మీరు ఇప్పటికీ పాత చెక్ బుక్లనే ఉపయోగిస్తున్నారా? అయితే బ్యాంకింగ్ ఖాతాదారులకు రిజర్వ్ బ్యాంక్ ఆఫ్ ఇండియా (RBI) ఒక కీలకమైన వార్త తెలిపింది. పెరుగుతున్న బ్యాంకింగ్ మోసాలకు చెక్ పెట్టేందుకు పాత చెక్ బుక్ల చెల్లుబాటుపై గడువు విధించింది. ఈ ఏడాది డిసెంబర్ 31 తర్వాతి నుంచి పాత చెక్కులు చెల్లవని స్పష్టం చేసింది. ఈ కొత్త నిబంధనలు, అందులోని మార్పుల గురించి పూర్తి వివరాలు తెలుసుకుందాం.
డిసెంబర్ 31 వరకే గడువు: ఆర్బీఐ ఆదేశాల ప్రకారం 2026 డిసెంబర్ 31 వరకు మాత్రమే పాత చెక్ బుక్లు చెల్లుబాటు అవుతాయి. 2027 జనవరి 1వ తేదీ నుంచి కేవలం కొత్త చెక్ బుక్లను మాత్రమే ఉపయోగించాల్సి ఉంటుంది. కాబట్టి ఖాతాదారులందరూ వెంటనే తమ బ్యాంకులను సంప్రదించి కొత్తవి తీసుకోవడం మంచిది.
కొత్త చెక్ బుక్లో మారనున్న ఫీచర్లు: ఇన్నాళ్లూ చెక్ కింద కేవలం అంకెలతో కూడిన నంబర్, MICR కోడ్ మాత్రమే ఉండేవి. కానీ కొత్త చెక్కుల్లో అంకెలతో పాటు ఆల్ఫాబెట్లు (అక్షరాలు) కూడా ఉంటాయి.ఇక అంతేకాకుండా నకిలీ చెక్కులను అరికట్టడానికి ఆల్ఫాన్యూమరిక్ కోడ్లను ప్రవేశపెడుతున్నారు.
అత్యాధునిక భద్రతా ప్రమాణాలు: కొత్త చెక్ బుక్లలో ప్రత్యేకమైన వాటర్ మార్క్, యూవీ కాంతి కింద మాత్రమే కనిపించే అదృశ్య సిరా, మైక్రో ప్రింటింగ్ వంటి ఫీచర్లు ఉంటాయి. వీటిని నకిలీ చేయడం లేదా కాపీ చేయడం దాదాపు అసాధ్యమని ఆర్బీఐ వెల్లడించింది. ఇక ఇవి ‘పాజిటివ్ పే సిస్టమ్’తో అనుసంధానమై పనిచేస్తాయి.
మోసాలకు చెక్.. వేగంగా క్లియరెన్స్: పాత చెక్కులను తారుమారు చేయడం తేలిక కావడంతో మోసాలు జరిగే అవకాశం ఉండేది. కొత్త కోడింగ్ వ్యవస్థ వల్ల నకిలీ చెక్కుల ముప్పు తప్పుతుంది. ఇక అంతేకాకుండా ఆటోమేటెడ్ స్కానింగ్ విధానం ద్వారా చెక్కులు చాలా వేగంగా క్లియర్ అవుతాయి.
పెద్ద లావాదేవీలకు మరింత భద్రత: ప్రస్తుతం చిన్న చిన్న చెల్లింపులకు యూపీఐ వాడుతున్నప్పటికీ, పెద్ద మొత్తంలో డబ్బులు బదిలీ చేయడానికి చెక్కులనే వినియోగిస్తున్నారు. ఇక కొత్త ఫీచర్ల వల్ల పెద్ద మొత్తాల లావాదేవీల్లో పూర్తి పారదర్శకత, రక్షణ లభిస్తాయి. డిసెంబర్ 31 తర్వాత పాత చెక్కుల ద్వారా రూ. 50 వేలు అంతకంటే ఎక్కువ మొత్తాలను బ్యాంకులు తీసుకోవు.
బ్యాంకుల సన్నాహాలు: ఇప్పటికే పలు బ్యాంకులు తమ కస్టమర్లకు ఈ కొత్త ఆల్ఫాన్యూమరిక్ కోడ్లు ఉన్న చెక్ బుక్లను జారీ చేయడం ప్రారంభించాయి. డిసెంబర్ 31 లోపు ఖాతాదారులందరికీ వీటిని అందించేందుకు బ్యాంకులు వేగంగా ఏర్పాట్లు చేస్తున్నాయి.
బ్యాంకింగ్ రంగంలో మారుతున్న సాంకేతికతకు అనుగుణంగా మన ఆర్థిక లావాదేవీలను సురక్షితంగా ఉంచుకోవడం అవసరం. కాబట్టి చివరి నిమిషం వరకు ఆగకుండా ముందే మీ బ్యాంకును సంప్రదించి కొత్త చెక్ బుక్ పొందడం శ్రేయస్కరం.
గమనిక: మీ బ్యాంకింగ్ చెక్ బుక్ మార్పుల గురించి పూర్తి వివరాల కోసం మీ సంబంధిత బ్యాంక్ శాఖను లేదా అధికారిక వెబ్సైట్ను సంప్రదించండి. బ్యాంక్ ఖాతా వివరాలు లేదా ఓటీపీలు ఎవరితోనూ పంచుకోవద్దు
The post పాత చెక్ బుక్లు డెడ్లైన్ ఫిక్స్?.. ఆర్బీఐ కొత్త ఆదేశాలు! appeared first on Manalokam – Latest Telugu News & Updates.