మొదటిగా మిరియాలు, జీలకర్ర మరియు పొట్టు తీసిన వెల్లుల్లి రెబ్బల మిశ్రమం ఇప్పుడు చెప్పే విధంగా తయారు చేసుకోవాలి. రసానికి అసలైన బలం ఈ మిశ్రమం. మిక్సీలో ఒక్కసారి పల్స్ చేస్తే వచ్చే ఆ కచ్చాపచ్చా పొడిని చూస్తుంటేనే దాని ఘాటు అర్థమవుతోంది. వెల్లుల్లిలోని ఔషధ గుణాలు, మిరియాలలోని తీక్షణత కలిస్తే వచ్చే ఆరోమా అద్భుతం. ఇది కేవలం మసాలా కాదు, అనారోగ్యాన్ని తరిమికొట్టే ఒక ఆయుధం లాంటిది. ఇలా తాజాగా దంచుకున్న మసాలా వాడితేనే రసానికి ప్రాణం వస్తుంది.
నానబెట్టిన చింతపండు పులుసులో పండిన ఎర్రటి టమాటా ముక్కలు, పచ్చిమిర్చి చీలికలు వేసి ఉడికించాలి. పసుపు రంగు పులుసులో ఆ ఎర్రటి టమాటాలు మగ్గుతుంటే వచ్చే దృశ్యం చూస్తేనే నోరూరుతుంది. టమాటాలోని పులుపు, చింతపండు రసం కలిసి రసానికి ఒక చక్కని చిక్కదనాన్ని, తీపి-పులుపు కలయికను ఇస్తాయి. ఇవి ఎంత బాగా మగ్గితే, రసం అంత రుచిగా మారుతుంది. ఉప్పు కూడా ఈ దశలోనే వేస్తే ముక్కలు త్వరగా మెత్తబడి రసంలో కలిసిపోతాయి.
రసం మరిగేటప్పుడు వచ్చే ఆ నురగ, గాలిలో తేలే ఆ సువాసన వర్ణనాతీతం. గది అంతా కమ్మటి రసం వాసనతో నిండిపోతుంది. దాదాపు 10 నిమిషాల పాటు మీడియం ఫ్లేమ్ మీద మరిగించడం వల్ల వెల్లుల్లి, మిరియాల సారం అంతా నీళ్లలోకి దిగుతుంది. ఆ సమయంలో కొత్తిమీర పైన అలా చల్లితే, రసం రంగు మారి మరింత అద్భుతంగా కనిపిస్తుంది.
ఎంత రసం చేసినా, ఆఖర్లో వేసే పోపు లేకపోతే అది అసంపూర్ణమే. వేడి నూనెలో ఆవాలు, జీలకర్ర, ఎండుమిర్చి పడగానే వచ్చే ఆ శబ్దం మ్యూజిక్ లా ఉంటుంది. ముఖ్యంగా కరివేపాకు చిటపటలాడుతూ, ఇంగువ వాసన బయటకు వస్తున్నప్పుడు ఆ పోపు గరిటెను రసంలో ముంచితే వచ్చే ‘చుయ్యి’ అనే సౌండ్ వంట మీద ప్రేమను పెంచుతుంది. ఈ పోపులో కూడా కొన్ని వెల్లుల్లి రెబ్బలు దంచి వేయడం వల్ల డబుల్ ఫ్లేవర్ అందుతుంది.
చివరిగా గిన్నెలో మెరుస్తున్న ఆ వెల్లుల్లి రసాన్ని పైన తేలుతున్న ఎండుమిర్చి, కొత్తిమీర, వెల్లుల్లి ముక్కలు మనల్ని రమ్మని పిలుస్తున్నట్లుగా ఉంటాయి. ఇది అన్నంలో కలుపుకుని తింటే కడుపు నిండుతుంది, గ్లాసులో పోసుకుని తాగితే ఆరోగ్యం పెరుగుతుంది. వేడివేడి అన్నం, కాస్త నెయ్యి, ఈ రసం.. ఇంకా కావాలంటే సైడ్ డిష్గా ఏదైనా వేపుడు ఉంటే ఆ రోజంతా పండగే!