బీహార్లోని విద్యార్థులు, తల్లిదండ్రులకు ఒక పెద్ద ఊరట లభించింది. స్టూడెంట్ క్రెడిట్ కార్డ్ స్కీమ్ కింద అందించే ఆర్థిక సహాయంపై వస్తున్న వదంతులకు ఎండ్కార్డ్ పడింది. ఈ స్కీమ్ కింద ప్రభుత్వం గరిష్ట రుణ పరిమితిని రూ.2 లక్షలకు తగ్గించిందంటూ కొన్ని వార్తలు జోరుగా ప్రచారమయ్యాయి. కానీ ఈ అంశంపై ప్రభుత్వం స్పష్టతనిస్తూ విద్యార్థులకు ముందులాగే రూ.4 లక్షల వరకు రుణం అందుతుందని తేల్చిచెప్పింది. యువత ఉన్నత చదువులకు ఆర్థిక ఇబ్బందులు ఎప్పటికీ అడ్డుకావని ప్రభుత్వం స్పష్టం చేసింది.
ఈ విషయంపై వస్తున్న తప్పుడు ప్రచారాలను నమ్మవద్దని బీహార్ ప్రభుత్వం సోషల్ మీడియా వేదికగా స్పష్టం చేసింది. విద్యార్థుల ఉజ్వల భవిష్యత్తు కోసం ఈ స్కీమ్ ఎలాంటి మార్పులు లేకుండా పాత పద్ధతిలోనే కొనసాగుతుందని పేర్కొంది. రాష్ట్ర యువతకు నాణ్యమైన ఉన్నత విద్యను అందించేందుకు ప్రభుత్వం కట్టుబడి ఉందని తెలిపింది. ఈ యోజన కోసం ఆర్థిక సంవత్సరంలో భారీగా నిధులను కూడా కేటాయించడం విశేషం.
కొత్త లోన్ విధానంపై కూడా ప్రభుత్వం క్లారిటీ ఇచ్చింది. విద్యార్థులకు సులువుగా రుణాలు అందించేందుకు ఈ ప్రక్రియను 2 భాగాలుగా విభజించారు. మొదటి రూ.2 లక్షల వరకు రుణాన్ని ‘బీహార్ స్టేట్ ఎడ్యుకేషన్ ఫైనాన్స్ కార్పొరేషన్’ ద్వారా అందిస్తారు. ఆపై రూ.2 లక్షల నుంచి రూ.4 లక్షల వరకు ఉండే మిగతా మొత్తాన్ని షెడ్యూల్డ్ కమర్షియల్ బ్యాంకుల ద్వారా మంజూరు చేస్తారు.
ఈ లోన్ మొత్తాన్ని తగ్గించేశారన్న వార్తలు రావడంతో రాష్ట్రంలో రాజకీయాలు ఒక్కసారిగా వేడెక్కాయి. ప్రతిపక్ష నేతలు, విపక్ష పార్టీల ప్రతినిధులు ప్రభుత్వంపై తీవ్ర విమర్శలు గుప్పిస్తూ విద్యార్థుల ప్రయోజనాలను దెబ్బతీస్తున్నారని మండిపడ్డారు. ప్రభుత్వం వెంటనే స్పందించకపోతే ఆందోళనలు చేపడతామని హెచ్చరించారు. అయితే ప్రభుత్వం నుంచి వచ్చిన ఈ అధికారిక వివరణతో వివాదానికి పూర్తిగా తెరపడింది.