Curd Rice Recipe: వేసవిలో ఏది తిందామన్నా రుచించదు.. తీవ్రమైన ఎండలతో ద్రవ పదార్థాలు తీసుకున్నంత సులవుగా గణ పదార్థాలు తీసుకోలేని పరిస్థితి.. అయితే, వేసవి కాలంలో తీవ్ర ఎండలు, వడదెబ్బల నుంచి రక్షణ పొందేందుకు సరైన ఆహారం తీసుకోవడం చాలా ముఖ్యం. ఈ సమయంలో తేలికగా, చల్లగా, సులభంగా జీర్ణమయ్యే ఆహారం కోసం చూస్తుంటే పెరుగన్నం (పెరుగు అన్నం) ఉత్తమమైన ఎంపికగా నిలుస్తుంది. దక్షిణ భారతదేశంలో ఎంతో ప్రాచుర్యం పొందిన ఈ వంటకం రుచికరంగా ఉండటమే కాకుండా, శరీరాన్ని చల్లబరచి జీర్ణవ్యవస్థకు మేలు చేస్తుంది.
పెరుగులో ఉండే ప్రోబయోటిక్స్ జీర్ణక్రియను మెరుగుపరుస్తాయి. అలాగే, వేసవిలో శరీరానికి అవసరమైన తేమను నిలుపుకోవడంలో కూడా ఇది సహాయపడుతుంది. రోజంతా శక్తివంతంగా ఉండేందుకు పెరుగన్నం ఎంతో ఉపయోగపడుతుంది. ముఖ్యంగా, తక్కువ సమయంలో సులభంగా తయారు చేసుకోవచ్చు.
కావలసిన పదార్థాలు
* ఒక కప్పు వండిన అన్నం
* ఒక కప్పు తాజా పెరుగు
* 3 టేబుల్ స్పూన్లు నూనె
* 5 పచ్చిమిర్చి (సన్నగా తరిగినవి)
* అరచిన్న అల్లం ముక్క (తరిగినది)
* ఒక టేబుల్ స్పూన్ కొత్తిమీర
* ఒక టేబుల్ స్పూన్ ఆవాలు
* 3 టేబుల్ స్పూన్లు శనగపప్పు
* చిటికెడు ఇంగువ
* 5-6 కరివేపాకు ఆకులు
* 2 ఎండుమిర్చి
* తగినంత ఉప్పు
తయారీ విధానం
ముందుగా ఒక పెద్ద గిన్నెలో తాజా పెరుగు తీసుకుని, ఉండలు లేకుండా బాగా గిలకొట్టాలి. తరువాత వండిన అన్నాన్ని అందులో వేసి బాగా కలపాలి. అన్నం గట్టిగా ఉంటే చేతులతో మెత్తగా చేసి కలపడం మంచిది. తర్వాత పచ్చిమిర్చి, అల్లం, కొత్తిమీర, ఉప్పు వేసి మిశ్రమాన్ని బాగా కలపాలి. ఇప్పుడు ఒక బాణలిలో నూనె వేడి చేసి, ఆవాలు, శనగపప్పు, ఎండుమిర్చి, ఇంగువ, కరివేపాకు వేసి తాలింపు సిద్ధం చేయాలి. ఈ తాలింపును పెరుగు అన్నం మీద పోసి బాగా కలపాలి. ఇలా సిద్ధమైన పెరుగన్నాన్ని వెంటనే వడ్డించవచ్చు. మరింత చల్లగా తినాలనుకుంటే కొద్దిసేపు ఫ్రిజ్లో ఉంచి సర్వ్ చేయవచ్చు. దీన్ని మామిడి ఊరగాయ లేదా పాపడ్తో కలిపి తింటే రుచి మరింత పెరుగుతుంది. వేసవిలో ఆరోగ్యంగా, చల్లగా ఉండాలంటే పెరుగన్నం మీ భోజనంలో తప్పనిసరిగా చేర్చుకోండి.