టాలీవుడ్ నటుడు శ్రీకాంత్ మేక, తన సుదీర్ఘ సినీ ప్రస్థానంలోని అనేక ఆసక్తికర విషయాలను ఓ ఇంటర్వ్యూలో వివరించారు. ఈ ఇంటర్వ్యూలో తన కెరీర్‌లోని మైలురాళ్లను, వ్యక్తిగత జీవిత విశేషాలను పంచుకున్నారు. దర్శకుల గురించి అడగగా, తాను పనిచేసిన దర్శకులలో కృష్ణవంశీతో తనకున్న స్నేహపూర్వక బంధాన్ని గుర్తు చేసుకున్నారు. కే. రాఘవేంద్ర రావు, ఇ.వి.వి. సత్యనారాయణ, ఎస్.వి. కృష్ణారెడ్డి వంటి గొప్ప దర్శకులతో పనిచేయడం కూడా తనకు ఎంతో సంతృప్తినిచ్చిందని తెలిపారు. అయితే, కృష్ణవంశీతో తరచుగా “ఒరేయ్ ఒరేయ్” అని పిలుచుకునేంత సాన్నిహిత్యం ఉందని అన్నారు. తనతో కలిసి నటించిన హీరోయిన్స్‌లో దివంగత నటి సౌందర్య గురించి ప్రత్యేకంగా ప్రస్తావించారు. సౌందర్యలో అద్భుతమైన ఫైర్, పాత్ర పట్ల అంకితభావం ఉండేవని శ్రీకాంత్ పేర్కొన్నారు. “తారక రాముడు” వంటి చిత్రాల్లో ఆమెతో కలిసి నటించినప్పుడు, తన నటనకు దీటుగా సౌందర్య చేసే ప్రదర్శన తనను ఆకట్టుకుందని, ఇద్దరూ ఒకరినొకరు గమనించుకుంటూ నటించేవారని వివరించారు.
తన కెరీర్‌లో అత్యంత సంతృప్తినిచ్చిన చిత్రాలుగా పెళ్లి సందడి , ఖడ్గంలను పేర్కొన్నారు. ఈ రెండు సినిమాలు వేర్వేరు జానర్‌లకు చెందినవని, తన నటనా జీవితంలో రెండు వేర్వేరు దశలను సూచిస్తాయని తెలిపారు. తాను పోషించిన పాత్రలలో కొడుకు పాత్రకు నూటికి నూరు శాతం న్యాయం చేశానని శ్రీకాంత్ భావిస్తారు. వందకు పైగా చిత్రాలు చేసిన తర్వాత కూడా తనకు బోర్ కొట్టలేదని, అందుకు కారణం ఎప్పటికప్పుడు కొత్తదనం ఉన్న పాత్రలను ఎంచుకోవడమే అని శ్రీకాంత్ వివరించారు. ఒకే మూసలో నటించడం వల్ల ఒక దశలో రొటీన్‌గా అనిపించిందని, అయితే ఖడ్గం లాంటి చిత్రాలు, ఆ తర్వాత శ్రీ రామరాజ్యం వంటి భిన్నమైన పాత్రలు తనలో ఉత్సాహాన్ని నింపాయని అన్నారు. ఈ రోజుల్లో ఆడియన్స్ సినిమాను ఎలా రిసీవ్ చేసుకుంటారో అంచనా వేయడం కష్టమని, బడ్జెట్ పరిమితులు పాటించకపోవడం వల్ల కొన్ని మంచి సినిమాలు కూడా ఆర్థికంగా దెబ్బతింటున్నాయని మహాత్మా చిత్రాన్ని ఉదాహరణగా చూపారు.
తన ప్రేమ వివాహం గురించి మాట్లాడుతూ, భార్య ఊహతో తన బంధానికి “అండర్‌స్టాండింగ్” , “నమ్మకం” ప్రధానమని చెప్పారు. అందం లేదా డబ్బు చూసి కాకుండా, ఊహ సాఫ్ట్ నేచర్, మెంటాలిటీ తనకు నచ్చాయని, ఇద్దరూ నాలుగు చిత్రాలలో కలిసి పనిచేయడం వల్ల ఒకరినొకరు అర్థం చేసుకున్నామని అన్నారు. ఇంట్లో వంటగదిలోకి వెళ్లడం తనకి ఇష్టం లేదని, కానీ స్నేహితులతో కలిసి తన స్వస్థలమైన కర్ణాటకలోని గంగావతిలో సరదాగా వంటలు చేస్తానని పంచుకున్నారు. ఒకసారి చికెన్‌లో వైన్ బదులు రమ్ కలిపి చేసిన ప్రయోగం విఫలమైన ఫన్నీ సంఘటనను వివరించారు, అది మొత్తం ఇంటికి వేరే వాసన తెచ్చిపెట్టిందని నవ్వుతూ చెప్పారు.
ఎక్కువమంది చదివినవి : Krishna Vamsi: ఆ సినిమా కోసం ఎన్టీఆర్ ప్రాణం పెట్టాడు.. కానీ నాకు ఆ మూవీ నాకు నచ్చలేదు.. కృష్ణవంశీ..
శ్రీకాంత్, సౌందర్య సినిమా..
Tarakaramudu
ఎక్కువమంది చదివినవి : Babu Mohan: ఆ పాట చూసి చిరంజీవి చెప్పిన మాటలు ఎప్పటికీ మర్చిపోలేను.. బాబూ మోహన్..