ఉత్తర ప్రదేశ్లో తీవ్ర విషాదం చోటు చేసుకుంది. సోషల్ మీడియా రీల్స్ తీస్తుండగా ఐదుగురు స్నేహితులు నదిలో మునిగిపోయారు. గోరఖ్పూర్ జిల్లా రాప్తి నదిలోని మీర్జాపూర్ ఘాట్ వద్ద ఈ ఘటన జరిగింది. ఐదుగురు విద్యార్థులు గల్లంతయ్యారు. నలుగురు నీట మునిగి ప్రాణాలు కోల్పోగా, ఒకరు సురక్షితంగా ఒడ్డుకు చేరుకున్నాడు. నలుగురు స్నేహితుల మృతదేహాలను పోలీసులు వెలికితీశారు. శుక్రవారం (ఏప్రిల్ 03) ఉదయం ముగ్గురు టీనేజర్ల మృతదేహాలు నదిలో తేలుతూ కనిపించడంతో ఆ ప్రాంతంలో కలకలం రేగింది.
ఈ సంఘటన బుధవారం మధ్యాహ్నం 3:30 గంటల ప్రాంతంలో జరిగింది. రాణిదిహా సమీప ప్రాంతాలకు చెందిన ఐదుగురు స్నేహితులు, అమన్ అలియాస్ బీరు (15), వివేక్ నిషాద్ (15), గగన్ పాశ్వాన్ (15), అనికేత్ యాదవ్ (13), వారి స్నేహితుడు రాజకరణ్ అలియాస్ టైమ్పాస్, తమ సైకిళ్లపై విన్యాసాలు చేస్తూ, వీడియోలు తీస్తూ మీర్జాపూర్ ఘాట్కు చేరుకున్నారు. వారందరికీ నదిలో స్నానం చేసి రీల్స్ చేయాలనిపించింది. ఆ ఉత్సాహంలో, ఆ ఐదుగురు స్నేహితులు లోతైన నీటిలోకి దిగి మునిగిపోవడం ప్రారంభించారు. ఇంతలో, రాజ్కరణ్, ధైర్యం కూడగట్టుకుని సురక్షితంగా ఈదుకుంటూ ఒడ్డుకు చేరుకున్నాడు.
రాజ్కరణ్ వెంటనే తన స్నేహితుల కుటుంబాలకు, పోలీసులకు సమాచారం అందించాడు. పోలీసులు సంఘటనా స్థలానికి చేరుకుని, ఘాట్ వద్ద నాలుగు సైకిళ్లు, పిల్లల బట్టలు, మొబైల్ ఫోన్లను కనుగొన్నారు. అధికారులు వెంటనే గాలింపు చర్యలు చేపట్టేందుకు ఎన్డిఆర్ఎఫ్, ఎస్డిఆర్ఎఫ్ బృందాలను రంగంలోకి దించారు. బుధవారం రాత్రి చీకటి పడే వరకు ఎలాంటి పురోగతి లభించలేదు. గురువారం సాయంత్రం, సంఘటనా స్థలానికి సుమారు 100 మీటర్ల దూరంలో వివేక్ నిషాద్ మృతదేహం లభ్యమైంది. ఆ తర్వాత, శుక్రవారం ఉదయం, మిగిలిన ముగ్గురు యువకులు (అమన్, గగన్, అనికేత్ మృతదేహాలు రాప్తి నదిలో తేలుతూ కనిపించాయి.
శుక్రవారం ఉదయం గజఈతగాళ్లు మూడు మృతదేహాలను బయటకు తీయగానే, వందలాది గ్రామస్తులు, కుటుంబ సభ్యుల రోదనలతో ఘాట్ వద్ద వాతావరణం విషాదభరితంగా మారింది. తమ పిల్లల మృతదేహాలను చూసి తల్లిదండ్రులు ఓదార్చలేని విధంగా విలపించారు. అక్కడున్న ప్రతిఒక్కరూ కన్నీరు పెట్టుకున్నారు. పోలీసులు నాలుగు మృతదేహాలను పోస్ట్మార్టం కోసం పంపారు. ఈ ఘటనకు సంబంధించి కేసు నమోదు చేసుకుని దర్యాప్తు చేపట్టారు.
మరిన్ని క్రైమ్ వార్తల కోసం ఇక్కడ క్లిక్ చేయండి.