ఉదయం లేవగానే నీరు తాగితే పొట్ట ముందుకు సాగుతుందా..? నాజుగ్గా అందంగా ఉండాలంటే..

శరీర ఆరోగ్యానికి నీరు ఎంత ముఖ్యమో ప్రత్యేకంగా చెప్పాల్సిన అవసరం లేదు. అయితే, ఉదయం లేవగానే కడుపు నిండా నీరు తాగే అలవాటుపై కొన్ని అపోహలు ప్రచారంలో ఉన్నాయి. ముఖ్యంగా “ఉదయాన్నే ఎక్కువ నీరు తాగితే పొట్ట సాగుతుంది” అనే వాదన అనేకమందిని ఈ ఆరోగ్యకరమైన అలవాటు నుండి దూరం చేస్తోంది. అయితే.. నీరు తాగడం వల్ల పొట్ట సాగదనీ, దీని వల్ల అనేక ప్రయోజనాలు ఉన్నాయనీ ఆయుర్వేద నిపుణులు చెబుతున్నారు. వాస్తవానికి నీరు తాగిన తర్వాత కేవలం 10-15 నిమిషాల్లోనే పొట్టలో నుంచి రక్తంలోకి లేదా ప్రేగుల్లోకి వెళ్ళిపోతుంది. గరిష్టంగా అరగంట కంటే ఎక్కువ సమయం నీరు పొట్టలో ఉండదు. నీటికి జీర్ణక్రియ అవసరం లేదు కాబట్టి, అది వెంటనే శరీరం గ్రహించుకుంటుంది. అందువల్ల, నీరు తాగడం వల్ల పొట్ట సాగే అవకాశం లేదు..

మన ప్రాచీన ఆచారాలు – నీటి ప్రాముఖ్యత

మన ఋషులు వేల సంవత్సరాల క్రితమే ఉదయం కడుపునిండా నీరు తాగే ప్రాముఖ్యతను గుర్తించారు. రాగి చెంబులో నీరు పోసి రాత్రంతా ఉంచి, ఉదయం ఆ నీటిని తాగమని చెప్పే ఆచారం మన ఇళ్లలో ఇప్పటికీ ఉంది. పొట్ట నిండా నీరు తాగడం వల్ల మల ప్రేగులపై ఒత్తిడి కలిగి, మల విసర్జన సులభతరం అవుతుందని ఇది ఒక ప్రాథమిక సూత్రం. జపాన్ వంటి దేశాలు కూడా ఒక లీటర్ నీటిని తాగడం ఆరోగ్యానికి మంచిదని ప్రచారం చేసినప్పటికీ.. ఇది మన దేశంలో ఎప్పటి నుంచో ఉన్న పద్ధతేనని వివరిస్తున్నారు ఆయుర్వేద నిపుణులు.. అయితే.. ఇక్కడ లీటర్ తాగాలన్నది సూత్రం కాదు.. కానీ.. ఉదయాన్నే రెండు గ్లాసుల నీరు తీసుకోవడం లేదా.. శరీర పరిమాణాన్ని బట్టి నీటిని తీసుకోవడం చాలా మంచిది. ఉదయాన్నే ఒకేసారి ఎక్కువ నీరు తాగడం కంటే, గోరువెచ్చని నీటిని సిప్ చేస్తూ తాగడం వల్ల మరిన్ని ప్రయోజనాలు చేకూరుతాయి..

పొట్ట సాగడానికి నిజమైన కారణాలు..

ఆహారం: ఆహారం పొట్టలో అరగడానికి 2-4 గంటలు పడుతుంది. ప్రేగుల్లో ఇంకో 2-3 గంటలు ఉంటుంది. ఇలా గంటల తరబడి ఆహారం పొట్టలో ఉండటం వల్ల పొట్ట సాగే అవకాశం ఉంటుంది. మామూలుగా పొట్ట సగటు సామర్థ్యం 1-2 లీటర్లు ఉంటుంది. ఎక్కువగా తినేవారికి ఇది 3 లీటర్ల వరకు కూడా సాగవచ్చు.

అధికంగా తినడం – త్రాగడం: ఎక్కువసార్లు తినడం, అధిక మోతాదులో ఆహారం తీసుకోవడం, ముఖ్యంగా మద్యం లేదా ఇతర కార్బోనేటెడ్ పానీయాలను అధికంగా తాగడం వల్ల పొట్ట సాగుతుంది. ఈ పానీయాలు కూడా పొట్టలో ఎక్కువసేపు నిల్వ ఉంటాయి. వెన్నుపూస వెనుకవైపు ఉండటం వల్ల పొట్ట ముందుకు సాగుతుందని ఆయన వివరించారు.

వ్యాయామం లేకపోవడం: సరిపడా వ్యాయామం లేకపోవడం కూడా పొట్ట పెరగడానికి ఒక ముఖ్య కారణం..

బాడీ టిటాక్స్.. అందం..

ఉదయం పూట నీరు తాగడం వల్ల మలబద్ధకం తగ్గి, శరీరం డీటాక్స్ అవుతుంది. పొట్ట సాగుతుందనే భయం లేకుండా నిర్భయంగా నీరు తాగాలని ఆయుర్వేద నిపుణులు సూచిస్తున్నారు. బదులుగా, అనారోగ్యకరమైన ఆహారపు అలవాట్లను, ఎక్కువసార్లు తినడం, ఎక్కువగా త్రాగడం వంటివి మానుకోవాలి. ఆరోగ్యకరమైన జీవనశైలి, నియమిత వ్యాయామం ద్వారా పొట్టను తగ్గించుకోవచ్చు, తద్వారా ఆరోగ్యంగా, అందంగా ఉండవచ్చని పేర్కొంటున్నారు..

ఇది కేవలం అవగాహన కోసం మాత్రమే.. ఏమైనా సమస్యలున్నా.. సందేహాలున్నా నేరుగా వైద్య నిపుణులను సంప్రదించండి..

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..