మెనోపాజ్ ప్రభావం తగ్గాలంటే.. ఇప్పటి నుంచే ఇలా చేయండి!

మహిళల జీవితంలో ‘మెనోపాజ్’ అనేది ఒక ముఖ్యమైన దశ. అయితే ఈ సమయంలో కేవలం హార్మోన్లలోనే కాదు, శరీర జీవక్రియల్లో కూడా ఎన్నో మార్పులు వస్తాయి. పొట్ట దగ్గర కొవ్వు పెరగడం, ఒక్కసారిగా బీపీ ఎగబాకడం వంటి సమస్యలు ఎదురవుతాయి. ఈ మార్పుల వల్ల గుండె జబ్బుల ముప్పు కూడా పెరుగుతుంది. మరి ఈ మెనోపాజ్ ప్రభావాన్ని సహజ పద్ధతుల్లో ఎలా తగ్గించుకోవాలో ఇక్కడ తెలుసుకుందాం.

శరీరంపై మెనోపాజ్ చూపే ప్రభావం: మెనోపాజ్ దశకు వచ్చేసరికి మహిళల్లో ఈస్ట్రోజన్ హార్మోన్ విడుదల తగ్గుతుంది. నిజానికి ఈ హార్మోన్ మహిళల గుండెకు ఒక సహజ రక్షణ కవచంలా పనిచేస్తుంది. ఇది రక్తనాళాలు చురుగ్గా కదిలేలా చేసి, రక్త ప్రసరణను సాఫీగా ఉంచుతుంది. ఇక ఎప్పుడైతే ఈస్ట్రోజన్ తగ్గుతుందో, అప్పుడు రక్తనాళాల్లో బిగుతు పెరిగి వాపు వస్తుంది. ఇక దీనివల్ల 40ల చివర్లో లేదా 50ల ఆరంభంలో అప్పటివరకు నార్మల్‌గా ఉన్న బీపీ ఒక్కసారిగా పెరిగిపోతుంది.

జీవక్రియల్లో వచ్చే మార్పులు ఇవే: ఈ దశలో కేవలం బీపీ మాత్రమే కాదు.. పొట్ట దగ్గర కొవ్వు పేరుకుపోవడం, ఇన్సులిన్ నిరోధం మరియు శరీరంలో కొలెస్ట్రాల్ స్థాయులు పెరగడం వంటి తీవ్రమైన మార్పులు జరుగుతాయి. ఇక వీటన్నిటి కారణంగా గుండె జబ్బులు వచ్చే ప్రమాదం చాలా ఎక్కువగా ఉంటుంది. ఈ సమస్యల నివారణకు ‘హార్మోన్ రిప్లేస్‌మెంట్ థెరపీ’ లాంటి వైద్య విధానాలు ఉన్నప్పటికీ వాటి వల్ల కొన్ని అదనపు సైడ్ ఎఫెక్ట్స్ వచ్చే అవకాశం ఉందని నిపుణులు చెబుతున్నారు.

అలవాట్లను మార్చుకుంటే అన్నీ కంట్రోల్: మెనోపాజ్ వల్ల వచ్చే ఇబ్బందులను తగ్గించుకోవడానికి, అలాగే ఈ లక్షణాలను వీలైనంత ఆలస్యం చేయడానికి సహజమైన పద్ధతులే ఉత్తమమైనవి. మీ రోజువారీ ఆహారంలో ఉప్పును బాగా తగ్గించాలి. ఇక ప్రతిరోజూ కాసేపు శారీరక శ్రమ లేదా వ్యాయామం చేయడం అలవాటు చేసుకోవాలి. శరీర బరువు ఎల్లప్పుడూ నియంత్రణలో ఉండేలా చూసుకోవాలి. వీటన్నిటితో పాటు రోజుకు తగినన్ని గంటలు ప్రశాంతంగా నిద్రపోవడం చాలా అవసరం.

ఇక మెనోపాజ్ అనేది ప్రతి మహిళా ఎదుర్కొనే సహజమైన ప్రక్రియే అయినప్పటికీ, సరైన జీవనశైలి మార్పుల ద్వారా దీని వల్ల వచ్చే ఆరోగ్య సమస్యలను సులభంగా జయించవచ్చు. ఇప్పటి నుంచే మంచి అలవాట్లను అలవర్చుకుంటే మెనోపాజ్ దశలోనూ ఆరోగ్యంగా, ఆనందంగా ఉండవచ్చు.

గమనిక: మెనోపాజ్ దశకు దగ్గరగా ఉన్న మహిళలు 40 ఏళ్లు దాటిన వారు తరచూ తమ బ్లడ్ ప్రెజర్ ని చెక్ చేసుకోవడం చాలా ముఖ్యం. ఇక ఏవైనా తీవ్రమైన హెల్త్ చేంజెస్ కనిపిస్తే వెంటనే డాక్టర్‌ను సంప్రదించి తగిన సలహాలు తీసుకోవడం మంచిది.

The post మెనోపాజ్ ప్రభావం తగ్గాలంటే.. ఇప్పటి నుంచే ఇలా చేయండి! appeared first on Manalokam – Latest Telugu News & Updates.