రాష్ట్రంలో కొత్తగా ప్రతిపాదించిన ‘ప్రివిలేజ్ ఫీజు’ నిర్ణయం వల్ల బార్ యజమానులకు ఎలాంటి నష్టం వాటిల్లదని, ఈ ప్రభావం కేవలం వినియోగదారులపై మాత్రమే స్వల్పంగా పడుతుందని తెలంగాణ ఎక్సైజ్ శాఖ మంత్రి జూపల్లి కృష్ణారావు స్పష్టం చేశారు. ప్రివిలేజ్ ఫీజును తక్షణమే రద్దు చేయాలని డిమాండ్ చేస్తూ బార్స్ అండ్ రెస్టారెంట్స్ అసోసియేషన్ నిరసనలు చేపడుతున్న నేపథ్యంలో ఆయన ఈ వ్యాఖ్యలు చేశారు. హైదరాబాద్ నగరం అన్ని రంగాల్లో అప్‌గ్రేడ్ అయినందున, ఇతర పొరుగు రాష్ట్రాల్లో అమల్లో ఉన్న విధానాలకు అనుగుణంగానే ఇక్కడా బార్ లైసెన్సులను జారీ చేశామని తెలిపారు. మద్యం ధరలు పెంచినంత మాత్రాన వినియోగం తగ్గినట్లు ఎక్కడా లేదని, గత అనుభవాలను పరిశీలిస్తే ధరల పెంపు వల్ల ప్రభుత్వానికి రాబడి పెరుగుతుందే తప్ప విక్రయాలు పెద్దగా తగ్గవని పునరుద్ఘాటించారు.
రూ.40,000 కోట్లకు మద్యం రాబడి..
రాష్ట్రంలో మద్యం ద్వారా వస్తున్న ఆదాయ గణాంకాలను ఈ సందర్భంగా మంత్రి జూపల్లి గుర్తుచేశారు. గత బీఆర్ఎస్ ప్రభుత్వ హయాంలో మద్యం ద్వారా వచ్చే రాబడి రూ.10,000 కోట్ల నుంచి ఏకంగా రూ.36,000 కోట్లకు, అంటే దాదాపు 260 శాతం మేర పెరిగిందని వివరించారు. కాంగ్రెస్ ప్రభుత్వం అధికారంలోకి వచ్చిన తర్వాత మద్యం ద్వారా వస్తున్న ఆదాయం ప్రస్తుతం రూ.40,000 కోట్లకు చేరిందని వెల్లడించారు. ప్రభుత్వం నిబంధనలు, చట్ట ప్రకారమే ముందుకెళ్తోందని, రాష్ట్రంలో మద్యం ఉత్పత్తికి నీటి కొరత వంటి సమస్యలేవీ లేవని మంత్రి స్పష్టం చేశారు.