ప్రస్తుతం ఆమ్స్టర్డామ్లోని ‘ఆర్ట్ జూ’ మ్యూజియంలో ప్రదర్శనకు ఉంచిన ఈ టీల్ రంగు హ్యాండ్బ్యాగ్, ఫ్యాషన్ ప్రియులను అమితంగా ఆకర్షిస్తోంది. ఒక శిల మీద, బోనులో ఉంచబడిన ఈ బ్యాగ్ వెనుక ఒక భారీ టి-రెక్స్ నమూనాను ఏర్పాటు చేసి, గతానికి, వర్తమానానికి ఉన్న సంబంధాన్ని అద్భుతంగా ఆవిష్కరించారు. మే 11వ తేదీ వరకు సందర్శకులకు అందుబాటులో ఉండే ఈ బ్యాగ్ను ఆ తర్వాత వేలం వేయనున్నారు. దీని ప్రారంభ ధర సుమారు 5 లక్షల డాలర్లు అంటే మన భారతీయ కరెన్సీలో దాదాపు 5 కోట్ల రూపాయల పైనే ఉంటుందని అంచనా వేస్తున్నారు. జంతువులను చంపకుండా, ల్యాబ్లో పెంచిన కొల్లాజెన్ను డైనోసార్ శిలాజాలతో అనుసంధానించి ఈ అరుదైన ఫ్యాషన్ వస్తువును సృష్టించారు. ఈ అద్భుత సృష్టి వెనుక ఉన్న మరిన్ని ఆసక్తికరమైన సైన్స్ విశేషాలను తెలుసుకుందాం..
ఎవరు, ఎలా తయారు చేశారు?
ప్రముఖ ఫ్యాషన్ లేబుల్ ‘ఎన్ఫిన్ లెవ్’ (Enfin Leve) ఈ బ్యాగ్ను రూపొందించింది. దీనికి స్టిర్లింగ్ సిల్వర్ మరియు బ్లాక్ డైమండ్స్తో మెరుగులు దిద్దారు. విఎమ్ఎల్ (VML), ది ఆర్గానాయిడ్ కంపెనీ మరియు ల్యాబ్-గ్రోన్ లెదర్ లిమిటెడ్ శాస్త్రవేత్తలు కలిసి ఈ పదార్థాన్ని అభివృద్ధి చేశారు. అమెరికాలో లభించిన టి-రెక్స్ అవశేషాల్లోని కొల్లాజెన్ భాగాలను సేకరించి, వాటిలోని లోపాలను సరిదిద్ది పూర్తిస్థాయి కొల్లాజెన్ నిర్మాణాన్ని పునర్నిర్మించారు. దీనిని హోస్ట్ కణాలలో ఉంచి కొత్త కొల్లాజెన్ను ఉత్పత్తి చేసి, ఆపై దానిని చర్మం వలె మార్చారు.
సాంకేతిక పరిజ్ఞానం
“ఇది కేవలం పర్యావరణ హితమైన చర్మం మాత్రమే కాదు, ఇదొక టెక్నాలజీ అప్గ్రేడ్” అని ల్యాబ్-గ్రోన్ లెదర్ లిమిటెడ్ ప్రతినిధి చె కానన్ పేర్కొన్నారు. ఈ బృందం గతంలో ఉన్ని మముత్ డిఎన్ఏ, గొర్రె కణాలను కలిపి ఒక భారీ మీట్బాల్ను కూడా సృష్టించి వార్తల్లో నిలిచింది. డైనోసార్ వంటి పురాతన జీవుల జీవశాస్త్రాన్ని నేటి ఫ్యాషన్ అవసరాలకు వాడుకోవడం ద్వారా విజ్ఞాన శాస్త్రం సరిహద్దులను చెరిపివేస్తోంది.
ఫ్యాషన్ రంగంలో సరికొత్త శకం
ల్యాబ్లో తయారయ్యే ఇటువంటి పదార్థాలు భవిష్యత్తులో జంతువుల హింసను తగ్గించడమే కాకుండా, ఊహించని రీతిలో కొత్త డిజైన్లకు ప్రాణం పోస్తాయని నిపుణులు భావిస్తున్నారు. సుమారు 10 బై 15 సెంటీమీటర్ల పరిమాణం ఉన్న ఈ మెటీరియల్ నమూనా ధరనే పది లక్షల రూపాయల పైనే ఉండటం దీని క్రేజ్ను తెలియజేస్తోంది. సైన్స్ పురోగతి వల్ల రాబోయే రోజుల్లో ఫ్యాషన్ రంగం ఇంకెన్ని వింతలను చూడనుందో వేచి చూడాలి.