నటి సితార గతంలో ఇచ్చిన ఓ ఇంటర్వ్యూలో తన వ్యక్తిగత జీవితం, కెరీర్, ఫిట్నెస్ రహస్యాలను పంచుకున్నారు. ఆమె ఇంకా పెళ్లి చేసుకోలేదని, భవిష్యత్తులో వివాహం చేసుకునే ఆలోచన ఉందా లేదా అనేది తనకు తెలియదని స్పష్టం చేశారు. అయితే, ఒకవేళ పెళ్లి జరిగితే అది ఎప్పటికీ రహస్యం కాదని వెల్లడించారు. తన కెరీర్లో తీసుకున్న రెండు నుంచి మూడు సంవత్సరాల విరామం వెనుక గల కారణాన్ని సీతార వివరించారు. తన తండ్రి మరణం తర్వాత ఈ విరామం తీసుకున్నానని తెలిపారు. తన తండ్రి తన జీవితంలో ఒక బలమైన స్తంభంలా నిలిచారని, గొప్ప మద్దతునిచ్చారని, అలాగే తన బెస్ట్ ఫ్రెండ్ అని సీతార భావోద్వేగానికి లోనయ్యారు. ఆయన లేని లోటును తట్టుకోవడం తనకు చాలా కష్టమైందని, ఆ శూన్యంతో సర్దుకుపోలేకపోయానని పేర్కొన్నారు. నటన అనేది చాలా సృజనాత్మకమైన పని అని, ఆ సమయంలో తాను నటనకు పూర్తి న్యాయం చేయలేనని గ్రహించినందువల్లే విరామం తీసుకోవాలని నిర్ణయించుకున్నానని చెప్పారు. ఇది తన వ్యక్తిగత నిర్ణయం అని, దానిని గౌరవించాలని పరోక్షంగా సూచించారు.
ఫిట్నెస్ను ఎలా కాపాడుకుంటున్నారని అడిగిన ప్రశ్నకు సీతార సమాధానమిచ్చారు. బరువు పెరగడం తనకు అస్సలు ఇష్టం ఉండదని, అందుకే శరీరాన్ని మెయింటెయిన్ చేస్తానని తెలిపారు. తన డైట్, రోజువారీ షెడ్యూల్ గురించి వివరిస్తూ, మొదటి నుండి స్వీట్లు, నూనె పదార్థాలు ఎక్కువగా తినడం తనకు ఇష్టం ఉండదని చెప్పారు. అయితే, ప్రతి పదార్థాన్ని పరిమిత పరిమాణంలో తీసుకుంటానని, అన్నిటినీ ఆస్వాదిస్తానని తెలిపారు. తినే ఆహారం పట్ల జాగ్రత్తగా ఉండడంతో పాటు, క్రమం తప్పకుండా వ్యాయామం చేయడం ద్వారా తాను ఫిట్గా ఉంటానని సీతార వెల్లడించారు. ఇది తన దినచర్యలో ఒక భాగమని, తన ఆరోగ్యాన్ని కాపాడుకోవడానికి ఎంతో సహాయపడుతుందని పేర్కొన్నారు. సీతార మాటలు ఆమె వ్యక్తిగత క్రమశిక్షణ, వృత్తి పట్ల ఆమెకున్న అంకితభావాన్ని స్పష్టం చేస్తాయి.
సితార సినీ ప్రపంచంలోకి అనూహ్యంగా అడుగుపెట్టారు. 1985లో, కేవలం 9వ తరగతి చదువుతున్న ఒక కాన్వెంట్ విద్యార్థినిగా ఆమె మలయాళ చిత్ర పరిశ్రమలో తన ప్రస్థానాన్ని ప్రారంభించారు. నటన పట్ల ఎటువంటి ప్రణాళిక గానీ, కోరిక గానీ లేకుండానే విధి ఆమెను ఈ రంగంలోకి తీసుకువచ్చిందని ఆమె పేర్కొన్నారు. ఆమె మొదటి చిత్రం “కావేరి”, ఇందులో ఆమె టైటిల్ పాత్రను పోషించారు. ఈ చిత్రంలో మలయాళ పరిశ్రమలోని దిగ్గజ నటులైన మమ్ముట్టి, మోహన్లాల్, నెడుముడి వేణులతో కలిసి నటించే అవకాశం లభించింది. మొదటి సినిమా విడుదల కాకముందే, గొప్ప దర్శకుడు జి. అరవిందన్ దర్శకత్వంలో వినీత్తో కలిసి తన రెండవ చిత్రంలో నటించారు.
సితార చదువులో చాలా చురుకైన విద్యార్థిని కావడంతో పాటు, సాంప్రదాయ హిందూ కుటుంబం నుండి రావడంతో ఆమె తల్లిదండ్రులు ఆమె చదువును కొనసాగించాలని కోరుకున్నారు. అందుకే, ఆమె కేవలం వేసవి సెలవులు, క్రిస్మస్ సెలవులు, దసరా సెలవుల వంటి సమయాల్లో మాత్రమే సినిమా అవకాశాలను ఎంచుకునేవారు. మలయాళంలో ఒక సినిమా 25-30 రోజుల్లో పూర్తి అయ్యేది, హీరోయిన్కు కేవలం 10-15 రోజుల పని మాత్రమే ఉండేది. ఈ సమయానికి అనుగుణంగా ఆమె షూటింగ్ షెడ్యూల్స్ ప్లాన్ చేసుకునేవారు. సెలవుల్లో సినిమాలు చేస్తూనే ప్రియదర్శన్, కె. బాలచందర్ వంటి గొప్ప దర్శకులతో పని చేసే అవకాశం ఆమెకు లభించింది. 1989లో కె. బాలచందర్ దర్శకత్వంలో “పుదు పుదు అర్థంగళ్” చిత్రంతో తమిళ పరిశ్రమలోకి ప్రవేశించారు. ఈ చిత్రం తమిళంలో పెద్ద విజయం సాధించింది, తెలుగులో “భార్యలు జాగ్రత్త” పేరుతో డబ్బింగ్ అయ్యింది. ఆ తర్వాత “పుదు వసంతం” వంటి మరో సూపర్ హిట్ చిత్రంలో నటించారు, ఇది తెలుగులో “నవవసంతం”గా డబ్బింగ్ అయ్యింది.
1990లో ఉషాకిరణ్ మూవీస్ నిర్మించిన “మనసు మమత” చిత్రంతో తెలుగు చిత్ర పరిశ్రమలోకి అరంగేట్రం చేశారు. ఈ చిత్రానికి మౌళి దర్శకత్వం వహించారు. 1993లో దర్శకుడు డి. రాజేంద్రబాబు దర్శకత్వంలో విష్ణువర్ధన్తో కలిసి నటించిన చిత్రంతో కన్నడ పరిశ్రమలోకి ప్రవేశించారు. ఈ చిత్రం కూడా పెద్ద విజయం సాధించింది. సితార తన కెరీర్లో ప్రతి కొత్త భాషలోకి అడుగుపెట్టినప్పుడు ఉత్తమ నిర్మాణ సంస్థలు, ఉత్తమ దర్శకులు, ప్రాధాన్యత ఉన్న పాత్రలు లభించడం తన అదృష్టంగా భావించారు. ఆమె నటించిన చిత్రాలు విజయవంతం కావడం ఆమె కెరీర్కు మరింత బలాన్ని చేకూర్చింది.
అప్పట్లో ముగ్గురు చిరంజీవుల సీన్లు ఎలా తీశారో తెలుసా..?