తాండూరు, వెలుగు: వికారాబాద్ జిల్లా తాండూరుకు చెందిన నిఖిత్ శెట్టి (22) ప్రపంచంలోనే అత్యంత ఎత్తైన మోటార్ రహదారి అయిన ఉమ్లింగ్ లా పాస్ను చేరుకుని గిన్నిస్ వరల్డ్ రికార్డు సాధించాడు. నిఖిత్ తాండూరులోని గౌతమ్ మోడల్ స్కూల్లో చదువుకుని, హైదరాబాద్లో బీటెక్ పూర్తి చేస్తున్నాడు. చదువుతో పాటు యూట్యూబ్ చానల్ నడుపుతూ బైక్ రైడింగ్ చేసేవాడు. గత నెల ఏప్రిల్ 12న హైదరాబాద్లోని తాడ్బాన్ హనుమాన్ దేవాలయం నుంచి తన ప్రయాణాన్ని ప్రారంభించి, 28న 19,024 అడుగుల (5,798 మీటర్లు) ఎత్తులో ఉన్న ఉమ్లింగ్ లా పాస్ను విజయవంతంగా చేరుకుని ఈ ఘనత సాధించాడు.