ఒక కిలోమీటర్ నడవడానికి ఎన్ని అడుగులు వేయాలి.. ఈ లెక్కలు తెలిస్తే అవాక్కవ్వాల్సిందే..

నేటి ఉరుకుల పరుగుల జీవితంలో ఊబకాయం, అధిక బరువు పెద్ద సమస్యలుగా మారాయి. బరువు తగ్గడం కోసం చాలా మంది జిమ్‌లలో చేరి కఠినమైన వ్యాయామాలు, క్రాష్ డైట్లు చేస్తుంటారు. అయితే వీటన్నింటికంటే ఎంతో సులువైన, రూపాయి ఖర్చు లేని వాకింగ్ అత్యంత ప్రభావవంతమైన మార్గమని ఆరోగ్య నిపుణులు చెబుతున్నారు. కొన్ని సందర్భాల్లో పరుగెత్తడం కంటే నడక వల్లే శరీరానికి ఎక్కువ ప్రయోజనాలు ఉంటాయని వైద్యులు స్పష్టం చేస్తున్నారు. అయితే ఫిట్‌నెస్ సాధించాలనుకునే వారు రోజుకు ఇన్ని అడుగులు నడవాలని టార్గెట్ పెట్టుకుంటారు కానీ, అసలు ఎన్ని అడుగులు వేస్తే ఎంత దూరం వెళ్తామనే దానిపై అవగాహన ఉండదు.

ఒక కిలోమీటరుకు ఎన్ని అడుగులు?

సాధారణంగా ఒక కిలోమీటరు దూరం నడవడానికి సగటున 1,250 నుండి 1,550 అడుగులు పడతాయి. ఒక ఆరోగ్యవంతుడైన వ్యక్తి సగటు వేగంతో నడిస్తే ఒక కిలోమీటరుకు సుమారు 1,400 అడుగులు వేస్తాడని అంచనా. అయితే ఈ లెక్క అందరికీ ఒకేలా ఉండదు. ఇది ప్రధానంగా కొన్ని అంశాలపై ఆధారపడి ఉంటుంది.

ఎత్తు: ఎత్తు ఎక్కువగా ఉన్నవారి కాళ్లు పొడవుగా ఉండటం వల్ల వారి అడుగుల మధ్య దూరం ఎక్కువ. కాబట్టి వారు తక్కువ అడుగుల్లోనే కిలోమీటరు పూర్తి చేస్తారు.

నడిచే వేగం: మనం ఎంత వేగంగా నడుస్తున్నాం అనే దానిపై కూడా అడుగుల లెక్క మారుతుంది. వేగంగా నడవడం వల్ల అడుగుల దూరం పెరుగుతుంది.

లింగ భేదం: పురుషులు, స్త్రీల శరీర నిర్మాణం, ఎత్తులో తేడాల వల్ల వారు వేసే అడుగుల సంఖ్యలో వ్యత్యాసం కనిపిస్తుంది.

10,000 అడుగులు నడిస్తే ఎన్ని కిలోమీటర్లు?

పూర్తి ఆరోగ్యంగా, ఫిట్‌గా ఉండాలంటే రోజుకు 10,000 అడుగులు నడవాలని అంతర్జాతీయ ఆరోగ్య సంస్థలు సూచిస్తున్నాయి. ఈ లెక్కన మీరు రోజుకు 10,000 అడుగుల లక్ష్యాన్ని పూర్తి చేస్తే.. దాదాపు 7 నుండి 8 కిలోమీటర్ల దూరం నడిచినట్లు అర్థం.

చిట్కా: ఒకేసారి 10 వేల అడుగులు నడవడం సాధ్యం కాకపోతే నిరాశపడకుండా మొదట రోజుకు కనీసం 5,000 అడుగులతో ప్రారంభించి, ఆపై క్రమంగా పెంచుకుంటూ పోవడం మంచి ఫలితాన్ని ఇస్తుంది.

రన్నింగ్ కంటే వాకింగ్ ఎందుకు బెటర్?

చాలా మంది బరువు తగ్గడానికి రన్నింగ్ వైపు మొగ్గు చూపుతారు. కానీ రన్నింగ్ చేసేటప్పుడు మోకాళ్లు, కీళ్లపై శరీర బరువు కంటే 3 రెట్లు ఎక్కువ ఒత్తిడి పడుతుంది. దీనివల్ల మోకాళ్ల నొప్పులు వచ్చే ప్రమాదం ఉంది. అదే నడక విషయానికి వస్తే..

• కీళ్లపై ఒత్తిడి చాలా తక్కువగా ఉంటుంది. కాబట్టి ఇది అన్ని వయసుల వారికి సురక్షితమైన వ్యాయామం.
• నడక వల్ల కేవలం బరువు తగ్గడమే కాకుండా గుండె ఆరోగ్యం మెరుగుపడుతుంది, రక్తపోటు, మధుమేహం అదుపులో ఉంటాయి.
• ప్రతిరోజూ ఉదయం లేదా సాయంత్రం ప్రశాంతమైన వాతావరణంలో నడవడం వల్ల ఒత్తిడి తగ్గి, మానసిక ప్రశాంతత లభిస్తుంది.

జిమ్‌లకు వెళ్లి వేల రూపాయలు ఖర్చు పెట్టే కంటే, రోజుకు ఒక గంట సమయం కేటాయించి నడకను అలవాటు చేసుకుంటే ఆయుష్షుతో పాటు అద్భుతమైన ఆరోగ్యం మీ సొంతమవుతుంది.