చిన్నారుల్లో స్క్రీన్ టైం ప్రభావం.. తాజా అధ్యయనంలో వెల్లడి

నేటి డిజిటల్ యుగంలో పిల్లల చేతిలో ఫోన్ లేనిదే ముద్ద దిగడం లేదు. అయితే, ఈ అలవాటు వారి ఎదుగుదలపై పెను ప్రభావం చూపుతోందని రాజస్థాన్‌లోని ఎస్ఎమ్ఎస్ (SMS) ఆసుపత్రి తాజా అధ్యయనం హెచ్చరిస్తోంది. అధికంగా మొబైల్ చూడటం వల్ల పిల్లల్లో ఏకాగ్రత దెబ్బతినడమే కాకుండా, ప్రవర్తనలో కూడా అనూహ్య మార్పులు వస్తున్నాయని ఈ పరిశోధనలో తేలింది. అసలు ఆ రిపోర్ట్ ఏం చెబుతుందో ఇప్పుడు వివరంగా చూద్దాం.

గంటల తరబడి ఫోన్‌తోనే లోకం: రాజస్థాన్‌లోని నిపుణులు 10 నుండి 16 ఏళ్ల వయస్సు గల పిల్లలపై ఈ అధ్యయనం చేశారు. ఇందులో షాకింగ్ విషయమేమిటంటే.. దాదాపు 72% మంది పిల్లలు రోజుకు 6 నుండి 7 గంటల పాటు మొబైల్ స్క్రీన్‌లకే అతుక్కుపోతున్నారు. స్కూల్ అయిపోయాక ఆటపాటలు మరిచిపోయి, డిజిటల్ లోకంలోనే గడుపుతున్నారని ఈ సర్వే స్పష్టం చేస్తోంది.

ఏకాగ్రత మాయం.. చదువులో వెనుకబాటు: ఎక్కువ సేపు స్క్రీన్ చూడటం వల్ల దాదాపు 60% మంది పిల్లల్లో ఏకాగ్రత లోపించినట్లు వైద్యులు గుర్తించారు. దీనివల్ల వారు చదువుపై దృష్టి పెట్టలేకపోవడం, చెప్పిన విషయాలను త్వరగా మర్చిపోవడం వంటి సమస్యలు ఎదుర్కొంటున్నారు. ఇక కేవలం వినోదం కోసం చూసే వీడియోలు వారి ఆలోచనా శక్తిని నెమ్మదింపజేస్తున్నాయని ఈ అధ్యయనం వివరిస్తోంది.

పెరిగిపోతున్న చిరాకు, కోపం: స్క్రీన్ టైం కేవలం కళ్లకే కాదు, మెదడుకు కూడా అలసట కలిగిస్తుంది. అధ్యయనంలో పాల్గొన్న వారిలో 48% మంది పిల్లల్లో విపరీతమైన చిరాకు, మొండితనం పెరిగినట్లు తేలింది. ఫోన్ లాక్కున్నా లేదా నెట్ స్లో అయినా వారు వెంటనే అసహనానికి గురవుతున్నారు.ఇక  ఇది వారిని సమాజానికి దూరం చేసి, ఒంటరితనంలోకి నెట్టే ప్రమాదం ఉందని నిపుణులు హెచ్చరిస్తున్నారు.

నిద్రలేమి సమస్యలు: సెల్ ఫోన్ల నుండి వచ్చే ‘బ్లూ లైట్’ పిల్లల నిద్రపై తీవ్ర ప్రభావం చూపుతోంది. ఈ అధ్యయనం ప్రకారం, రాత్రి వేళల్లో కూడా ఫోన్లు వాడటం వల్ల పిల్లలు సరిగ్గా నిద్రపోవడం లేదు. నిద్ర సరిగ్గా లేకపోతే శారీరక ఎదుగుదల ఆగడమే కాకుండా, మానసిక ఒత్తిడి కూడా పెరుగుతుంది. ఇక అందుకే పిల్లల స్క్రీన్ టైం విషయంలో పేరెంట్స్ అలర్ట్ అవ్వాల్సిన సమయం ఆసన్నమైంది.

టెక్నాలజీ అవసరమే కానీ, అది మన పిల్లల బాల్యాన్ని మింగేయకూడదు. స్క్రీన్ టైం తగ్గించి, వారిని బయట ఆడుకునేలా ప్రోత్సహించడం తల్లిదండ్రులుగా మన బాధ్యత. వారి భవిష్యత్తు మన చేతుల్లోనే ఉంది!

గమనిక: మీ పిల్లలు రోజుకు 2 గంటల కంటే ఎక్కువ సమయం ఫోన్ వాడుతుంటే, నెమ్మదిగా ఆ సమయాన్ని తగ్గించే ప్రయత్నం చేయండి. పడుకోవడానికి గంట ముందే ఫోన్లను పక్కన పెట్టేలా జాగ్రత్త పడండి.

The post చిన్నారుల్లో స్క్రీన్ టైం ప్రభావం.. తాజా అధ్యయనంలో వెల్లడి appeared first on Manalokam – Latest Telugu News & Updates.