JC Prabhakar Reddy: ఆంధ్రప్రదేశ్‌లో స్థానిక సంస్థల ఎన్నికలకు సమయం దగ్గర పడుతోంది.. తాడిపత్రి మున్సిపల్ ఎన్నికల నేపథ్యంలో మాజీ మున్సిపల్ చైర్మన్, టీడీపీ నేత జేసీ ప్రభాకర్ రెడ్డి సంచలన వ్యాఖ్యలు చేశారు. రానున్న మున్సిపల్ ఎన్నికల్లో కేతిరెడ్డి పెద్దారెడ్డి కుటుంబం తప్పనిసరిగా పోటీ చేయాలని సవాల్ విసిరారు. ఆ కుటుంబం ఎన్నికల బరిలోకి దిగకపోతే రాజకీయంగా సమాధి అయినట్లేనని వ్యాఖ్యానించారు. కేతిరెడ్డి పెద్దారెడ్డి కుటుంబం తమ కుటుంబానికి ప్రత్యర్థిగా ఎన్నికల్లో పోటీ చేయాలని స్పష్టం చేశారు.
ప్రస్తుతం తాడిపత్రి మున్సిపల్ ఎన్నికల్లో ఏ సామాజిక వర్గానికి రిజర్వేషన్ వస్తుందో తెలియదని జేసీ ప్రభాకర్ రెడ్డి అన్నారు. మున్సిపల్ చైర్మన్ స్థానం ఓసీకి కేటాయిస్తే తమ కుటుంబం నుంచి ఎవరో ఒకరు పోటీ చేస్తారని వెల్లడించారు. ఈ ఎన్నికలు తనకు, కేతిరెడ్డి పెద్దారెడ్డికి మధ్య జరిగే పోరాటమని పేర్కొన్నారు. తాడిపత్రిలో వైసీపీ, టీడీపీ పార్టీల మధ్య పోటీ కంటే జేసీ కుటుంబం, కేతిరెడ్డి పెద్దారెడ్డి కుటుంబాల మధ్య ఉన్న రాజకీయ వైరం ప్రధానమని ఆయన వ్యాఖ్యానించారు. ప్రజలు ఈ విషయాలను గమనించాలని, ఎవరు అభివృద్ధి చేస్తారో పరిశీలించి వారికే ఓటు వేయాలని విజ్ఞప్తి చేశారు.
వైసీపీ నాయకులు రమేష్ రెడ్డి, ఫయాజ్ భాష మున్సిపల్ ఎన్నికల్లో పోటీ చేయరాదని జేసీ ప్రభాకర్ రెడ్డి హెచ్చరించారు. వారు పోటీ చేస్తే తీవ్ర పరిణామాలు ఎదుర్కోవాల్సి వస్తుందని వ్యాఖ్యానించారు. ఇదే సమయంలో అధికారుల వ్యవహారంపైనా ఆయన స్పందించారు. కేతిరెడ్డి పెద్దారెడ్డికి నచ్చని అధికారులు, పోలీసుల జాబితా ఇస్తే వారిని సెలవుపై వెళ్లేలా చేస్తానని వ్యాఖ్యానించారు. జేసీ ప్రభాకర్ రెడ్డి చేసిన ఈ వ్యాఖ్యలు తాడిపత్రి రాజకీయాల్లో చర్చనీయాంశంగా మారాయి.