చెప్పి మరీ చిత్తుగా ఓడించారుగా..! ఇంగ్లాండ్ వర్సెస్ పాక్ తొలి టెస్ట్ ఫలితమిదే..

పాకిస్థాన్‌తో జరిగిన తొలి టెస్టులో ఇంగ్లండ్ ఘన విజయం సాధించింది. కేవలం మూడు రోజుల్లోనే మ్యాచ్‌ను ముగించిన ఆతిథ్య జట్టు.. ఇన్నింగ్స్ 103 పరుగుల తేడాతో పాకిస్థాన్‌ను చిత్తు చేసింది. ఈ విజయంతో మూడు టెస్టుల సిరీస్‌లో ఇంగ్లండ్ 1-0 ఆధిక్యంలోకి వెళ్లింది. తొలి రోజు నుంచే ఒత్తిడిలో కనిపించిన పాకిస్థాన్ బ్యాటర్లు రెండో ఇన్నింగ్స్‌లోనూ పూర్తిగా విఫలమయ్యారు.

తొలి ఇన్నింగ్స్‌లో పాక్ 171

మ్యాచ్‌లో ముందుగా బ్యాటింగ్ చేసిన పాకిస్థాన్ తొలి ఇన్నింగ్స్‌లో 171 పరుగులకే ఆలౌటైంది. అబ్దుల్లా షఫీక్ మాత్రమే అర్ధశతకం సాధించి 61 పరుగులు చేశాడు. ఇంగ్లండ్ బౌలర్లలో ఓలీ రాబిన్సన్ అద్భుతంగా బౌలింగ్ చేసి ఐదు వికెట్లు పడగొట్టాడు. జోష్ టంగ్ కూడా పాక్ బ్యాటింగ్ లైనప్‌ను తీవ్రంగా ఇబ్బంది పెట్టాడు.

ఇంగ్లండ్ భారీ స్కోరు

అనంతరం బ్యాటింగ్‌కు దిగిన ఇంగ్లండ్ 409 పరుగుల భారీ స్కోరు సాధించింది. దీంతో పాకిస్థాన్‌పై ఏకంగా 238 పరుగుల తొలి ఇన్నింగ్స్ ఆధిక్యం లభించింది. ఇంగ్లండ్ బ్యాటర్లు సమష్టిగా రాణించడంతో భారీ స్కోరు నమోదైంది. వైస్ కెప్టెన్ హ్యారీ బ్రూక్ అద్భుత బ్యాటింగ్‌తో జట్టును ముందుండి నడిపించాడు. 93 బంతుల్లో 91 పరుగులు చేసిన అతడు 13 బౌండరీలు బాదాడు. జోర్డాన్ కాక్స్ 73, కొత్త టెస్టు కెప్టెన్ జో రూట్ 66, డాన్ లారెన్స్ 51 పరుగులతో అర్ధశతకాలు సాధించారు. పాకిస్థాన్ బౌలర్లలో అలీ ఉస్మాన్ ఐదు వికెట్లు పడగొట్టి ఇంగ్లండ్ భారీ స్కోరును కొంతమేర అడ్డుకున్నాడు.

రెండో ఇన్నింగ్స్‌లోనూ పాక్ పతనం

238 పరుగుల లోటుతో రెండో ఇన్నింగ్స్ ప్రారంభించిన పాకిస్థాన్ బ్యాటింగ్ మరోసారి కుప్పకూలింది. షాన్ మసూద్ 29, అబ్దుల్లా షఫీక్ 15, సౌద్ షకీల్ 14, మహమ్మద్ రిజ్వాన్ 41 పరుగులతో కొంతసేపు పోరాడినా.. ఎవరూ భారీ ఇన్నింగ్స్ ఆడలేకపోయారు. చివరకు పాక్ 135 పరుగులకే ఆలౌటైంది.

టంగ్, రాబిన్సన్ దెబ్బ

ఇంగ్లండ్ విజయానికి జోష్ టంగ్, ఓలీ రాబిన్సన్ కీలకంగా నిలిచారు. తొలి ఇన్నింగ్స్‌లో ఐదు వికెట్లు తీసిన టంగ్.. రెండో ఇన్నింగ్స్‌లో మరో మూడు వికెట్లు పడగొట్టి మ్యాచ్‌లో మొత్తం ఎనిమిది వికెట్లు సాధించాడు. రాబిన్సన్ కూడా మ్యాచ్‌లో ఎనిమిది వికెట్లు తీసుకున్నాడు. రెండో ఇన్నింగ్స్‌లో జోఫ్రా ఆర్చర్ మూడు వికెట్లు పడగొట్టాడు. మొత్తంగా బ్యాటింగ్, బౌలింగ్ రెండు విభాగాల్లోనూ ఆధిపత్యం ప్రదర్శించిన ఇంగ్లండ్.. మూడు రోజులకంటే తక్కువ సమయంలోనే టెస్టును ముగించి 1-0 ఆధిక్యం సాధించింది. ఇక మిగిలిన రెండు టెస్టుల్లోనైనా పాకిస్థాన్ పుంజుకుంటుందా అనేది ఆసక్తికరంగా మారింది. అయితే ఈ మ్యాచ్ జరుగుతుండగానే ఇంగ్లాండ్ మాజీ క్రికెటర్ స్టువర్ట్ బ్రాడ్ పాకిస్థాన్‌ను సింపుల్‌గా ఓడిస్తాం అంటూ విమర్శించారు. బ్రాడ్ చెప్పినట్లే ఇంగ్లాండ్ పాక్‌ను చాలా చిత్తుగా ఓడించింది.