ఈ కచేరీ నిర్వహించడానికి ప్రధాన కారణం ఎలుగుబంట్లపై జరుగుతున్న క్రూరత్వాన్ని ప్రపంచానికి తెలియజేయడమే. కొన్ని ఆసియా దేశాల్లో సంప్రదాయ చైనీస్ వైద్యం కోసం ఎలుగుబంట్ల పిత్తాన్ని (Bear Bile) సేకరిస్తున్నారు. ఇందుకోసం వాటి శరీరంలోకి సూదులు ఇతర పరికరాలను జొప్పిస్తారు. ఆ సమయంలో ఎలుగుబంట్లు తీవ్ర నొప్పిని, బాధను అనుభవిస్తాయి. పిత్తాన్ని సేకరించేందుకు వాటిని చిన్నచిన్న బోనుల్లో బంధిస్తారు. కదలడానికి కూడా తగినంత స్థలం ఉండదు. కొన్ని ఎలుగుబంట్లు పదేళ్లు, ఇరవై ఏళ్ల పాటు ఇలాంటి బోనుల్లోనే బతికాయని వేక్‌మన్ తెలిపారు. ఈ వ్యాపారం వల్ల ఆసియాటిక్ బ్లాక్ బేర్స్‌గా పిలిచే మూన్ బేర్స్ సంఖ్య గణనీయంగా తగ్గుతోంది. ఎలుగుబంట్ల పిత్తాన్ని సేకరించే పద్ధతిపై నిషేధం ఉన్నప్పటికీ, వియత్నాంలోని కొన్ని బైల్ ఫారాల్లో ఇంకా అనేక ఎలుగుబంట్లు బందీలుగా ఉన్నాయి. యానిమల్స్ ఆసియా సంరక్షణా కేంద్రంలో 150 ఎలుగుబంట్లు ఆశ్రయం పొందుతున్నాయి.
ఎలుగుబంట్ల కోసం పియానో కచేరీ
సంగీత బృందం ‘యెస్’ మాజీ సభ్యుడైన రిక్ వేక్‌మన్.. సోలో సంగీతకారుడిగా మంచి గుర్తింపు తెచ్చుకున్నారు. ఆయనకు జంతువులంటే ఎంతో ప్రేమ. వియత్నాంలోని టామ్ దావో నేషనల్ పార్క్‌లో ఉన్న యానిమల్స్ ఆసియా సంరక్షణ కేంద్రంలో రక్షించి తీసుకొచ్చిన 150కి పైగా మూన్ బేర్స్ కోసం యమహా గ్రాండ్ పియానోపై సంగీతం వినిపించారు. ఎలుగుబంట్ల గురించి స్వయంగా రూపొందించిన కొత్త సంగీత రచనలను ప్రదర్శించారు. ‘డాన్’, ‘మూన్’ అనే రక్షించిన ఎలుగుబంట్ల పేర్లతో రెండు సంగీత రచనలు చేశారు. కొన్ని ఎలుగుబంట్లు సంగీతం వినడం కోసం అక్కడికి చేరుకోవడం అందరినీ ఆకట్టుకుంది.
సంగీతానికి ఎలా స్పందించాయి?
ఎలుగుబంట్ల కోసం తాను మధురమైన సంగీతాన్నే ఎంచుకున్నట్లు రిక్ తెలిపారు. ఇంగ్లండ్‌లోని సఫోక్‌లో నివసించే రిక్ కు రక్షించిన కుక్కలు, పిల్లులు ఉన్నాయి. వాటికి కూడా సంగీతం వినిపిస్తుంటాననీ, తన కుక్కలకు నచ్చని సంగీతం వినిపిస్తే అవి అక్కడి నుంచి వెళ్లిపోతాయని, పిల్లులకు మాత్రం మెలోడీతో కూడిన సంగీతం ఇష్టమని అన్నారు. తన పిల్లుల్లో ఒకటి గతంలో గ్రాండ్ పియానోపైకి ఎక్కి, తాను మళ్లీ సంగీతం వాయించే వరకు దాని తీగలను కదిలిస్తూ ఉండేదని గుర్తుచేసుకున్నారు.
20 నెలల ఎలుగుబంటి చూపు.. వేక్‌మన్‌కు ప్రత్యేక అనుభూతి
ఎలుగుబంట్ల సంరక్షణకు రిక్ వేక్‌మన్ తన వంతు సహకారం అందిస్తున్నారు. ఇటీవలే 20 నెలల వయసున్న ఓ మగ ఎలుగుబంటిని దత్తత తీసుకున్నారు. ఆ ఎలుగుబంటిని సందర్శించినప్పుడు వెనుక కాళ్లపై నిలబడి తనవైపు తదేకంగా చూసిందనీ ఆ క్షణం తనకు ఎంతో ఆనందాన్ని ఇచ్చిందని తెలిపారు. సంరక్షణ కేంద్రంలోని ఎలుగుబంట్లు సంతోషంగా జీవిస్తున్నాయనీ, రెండు ఎలుగుబంట్లు స్నానపు తొట్టెలో ఆడుకోవడాన్ని చూశానని చెప్పారు.
సంగీతంలో వినిపిస్తున్న ఎలుగుబంట్లపై ప్రేమ
సంగీతం ద్వారా జంతువుల బాధను ప్రజలకు తెలియజేయడానికి రిక్ వేక్‌మన్ చేస్తున్న ప్రయత్నం ఎంతో విలువైందని యానిమల్స్ ఆసియా వ్యవస్థాపకురాలు, సీఈఓ డాక్టర్ జిల్ రాబిన్సన్ అన్నారు. ఎలుగుబంట్లను బోనుల నుంచి విడిపించేందుకు వియత్నాం ప్రధానిని కోరుతూ యానిమల్స్ ఆసియా ఓ పిటిషన్‌ను కూడా ప్రారంభించింది. ఈ పిటిషన్‌పై సంతకం చేయడం, దాని గురించి ఇతరులకు తెలియజేయడం, జంతు సంరక్షణ సంస్థలకు మద్దతు ఇవ్వడం ద్వారా ఈ ఉద్యమానికి ప్రజలు సహకారం అందిస్తున్నట్లు ఆమె చెప్పారు.
150కి పైగా రక్షించిన ఎలుగుబంట్ల కోసం రిక్ వేక్‌మన్ వినిపించిన పియానో సంగీతం ఓ ప్రత్యేక కచేరీగా నిలిచిపోయింది. కానీ ఆయన అసలు లక్ష్యం ఇంకా నెరవేరలేదు. మరో 125 ఎలుగుబంట్లు బోనుల్లోనే మగ్గుతున్నాయి. ఈ ఎలుగుబంట్లకు స్వేచ్ఛ, భద్రత జీవితాన్ని అందించేందుకు ప్రభుత్వం స్పందించాలని రిక్ కోరుతున్నారు.