Sanju Samson: నిన్న జరిగిన ఢిల్లీ క్యాపిటల్స్(DC), చెన్నై సూపర్ కింగ్స్(CSK) మ్యాచ్లో సీఎస్కే అదరగొట్టింది. సంజు శామ్సన్ మరోసారి రెచ్చిపోయాడు. దీంతో చెన్నై 8 వికెట్ల తేడాతో చిత్తు చేసింది. ఢిల్లీ బౌలర్లపై విరుచుకుపడుతూ కేవలం 52 బంతుల్లో 7 ఫోర్లు, 6 భారీ సిక్సర్లతో 87 పరుగులు చేసి అజేయంగా నిలిచాడు. ఇక సంజు శామ్సన్ తన అద్భుతమైన ఇన్నింగ్స్తో మ్యాచ్ విన్నర్గా నిలవడమే కాకుండా, తన హుందాతనంతో అందరినీ ఆకట్టుకున్నాడు. ప్లేయర్ ఆఫ్ ది మ్యాచ్ అవార్డు అందుకున్న సందర్భంగా ఆసక్తికర వ్యాఖ్యలు చేశాడు. అభిమానులు తనను ‘చెట్టా’ (అన్నయ్య) అని పిలవడంపై స్పందిస్తూ, తనకు ఆ పిలుపు ఇష్టమేనని కానీ ‘సంజూ’ అని పిలిపించుకోవడమే మరింత ఇష్టమని నవ్వుతూ చెప్పాడు. ఇక తన బ్యాటింగ్లో కనిపిస్తున్న ఆ అద్భుతమైన టైమింగ్ గురించి వివరిస్తూ.. గత రెండు మూడు నెలలుగా తన ‘ఇనిషియల్ మూవ్మెంట్స్’పై ప్రత్యేకంగా దృష్టి పెట్టానని, ప్రాథమికాంశాలకు కట్టుబడి చేతులపై నమ్మకం ఉంచి ఆడటం వల్లే షాట్లు అంత బాగా వస్తున్నాయని తెలిపాడు. నిజానికి ఈ ట్రిగ్గర్ మూవ్మెంట్స్ అనేవి గత మూడు ఐదేళ్లుగా చేస్తున్నవేనని, కంఫర్ట్ జోన్లో ఉంటేనే ఆత్మవిశ్వాసంతో బ్యాటింగ్ చేయగలమని, బౌలర్లను బట్టి అప్పుడప్పుడు క్రీజులో కదలికలు మార్చుకోవడం తన ట్యాక్టికల్ ప్లాన్ అని వివరించాడు.
చాలామంది తనను గ్రౌండ్లో చాలా ప్రశాంతంగా ఉంటున్నావని అంటున్నారని, నిజానికి తాను ఎప్పుడూ ఇలాగే ఉంటానని సంజూ చెప్పుకొచ్చాడు. “నేను బయట కూర్చున్నప్పుడు కూడా చాలా ప్రశాంతంగానే ఉంటాను, కానీ ఇప్పుడు క్రీజులో ఎక్కువ సమయం కనిపిస్తున్నాను కాబట్టి అందరికీ అలా అనిపిస్తోంది. నేను బ్యాటింగ్ చేస్తున్నప్పుడు కొన్ని విన్యాసాలు జరుగుతుంటాయి కాబట్టి, చూసే వారికి నేను మరీ ప్రశాంతంగా ఉన్నట్లు అనిపించవచ్చు” అని చమత్కరించాడు. తన ఇన్నింగ్స్ ప్రణాళిక గురించి చెబుతూ.. లక్ష్యం, వికెట్ తీరును బట్టి పవర్ప్లేలో వికెట్ పడకుండా 30-35 పరుగులు చేసినా చాలని భావించానన్నాడు. స్పిన్నర్లపై తనకున్న పట్టుతో మిడిల్ ఓవర్లలో ఆ స్కోరును కవర్ చేయగలననే నమ్మకం తనకు ఉందని, అందుకే ఆరంభంలో కాస్త సమయం తీసుకున్నానని, అనుకున్నట్లే ప్లాన్ వర్కవుట్ అయిందని సంతోషం వ్యక్తం చేశాడు. ఇక సెంచరీ మిస్ అవ్వడంపై సంజూ చాలా పరిణతితో సమాధానమిచ్చాడు. “సెంచరీలు ఎప్పుడూ స్పెషలే, కానీ ఈరోజు సెంచరీ కోసం ప్రయత్నిస్తే అది స్వార్థం అవుతుందనిపించింది. మరో ఎండ్లో నా పార్టనర్ చాలా బాగా ఆడుతున్నాడు, అలాంటి సమయంలో ‘నా సెంచరీ కోసం ఒక సింగిల్ ఇవ్వు’ అని అతనికి చెప్పడం నాకు ఇష్టం లేదు. అందుకే జట్టును గెలిపించి నాటౌట్గా వెనక్కి రావడమే నాకు ఎక్కువ సంతృప్తినిచ్చింది. ఇంకా కొన్ని మ్యాచ్లు ఉన్నాయి కదా, చూద్దాం మున్ముందు ఆ మూడు అంకెలు (సెంచరీ) మళ్ళీ సాధిస్తానేమో” అని సంజూ శామ్సన్ తన క్రీడా స్ఫూర్తిని చాటుకున్నాడు.