Ethara AI: యువ పారిశ్రామికవేత్త మహానార్యమన్ సింధియా తన అమెరికా పర్యటనలో భాగంగా సీటెల్లోని అమెజాన్ ప్రధాన కార్యాలయాన్ని సందర్శించారు. ఈ సందర్భంగా ఆయన స్థాపించిన సాంకేతిక స్టార్టప్ ‘ఇథారా ఏఐ’, ప్రపంచ ప్రఖ్యాత క్లౌడ్ సేవల సంస్థ అమెజాన్ వెబ్ సర్వీసెస్ మధ్య ఒక చారిత్రాత్మక ఒప్పందం కుదిరింది. మహానార్యమన్ సింధియాతో పాటు ఆయన సహ వ్యవస్థాపకుడు సూర్యాంశ్ రాణా, అమెజాన్ ప్రతినిధులతో కలిసి భవిష్యత్తులో కృత్రిమ మేధ వ్యవస్థల అభివృద్ధిపై లోతైన చర్చలు జరిపారు.
భారత్లో అత్యాధునిక మౌలిక సదుపాయాలు..
ఈ భాగస్వామ్యం ద్వారా తదుపరి తరం ఇంటెలిజెంట్ ఏజెంట్స్ను బలోపేతం చేసేందుకు అవసరమైన మౌలిక సదుపాయాలు, శిక్షణ వ్యవస్థలను భారత్లోనే నిర్మించనున్నారు. కేవలం సాంకేతికతను వినియోగించుకోవడమే కాకుండా, వినూత్నమైన ఆవిష్కరణలకు భారత్ వేదిక కావాలన్నదే ఈ ప్రాజెక్టు ప్రధాన ఉద్దేశం. దీనివల్ల దేశీయంగా సాంకేతిక నైపుణ్యం పెరగడమే కాకుండా, అనేక మంది యువతకు ఉపాధి అవకాశాలు లభించే అవకాశం ఉంది.
ఏజెంటిక్ ఏఐ, అటానమస్ సిస్టమ్స్..
ప్రస్తుతం ప్రపంచవ్యాప్తంగా చర్చనీయాంశమైన ‘ఏజెంటిక్ ఏఐ’ భవిష్యత్తుపై ఈ రెండు సంస్థలు ప్రత్యేక దృష్టి సారించాయి. వ్యాపార రంగంలో ప్రస్తుతం ఉన్న పాత పద్ధతుల స్థానంలో స్వయంప్రతిపత్తితో పనిచేసే మేధో వ్యవస్థలను తీసుకురావడానికి ఇవి కృషి చేస్తాయి. అంటే, మనుషుల ప్రమేయం తక్కువగా ఉంటూనే, క్లిష్టమైన పనులను అత్యంత కచ్చితత్వంతో పూర్తి చేసే సామర్థ్యం ఈ కొత్త వ్యవస్థలకు ఉంటుంది. దీని కోసం ప్రత్యేకమైన శిక్షణ పద్ధతులను (రీఇన్ఫోర్స్మెంట్ లెర్నింగ్) అభివృద్ధి చేయనున్నారు.
భారత్ – ఏఐ ప్రపంచ కేంద్రం..
ఈ సందర్భంగా మహానార్యమన్ సింధియా మాట్లాడుతూ, భారతీయులు కృత్రిమ మేధను అత్యధికంగా వినియోగిస్తున్నారని, కాబట్టి దాని నిర్మాణ కేంద్రం కూడా భారత్ కావాలని ఆకాంక్షించారు. విదేశీ సాంకేతికతపై ఆధారపడకుండా, స్వదేశీ పరిజ్ఞానంతో ప్రపంచ స్థాయి ఉత్పత్తులను అందించడమే తన లక్ష్యమని ఆయన స్పష్టం చేశారు. ఈ ఒప్పందం ద్వారా భారత్ గ్లోబల్ టెక్నాలజీ పటంలో మరింత బలమైన స్థానాన్ని సంపాదించుకోనుంది.
మరిన్ని క్రికెట్ వార్తల కోసం ఇక్కడ చూడండి..