మల్లె పూల పరిమళం ఇల్లంతా నిండాలన్నా, మొక్క నిండా గుత్తులు గుత్తులుగా పూలు పూయాలన్నా కేవలం నీళ్లు పోస్తే సరిపోదు. ముఖ్యంగా ప్రూనింగ్(కొమ్మల కత్తిరింపు) చేసిన తర్వాత మొక్కకు సరైన పోషణ అందిస్తేనే అది ఆరోగ్యంగా పెరిగి మనకు కావలసినన్ని పూలను ఇస్తుంది. మల్లె మొక్క సంరక్షణలో సూర్యరశ్మి పాత్ర చాలా కీలకం. మొక్కకు రోజుకు కనీసం ఐదు నుంచి ఏడు గంటల పాటు నేరుగా ఎండ తగిలేలా చూసుకోవాలి. ఎండ సరిగ్గా తగిలితేనే కొత్త చిగుర్లు వస్తాయి, లేదంటే మొక్క కేవలం పొడవుగా పెరుగుతుంది తప్ప మొగ్గలు రావు. ఎండ తక్కువైతే మొగ్గలు నల్లగా మారి రాలిపోయే అవకాశం కూడా ఉంది.
నీటి విషయానికి వస్తే, మట్టి పైన పొర ఎండినట్లు అనిపించినప్పుడే నీరు పోయాలి. కుండీలో నీరు నిల్వ ఉండకుండా డ్రైనేజీ రంధ్రాలు సరిగ్గా ఉన్నాయో లేదో చూసుకోవడం ముఖ్యం. మొక్కకు కొమ్మలు వచ్చే దశలో ఆకులపై నీటిని చిలకరించడం మంచిదే కానీ, ఒక్కసారి మొగ్గలు రావడం మొదలయ్యాక మాత్రం మొగ్గలపై నీరు పడకుండా జాగ్రత్త పడాలి. మొగ్గలపై నీరు పడితే ఫంగస్ సోకి అవి రాలిపోతాయి కాబట్టి, నీటిని ఎప్పుడూ మొక్క మొదట్లో మాత్రమే పోయాలి.
మల్లె మొక్క ఎదుగుదలకు వాడే మట్టి మిశ్రమంలో 40 శాతం మట్టి, 30 శాతం కంపోస్ట్, 20 శాతం ఇసుక, 10 శాతం కోకోపీట్ లేదా వరి పొట్టు ఉండేలా చూసుకోవాలి. ఈ మిశ్రమం వల్ల వేర్లు సులభంగా వ్యాపించి పోషకాలను బాగా గ్రహిస్తాయి. ప్రూనింగ్ చేసిన 20 రోజుల తర్వాత మొక్కకు ఒక ప్రత్యేక ఎరువుల మిశ్రమాన్ని అందించాలి. ఇందులో రెండు గుప్పెళ్ల వెర్మి కంపోస్ట్, అర చెంచా DAP, ఒక చెంచా మస్టర్డ్ కేక్ పౌడర్(ఆవచెక్క పొడి), ఒక చెంచా వేపపిండిని కలిపి మొక్క మొదట్లో వేయాలి. ముఖ్యంగా ఆవచెక్క పొడిలోని నైట్రోజన్ వల్ల మొక్క వేగంగా పెరిగి పెద్ద సైజు పూలు పూస్తుంది. ఒకవేళ ఆవచెక్క అందుబాటులో లేకపోతే ఇంట్లోని ఆవాలనైనా పొడి చేసి వాడుకోవచ్చు. చివరిగా, చీడపీడల నివారణకు కెమికల్స్ వాడకుండా సహజ పద్ధతులను పాటించడం ఉత్తమం. ఆకులు ముడత పడకుండా ఉండటానికి వేపనూనె లేదా కుంకుడుకాయల ద్రావణాన్ని వారానికి ఒకసారి మొక్కపై స్ప్రే చేయాలి. కుంకుడుకాయలను నీటిలో నానబెట్టి తయారు చేసిన ద్రావణం ఫంగస్, పురుగులను సమర్థవంతంగా అరికడుతుంది. ఈ చిన్న చిన్న జాగ్రత్తలు పాటిస్తే మీ పెరట్లోని మల్లె మొక్క పూల గనిలా మారుతుంది.
Also Read:
చుక్క పెరుగు లేకుండా ఈజీగా చల్ల మిరపకాయలు.. గ్యాస్ సమస్యలు రావు, రెండేళ్లయినా పాడవవు..
కరివేపాకు మొక్క పెరగడం లేదా.? ఇవి ఇచ్చారంటే పచ్చగా, వద్దన్నా గుబురుగా పెరుగుతుంది..