5000 డాలర్లు అంటూ కొత్త హామీని ముందుకు తీసుకువచ్చారు.
డబ్బు ఎక్కడి నుంచి వస్తుంది.?
ట్రంప్ ప్రతిపాదించిన 5,000 డాలర్ల హమీని అమలు చేస్తే.. $1 ట్రిలియన్కు పైగా ఖర్చయ్యే అవకాశం ఉంది. సుమారు 240 మిలియన్ల వయోజన అమెరికన్ పౌరులకు చెల్లిస్తే వ్యయం దాదాపు $1.2 ట్రిలియన్ వరకు ఉండొచ్చని అంచనాలు ఉన్నాయి. ఈ డబ్బు ఎక్కడి నుంచి ఇస్తారనే దానిపై ట్రంప్ ఎలాంటి క్లారిటీ ఇవ్వలేదు. అయితే వైస్ ప్రెసిడెంట్ జేడీ వాన్స్ మాత్రం టారిఫ్ల ద్వారా వచ్చే ఆదాయాన్ని ఉపయోగిస్తామని చెబుతున్నారు.
అయితే, వస్తున్న టారిఫ్లు ఈ హామీకి సరిపోతాయా? అనేది అసలు ప్రశ్న. నిపుణుల అంచనా ప్రకారం.. ప్రకారం ప్రస్తుత టారిఫ్ విధానాల ద్వారా వచ్చే పదేళ్ల ఆదాయం సుమారు $1.9 ట్రిలియన్గా ఉండొచ్చు. మరోవైపు ఒక్కసారి 5,000 డాలర్ల చెల్లింపునకే సుమారు $1.2 ట్రిలియన్ అవసరమయ్యే అవకాశం ఉంది.