ఈరోజుల్లో చాలామందికి రాత్రివేళ చిన్న లైటు అయినా లేకపోతే నిద్రపట్టదు, చీకటి అంటే భయంతో లైట్లు వేసుకునే పడుకుంటారు. కానీ ఆరోగ్య నిపుణులు, వైద్యులు మాత్రం ఇది గుండెకు అస్సలు మంచిది కాదని హెచ్చరిస్తున్నారు. రాత్రి పడుకునేటప్పుడు గదిలో చిన్న వెలుతురు ఉన్నా అది మన గుండె పనితీరుపై తీవ్ర ప్రభావం చూపుతుందట. మరి ఇందులో ఏది నిజం? మన గుండె భద్రంగా ఉండాలంటే ఎలాంటి వాతావరణంలో నిద్రపోవాలో ఇప్పుడు వివరంగా తెలుసుకుందాం..
వెలుతురులో నిద్రపోతే గుండెకు విశ్రాంతి ఉండదా?: మనం నిద్రపోతున్నప్పుడు శరీరం మరియు గుండె తమను తాము రీఛార్జ్ చేసుకుంటాయి. అయితే గదిలో టీవీలు, ఫోన్లు లేదా నైట్ లాంప్ల నుంచి వచ్చే చిన్నపాటి వెలుతురు ఉన్నా మెదడు దానిని పగలుగానే భావిస్తుంది. ఇక దీనివల్ల నిద్రపోతున్నప్పటికీ గుండె కండరాలు, రక్తనాళాలు పూర్తిస్థాయిలో విశ్రాంతి తీసుకోలేవు.
బ్లడ్ ప్రెజర్ పెరిగే ప్రమాదం: రాత్రివేళ లైట్ల వెలుతురులో నిద్రపోవడం వల్ల శరీరంలో ఒత్తిడిని పెంచే హార్మోన్లు విడుదలవుతాయి. ఇది రక్తపోటు (బీపీ) పెరగడానికి కారణమవుతుంది. క్రమంగా ఈ అలవాటు గుండెను బలహీనపరిచి, దీర్ఘకాలంలో తీవ్రమైన గుండె సంబంధిత సమస్యలు లేదా హృద్రోగాలు వచ్చే ప్రమాదాన్ని పెంచుతుందని వైద్యులు చెబుతున్నారు.
చిమ్మ చీకటే ఆరోగ్యానికి మేలు: మన శరీరంలో నిద్రను ప్రేరేపించే ‘మెలటోనిన్’ అనే హార్మోన్ కేవలం పూర్తి చీకట్లోనే ఎక్కువగా ఉత్పత్తి అవుతుంది. రాత్రివేళ లైట్లన్నీ ఆర్పేసి చిమ్మ చీకటిలో పడుకోవడం వల్ల ప్రశాంతమైన లోతైన నిద్ర పడుతుంది. ఇక ఇది గుండె స్పందనలను క్రమబద్ధీకరించి, గుండె ఆరోగ్యాన్ని పదిలంగా ఉంచుతుంది.
ఇక చీకట్లో పడుకుంటే భయమేస్తుందనే భావనను పక్కనబెట్టి, గుండె ఆరోగ్యం కోసం రాత్రివేళ లైట్లన్నీ ఆర్పేసి నిద్రపోవడం అలవాటు చేసుకోవాలి. ఇక ప్రశాంతమైన గాఢ నిద్ర మాత్రమే మన గుండెకు సరైన విశ్రాంతిని, బలాన్ని ఇస్తుంది.
గమనిక: మీకు చీకటి భయం ఉంటే నైట్ లైట్లను నేరుగా ముఖంపై పడకుండా మంచం కింద లేదా దూరంగా అమర్చుకోవచ్చు. అలాగే నిద్రపోయే కనీసం అర గంట ముందే మొబైల్ ఫోన్లు, టీవీ స్క్రీన్లను చూడటం ఆపివేయడం శ్రేయస్కరం.
The post మీకు తెలుసా ? గుండె ఆరోగ్యంగా ఉండాలంటే రాత్రి లైట్లు ఆర్పేసి నిద్రపోవాలి. appeared first on Manalokam – Latest Telugu News & Updates.