పెద్దపల్లి: తెలంగాణలో గత పాలనలో జరిగిన అక్రమాలు, అరాచకాలను ప్రజల ముందుకు తీసుకురావడమే లక్ష్యంగా తాము సిద్దిపేటకు బయలుదేరుతున్నామని పెద్దపల్లి ఎంపీ గడ్డం వంశీకృష్ణ తెలిపారు. కాంగ్రెస్ నాయకత్వం ఆదేశాల మేరకు ఎంపీలు, ఎమ్మెల్సీలు కలిసి సిద్దిపేటకు వెళ్తున్నట్లు ఆయన తెలిపారు.
ఈ సందర్భంగా ఎంపీ వంశీకృష్ణ మాట్లాడుతూ.. తెలంగాణలో కల్వకుంట్ల కుటుంబం పాలనలో జరిగినట్లు తాము ఆరోపిస్తున్న దోపిడీ, అక్రమాలు, అవినీతి అంశాలను ప్రజల ముందు ఉంచేందుకు సిద్దిపేటకు వెళ్తున్నామని అన్నారు. మాజీ పాలక కుటుంబం ప్రజల సొమ్మును అక్రమంగా దోచుకుందని వంశీకృష్ణ ఆరోపించారు. తెలంగాణ ప్రజలు “నీళ్లు, నిధులు, నియామకాలు” కోసం ఎన్నో త్యాగాలు చేసి రాష్ట్రాన్ని సాధించుకున్నారని, అయితే గత పాలనలో భూకబ్జాలు, అక్రమ దందాల ద్వారా కల్వకుంట్ల కుటుంబం లబ్ధి పొందిందని విమర్శించారు.
తెలంగాణ రాష్ట్ర ఏర్పాటు వెనుక ఉన్న ప్రజల ఆకాంక్షలకు అనుగుణంగా పాలన సాగలేదని ఆయన ఆరోపించారు. గత ప్రభుత్వ హయాంలో జరిగినట్లు తాము చెబుతున్న అక్రమాలు, అవకతవకల వివరాలను సిద్దిపేటలో వెల్లడిస్తామని తెలిపారు.
అలాగే మాజీ మంత్రి కేటీఆర్పై కూడా ఎంపీ వంశీకృష్ణ విమర్శలు చేశారు. పదేళ్ల పాటు ఐటీ శాఖ మంత్రిగా పనిచేసినప్పటికీ తెలంగాణ యువతకు తగిన స్థాయిలో ఉద్యోగ అవకాశాలు కల్పించలేదని ఆయన ఆరోపించారు. సిద్దిపేట పర్యటనలో గత పాలనకు సంబంధించిన పలు అంశాలను ప్రజల దృష్టికి తీసుకురానున్నట్లు ఎంపీ వంశీకృష్ణ తెలిపారు.