ప్రముఖ బాలీవుడ్ నటుడు, నేషనల్ అవార్డు విజేత నానా పటేకర్ (75) కన్నుమూయడం సినీ పరిశ్రమలో తీవ్ర విషాదాన్ని నింపింది. ఐదు దశాబ్దాలకు పైగా సాగిన తన సినీ ప్రయాణంలో ఎన్నో అద్భుతమైన పాత్రలు పోషించి, అనేక అవార్డులు అందుకున్న ఆయన.. హిందీ, మరాఠీ, తమిళ చిత్రాల్లో తనదైన నటనా ముద్ర వేశారు. విలక్షణ నటుడిగా ప్రేక్షకుల హృదయాల్లో చెరగని స్థానం సంపాదించుకున్నారు. అయితే ఇంతటి సుదీర్ఘ సినీ కెరీర్‌లో నానా పటేకర్‌కు ఓ కోరిక మాత్రం తీరలేదు. అదే మలయాళ సినిమాలో ఒక్కసారైనా నటించాలన్న ఆయన ఆశ. చివరికి అది తీరని కోరికగానే మిగిలిపోవడం మరింత భావోద్వేగాన్ని కలిగిస్తోంది.
కేరళతో ప్రత్యేక అనుబంధం..
నానా పటేకర్‌కు కేరళతో చాలా ఏళ్ల అనుబంధం ఉంది. దాదాపు 32 ఏళ్ల క్రితం ఓ సినిమా షూటింగ్ కోసం తొలిసారి కేరళకు వెళ్లిన ఆయన.. ఆ రాష్ట్రంతో తనకున్న అనుబంధాన్ని ఎప్పటికీ మర్చిపోలేదు. తిరువనంతపురంలో జరిగిన 28వ ఇంటర్నేషనల్ ఫిల్మ్ ఫెస్టివల్ ఆఫ్ కేరళ (IFFK) ప్రారంభోత్సవ కార్యక్రమానికి హాజరైనప్పుడు కూడా కేరళ గురించి ఆసక్తికరమైన విషయాలను పంచుకున్నారు.
‘‘32 ఏళ్ల క్రితం సినిమా షూటింగ్ కోసం తొలిసారి కేరళకు వచ్చాను. అప్పటి నుంచి ఇక్కడి సామాజిక, రాజకీయ పరిస్థితుల్లో పెద్దగా మార్పు కనిపించలేదు. ప్రజలు తమ హృదయంతో ఎక్కువగా ఆలోచిస్తారు. భాషలు వేరైనా ఒకరితో ఒకరు సులభంగా మాట్లాడుకోగలుగుతాం. అదే విధంగా ఉండాలి’’ అని నానా పటేకర్ అప్పట్లో చెప్పుకొచ్చారు.
50 ఏళ్లైనా.. మలయాళం నుంచి ఆ ఒక్క పిలుపు రాలే!
మలయాళ చిత్ర పరిశ్రమపై తనకున్న ఆసక్తిని కూడా నానా పటేకర్ అదే వేదికపై వెల్లడించారు. ఐదు దశాబ్దాల కెరీర్‌లో ఎన్నో భాషల్లో సినిమాలు చేసినప్పటికీ.. కేరళకు చెందిన ఒక్క దర్శకుడు కూడా తనను మలయాళ సినిమాలో నటించమని సంప్రదించలేదని సరదాగా అన్నారు.
‘‘గత 50 ఏళ్లలో ఇక్కడి నుంచి ఒక్క దర్శకుడు కూడా నన్ను సంప్రదించలేదు. అంటే నటుడిగా నేను ఇంకా మెరుగుపడాల్సి ఉందేమో. నా వంతు ప్రయత్నం చేస్తాను. మిమ్మల్ని నిరాశపరచను’’ అంటూ తనదైన శైలిలో చమత్కరించారు.
మలయాళ సినిమా అంటే తనకు ఉన్న గౌరవాన్ని, ఆ పరిశ్రమలో పనిచేయాలన్న ఆసక్తిని ఆయన ఈ వ్యాఖ్యల ద్వారా చెప్పకనే చెప్పారు. అయితే నానా పటేకర్ కోరిక మాత్రం నెరవేరలేదు. హిందీ, మరాఠీ, తమిళ చిత్రాల్లో నటించిన ఆయన.. ఒక్క మలయాళ సినిమాలో కూడా కనిపించలేదు.
‘పరిం‍దా’ నుంచి ‘నటసమ్రాట్’ వరకు..
1978లో వచ్చిన ‘గమన్’ సినిమాతో నటుడిగా కెరీర్ ప్రారంభించిన నానా పటేకర్.. ఆ తర్వాత హిందీ, మరాఠీ చిత్రాల్లో విభిన్న పాత్రలతో ప్రత్యేక గుర్తింపు తెచ్చుకున్నారు. ‘పరిం‍దా’ సినిమాలో గ్యాంగ్‌స్టర్ పాత్ర ఆయనకు భారీ గుర్తింపును తీసుకొచ్చింది.
ఆ తర్వాత ‘వెల్‌కమ్’, ‘వెల్‌కమ్ బ్యాక్’, ‘రాజ్‌నీతి’ వంటి సినిమాలతో ప్రేక్షకులను అలరించారు. మరాఠీ చిత్రం ‘నటసమ్రాట్’లో ఆయన నటనకు విశేష ప్రశంసలు దక్కాయి. నటుడిగానే కాకుండా ‘ప్రహార్: ది ఫైనల్ అటాక్’ చిత్రానికి దర్శకత్వం వహించి దర్శకుడిగానూ తన ప్రతిభను చాటుకున్నారు.
తమిళంలోనూ స్టార్ హీరోలతో..
నానా పటేకర్ ఇతర భాషా చిత్రాల్లోనూ నటించారు. 2008లో వచ్చిన ద్విభాషా చిత్రం ‘బొమ్మలాట్టం’తో తమిళ సినిమాల్లోకి అడుగుపెట్టారు. ఆ తర్వాత సూపర్‌స్టార్ రజనీకాంత్ నటించిన ‘కాలా’లోనూ కీలక పాత్ర పోషించారు. ఇలా ఐదు దశాబ్దాల సినీ ప్రయాణంలో హిందీ, మరాఠీ, తమిళ చిత్ర పరిశ్రమల్లో తనదైన ముద్ర వేసిన నానా పటేకర్.. మలయాళ సినిమాలో మాత్రం నటించలేకపోయారు. కేరళ వేదికపై సరదాగా చెప్పిన ఆ కోరిక.. చివరికి తీరని కోరికగానే మిగిలిపోయింది.