తిరుపతిలో ఉద్రిక్తత నెలకొంది. స్టైఫండ్ ఇవ్వాలంటూ అలిపిరి దగ్గర పారా మెడికల్ విద్యార్థులు శనివారం (సెప్టెంబర్ 12) రోడ్డుపై బైఠాయించారు. ట్రాఫిక్కు అంతరాయం కలిగిస్తున్నారన్న కారణంతో పోలీసులు విద్యార్థులను అడ్డుకున్నారు. ఈ క్రమంలో పోలీసులతో విద్యార్థులు వాగ్వాదానికి దిగారు. దీంతో విద్యార్థులు, విద్యార్థి సంఘం లీడర్లను పోలీసులు అరెస్ట్ చేసి తిరుపతి వెస్ట్ పోలీస్ స్టేషన్కు తరలించారు.
పోలీసులు తమతో దురుసుగా ప్రవర్తించారని.. కొందరు యువతులను జట్టు పట్టుకుని ఈడ్చారని విద్యార్థులు ఆరోపించారు. నిరసన వ్యక్తం చేస్తోన్న విద్యార్థుల పట్ల పోలీసులు దురుసుగా ప్రవర్తించిన వీడియోలు సోషల్ మీడియాలో వైరల్గా మారాయి. పోలీసుల తీరుపై నెటిజన్లు ఆగ్రహం వ్యక్తం చేస్తున్నారు.