భారత మహిళా క్రికెట్ జట్టు కొత్త కెప్టెన్‌గా స్టార్ బ్యాటర్ స్మృతి మంధాన నియమితులయ్యారు. ఈ మేరకు భారత క్రికెట్ నియంత్రణ మండలి (బీసీసీఐ) అధికారికంగా ప్రకటించింది. గత అనేక సంవత్సరాలుగా భారత మహిళా క్రికెట్‌లో కీలక ప్లేయర్ గా కొనసాగుతున్న స్మృతి మంధాన, అన్ని ఫార్మాట్లలో జట్టు పురోగతికి ఎంతగానో దోహదపడ్డారు. దేశీయ టోర్నీలతో పాటు ఫ్రాంచైజీ క్రికెట్‌లోనూ అద్భుతమైన నాయకత్వ లక్షణాలను ప్రదర్శించారు. ముఖ్యంగా మహిళల ప్రీమియర్ లీగ్ (డబ్ల్యూపీఎల్) టోర్నీలో రాయల్ ఛాలెంజర్స్ బెంగళూరు (ఆర్సీబీ) జట్టును 2024, 2026 సంవత్సరాలలో ఛాంపియన్‌గా నిలపడంలో ఆమె నాయకత్వ ప్రతిభ ఎంతో కీలకపాత్ర పోషించింది.
2013 నుంచి భారత జట్టులో సభ్యురాలిగా ఉన్న స్మృతి మంధానకు అంతర్జాతీయ క్రికెట్‌లో విశేష అనుభవం ఉంది. ఇప్పటికే ఆమె భారత్ తరఫున 18 టీ20లు, 4 వన్డేలకు కెప్టెన్‌గా వ్యవహరించిన అనుభవం కలిగి ఉన్నారు. ఇకపై ఆమె పూర్తిస్థాయి వైట్-బాల్ కెప్టెన్ బాధ్యతలను చేపట్టనున్నారు. భారత జట్టు సరికొత్త దశలోకి అడుగుపెడుతున్న తరుణంలో, ఆమె ఈ బాధ్యతలను స్వీకరించి జట్టును ముందుకు నడిపించనున్నారు.
తనకు ఈ అరుదైన అవకాశం లభించడంపై స్మృతి మంధాన స్పందిస్తూ.. భారత్‌కు నాయకత్వం వహించడం చాలా ప్రత్యేకమైన గౌరవమని, తనపై నమ్మకం ఉంచిన బీసీసీఐకి, సెలెక్టర్లకు, సహచర ఆటగాళ్లకు కృతజ్ఞతలు తెలిపారు. గతంలో కెప్టెన్‌గా జట్టుకు అంకితభావంతో సేవలు అందించిన హర్మన్‌‌ప్రీత్ కౌర్ చేసిన విశేష కృషిని ఈ సందర్భంగా ఆమె కొనియాడారు. జట్టును మరింత ముందుకు తీసుకెళ్లేందుకు తన వంతు పూర్తి కృషి చేస్తానని పేర్కొన్నారు.
A dawn of a new era
Smriti Mandhana takes charge as the Captain of the Indian Women’s cricket team
Go well, Captain
More details
https://t.co/tbLb4jOiCn
#TeamIndia | @mandhana_smriti https://t.co/27AxmrUhKt
— BCCI (@BCCI) October 6, 2026
బీసీసీఐ అధ్యక్షుడు మిథున్ మన్హాస్, గౌరవ కార్యదర్శి దేవాజిత్ సైకియా మాట్లాడుతూ.. స్మృతి మంధాన అనుభవం, ఆటపై ఆమెకు ఉన్న అవగాహన భారత మహిళా క్రికెట్‌కు ఎంతగానో ఉపయోగపడతాయని విశ్వాసం వ్యక్తం చేశారు. ఆమె నాయకత్వంలో జట్టు మరిన్ని విజయాలు సాధించాలని ఆకాంక్షించారు.