హిందూ పురాణాల్లో హనుమంతుడికి ఉన్న క్రేజ్ అంతా ఇంతా కాదు. చిన్నపిల్లల నుంచి పెద్దవాళ్ల దాకా అందరికీ ఆంజనేయుడంటే ఎంతో ఇష్టం. అయితే, కేవలం లంకను తగలబెట్టడం, సంజీవని పర్వతం తేవడమే కాకుండా, స్వామి గురించి మనకు తెలియని ఎన్నో అద్భుతమైన కథలు ఉన్నాయి. చదువుతుంటేనే భలే వింతగా అనిపించే ఆ విషయాలేంటో ఇప్పుడు చూద్దాం.
హనుమంతుడి అసలు పేరు ఏంటి?: మనం ఆయన్ను హనుమంతుడు అని పిలుస్తాం కానీ, అది ఆయనకు పుట్టుకతో వచ్చిన పేరు కాదు. సంస్కృతంలో ‘హను’ అంటే దవడ, ‘మాన్’ అంటే విరిగిపోయినది అని అర్థం. చిన్నప్పుడు సూర్యుడిని పండు అనుకుని మింగడానికి వెళ్లినప్పుడు, ఇంద్రుడు వేసిన వజ్రాయుధం తగిలి ఆయన దవడ విరిగిపోతుంది. ఇక ఆ సంఘటన తర్వాతే ఆయనకు హనుమంతుడు అనే పేరు వచ్చింది. ఆయన అసలు పేరు ‘మారుతి’.
శివుడి పదకొండో అవతారం: చాలా మంది హనుమంతుడిని కేవలం వానర రాజుగానే చూస్తారు. కానీ, ఆయన సాక్షాత్తూ ఆ పరమశివుడి అంశతో జన్మించారు. ఇక శివుడికి ఉన్న 11 రుద్ర అవతారాలలో హనుమంతుడు పదకొండో అవతారంగా పురాణాలు చెబుతున్నాయి. రావణాసురుడిని అంతం చేయడంలో శ్రీరాముడికి అంటే విష్ణుమూర్తికి సహాయం చేయడానికి శివుడే ఈ రూపంలో భూమిపైకి వచ్చారు.
హనుమంతుడు రాసిన రామాయణం: రామాయణాన్ని మొదట రాసింది వాల్మీకి మహర్షి అని మనకు తెలుసు. కానీ, వాల్మీకి కంటే ముందే హనుమంతుడు హిమాలయాల్లోని బండరాళ్లపై తన గోళ్లతో రామాయణాన్ని చెక్కారు. దీనిని ‘హనుమద్ రామాయణం’ అంటారు. అయితే, వాల్మీకి రాసిన రామాయణం కంటే హనుమంతుడి రచన ఎంతో అద్భుతంగా ఉండటంతో, వాల్మీకి బాధపడకూడదని ఆంజనేయుడు తన రామాయణాన్ని సముద్రంలో కలిపేశారు అని పురాణాలూ చెబుతున్నాయి.
శాపంతో మరిచిపోయిన శక్తులు: హనుమంతుడికి చిన్న వయసులోనే ఎన్నో అద్భుతమైన శక్తులు ఉండేవి. అయితే ఆ శక్తులతో ఆయన మునులను, ఋషులను ఆటపట్టించేవారు. దాంతో కోపగించిన మునులు, “ఎవరైనా నీ శక్తులను నీకు గుర్తుచేసే వరకు నువ్వు వాటిని మర్చిపోతావు” అని శపించారు. అందుకే సీతాదేవిని వెతికే క్రమంలో సముద్రాన్ని దాటాల్సి వచ్చినప్పుడు జాంబవంతుడు గుర్తుచేసే వరకు స్వామికి తన బలం గుర్తుకు రాలేదు.
చిరంజీవిగా ఇప్పటికీ మన మధ్యే: హిందూ పురాణాల ప్రకారం ఈ భూమిపై ఏడుగురు చిరంజీవులు (మరణం లేనివారు) ఉన్నారు. వారిలో హనుమంతుడు ఒకరు. త్రేతాయుగంలో రాముడికి సేవ చేసిన స్వామి, ద్వాపరయుగంలో మహాభారత యుద్ధంలో అర్జునుడి రథం జెండాపై ఉండి పాండవులను రక్షించారు. కలియుగంలో కూడా ఎక్కడ రామనామం వినిపిస్తే అక్కడ హనుమంతుడు సూక్ష్మ రూపంలో ఉంటారని నమ్ముతారు.
ఇక బజరంగబలి జీవితం కేవలం శక్తులకు మాత్రమే కాదు, అంకితభావానికి, బుద్ధిబలానికి ఒక నిదర్శనం. శక్తి ఉండి కూడా ఎలా ఒదిగి ఉండాలో ఆయనను చూసే నేర్చుకోవాలి. మనకు ఎంతో ఇష్టమైన హనుమన్న గురించి ఈ విషయాలు తెలుసుకోవడం నిజంగా ఒక గొప్ప అనుభూతి.
గమనిక: ఈ సమాచారం వివిధ పురాణాలు, గ్రంథాలు మరియు ఇంటర్నెట్లో అందుబాటులో ఉన్న కథనాల ఆధారంగా సేకరించబడింది. ఇవి కేవలం మీ అవగాహన, ఆసక్తి కోసం మాత్రమే అందించడం జరిగింది.
The post హనుమంతుడి గురించి ఈ విషయాలు 90% మందికి తెలియవు! appeared first on Manalokam – Latest Telugu News & Updates.