‘ఆగస్టు 22’.. తెలుగు చిత్రసీమ గర్వంగా జరుపుకునే ఒక పండుగ రోజు. సాధారణ మధ్యతరగతి కుటుంబంలో పుట్టిన ‘శివశంకర వరప్రసాద్’అనే ఒక సాధారణ యువకుడు, కోట్లాది మంది అభిమానుల గుండెల్లో ‘మెగాస్టార్’గా ఎలా సింహాసనాన్ని అధిష్ఠించారో చెప్పడానికి ఈ ఒక్క రోజు సాక్షిగా నిలుస్తుంది. ఇవాళ (ఆగస్టు 22, 2026న) 71వ ఏట అడుగుపెడుతున్న సందర్భంగా చిరంజీవి ప్రస్థానంలో ఊహించని మలుపులు, సంచలనాలు, ఎదుర్కొన్న సవాళ్లు మరియు ఆయన సాధించిన విజయాలపై స్పెషల్ స్టోరీ మీ కోసం..
మొదటి అడుగు – ‘స్వయంకృషి’:
ఫిల్మ్ ఇన్స్టిట్యూట్ నుంచి నాటక రంగానికి, అక్కడ నుంచి వెండితెరకు చిరంజీవి ప్రయాణం సులభంగా ఏమీ సాగలేదు. చిన్న పాత్రలు, నెగెటివ్ షెడ్స్ (పునాదిరాళ్లు, మనవూరి పాండవులు, ఇది కథ కాదు) చేసుకుంటూ తనను తాను ప్రూవ్ చేసుకున్నారు. ‘ఖైదీ’ (1983) సినిమాతో తెలుగు సినిమా స్టాండర్డ్స్ మారాయి. చిరంజీవి తెచ్చిన కొత్త వేగం, యాక్షన్, డాన్స్ శైలి చూసి టాలీవుడ్ మురిసిపోయింది.
సుప్రీమ్ హీరో నుంచి ‘మెగాస్టార్’ గా:
80 మరియు 90ల దశకంలో చిరంజీవి సృష్టించిన ప్రభంజనం అపూర్వం. ‘పసివాడి ప్రాణం’, ‘జగదేకవీరుడు అతిలోకసుందరి’, ‘గ్యాంగ్ లీడర్’, ‘ఘరానా మొగుడు’ వంటి చిత్రాలతో బాక్సాఫీస్ రికార్డులను తిరగరాశారు. భారతదేశంలో రూ.10 కోట్ల రెమ్యూనరేషన్ తీసుకున్న తొలి నటుడిగా ‘ది ట్రిబ్యూన్’ పత్రిక కవర్ పేజీపై ‘‘Larger than Life’’ అని ప్రచురించేలా చేశారు.
రియల్ హీరో:
చిరంజీవి ఛారిటబుల్ ట్రస్ట్’సినిమాల్లో హీరోగా మెప్పించడమే కాకుండా, నిజ జీవితంలోనూ వేలాది మందికి ప్రాణదాతగా నిలిచారు. బ్లడ్ బ్యాంక్ & ఐ బ్యాంక్: 1998లో ప్రారంభించిన ఈ ట్రస్ట్ ద్వారా లక్షలాది మందికి రక్తం,కంటి చూపు అందించి మనుషుల్లో దేవుడిలా నిలిచారు. కోవిడ్ సమయంలో ఆక్సిజన్ బ్యాంకులను ఏర్పాటు చేసి ఎన్నో కుటుంబాలకు అండగా నిలిచారు.
జీవితంలో ఓటములు – గెలుపు నేర్పిన పాఠాలు:
రాజకీయాల్లోకి అడుగుపెట్టి ‘ప్రజారాజ్యం’ పార్టీ స్థాపించిన సమయంలో ఆయన ఊహించని ఓటములను, విమర్శలను ఎదుర్కొన్నారు. కానీ ఓటమి అతడిని క్రుంగదీయలేదు. రాజకీయం తపస్సు అయితే, నటన ఆయన శ్వాస అని గ్రహించి మళ్లీ తన సొంత గూటికి (సినిమా రంగానికి) తిరిగి వచ్చారు.
ALSO READ : చిరు బర్త్డే బ్లాస్ట్.. ‘మెగా158’కు ‘కాకా’ టైటిల్ ఫిక్స్..
రీ-ఎంట్రీ విస్ఫోటనం (150వ సినిమా)
9 ఏళ్ల గ్యాప్ తర్వాత ‘ఖైదీ నంబర్ 150’తో రీ-ఎంట్రీ ఇస్తే, రికార్డులు బద్దలయ్యాయి. ఆ తర్వాత ‘సైరా నరసింహారెడ్డి’, ‘వాల్తేరు వీరయ్య’ వంటి వరుస బ్లాక్బస్టర్లతో తాను ఎప్పటికీ ‘బాస్’నని చాటిచెప్పారు. భారత ప్రభుత్వం ఆయన సేవలకు గాను ‘పద్మవిభూషణ్’ పురస్కారంతో గౌరవించింది.
చిరంజీవి కేరీర్ మైలురాళ్లు:
- తొలి సినిమా- ప్రాణం ఖరీదు (1978)
- టర్నింగ్ పాయింట్ – ఖైదీ (1983)
- సామాజిక సేవ- చిరంజీవి బ్లడ్ & ఐ బ్యాంక్ (1998), ఆక్సిజన్ బ్యాంకులు
- అత్యున్నత పురస్కారాలు- పద్మభూషణ్ (2006), పద్మవిభూషణ్ (2024)
- రెస్పెక్ట్ – ఇండియన్ సినిమా ఐకాన్ (గ్రాండ్ ప్రొడక్షన్స్ & బాక్సాఫీస్ కింగ్)
71వ ఏట కూడా అదే ఎనర్జీ.. ఆగని మెగా ప్రయాణం!
సాధారణంగా 60 ఏళ్లు దాటితే విశ్రాంతి తీసుకునే ఈ రోజుల్లో, 71వ ఏట కూడా యంగ్ హీరోలకు పోటీగా వరుస సినిమాలు ఒప్పుకుంటూ షూటింగ్లలో పాల్గొనడం చిరంజీవి గారికి మాత్రమే చెల్లింది. ‘విశ్వంభర’ వంటి భారీ సోషియో ఫాంటసీ సినిమాలతో పాటు కొత్త దర్శకులకు అవకాశాలు ఇస్తూ, నేటి తరం నటులకు ఆయనొక నిలువెత్తు నిదర్శనంగా నిలుస్తున్నారు. తన శ్రమనే నమ్ముకుని, ప్రతి ఓటమి నుంచి గెలుపును నేర్చుకుంటూ, కోట్లాది మంది అభిమానుల గుండెల్లో చెరగని ముద్ర వేసిన మెగాస్టార్ చిరంజీవికి 71వ పుట్టినరోజు శుభాకాంక్షలు…