Vijay Deverakonda: “అసలు మన దేశం మొత్తం తెల్లోళ్ల చేతుల్లోకి వెళ్ళిపోయినప్పుడు.. ‘ఏం పనిరా మీ తెల్లొళ్లకి ఈడ? మేము కూడా వస్తున్నామా మీ ఊర్లోకి.. మెడ నుండి మొల్లకు నిలువునా నరుకుతాం కొడకల్లారా’ అని ప్రతి ఒక్కడూ గర్జించి ఉంటే, అప్పుడే వాళ్లను తన్ని తరిమేసేవాళ్లం!” అంటూ రౌడీ స్టార్ విజయ్ దేవరకొండ విసిరిన పవర్ ఫుల్ డైలాగ్ ఇప్పుడు ఇంటర్నెట్‌ను షేక్ చేస్తోంది. డైరెక్టర్ రాహుల్ సాంకృత్యన్ తెరకెక్కిస్తున్న ప్రతిష్టాత్మక పీరియాడిక్ వార్ డ్రామా ‘రణబాలి’ ట్రైలర్ లాంచ్ వేడుకలో విజయ్ పలికిన సీమ యాస మాటలు యావత్ సినీ వర్గాలను ఉర్రూతలూగిస్తున్నాయి. ట్రైలర్ రిలీజ్ అనంతరం వేదికపై మాట్లాడిన విజయ్ దేవరకొండ.. బ్రిటీష్ పాలకుల అణచివేతపై మాట్లాడుతూ తెల్లదొరల ఆగడాలపై ఆ కాలంలో మనవాళ్లు చూపించిన తెగువను గుర్తుచేస్తూ ఊగిపోయారు. ఆ వెంటనే సినిమాలో తను చెప్పిన అత్యంత పవర్‌ఫుల్ డైలాగ్‌ను గుర్తుచేస్తూ “సింగనమల బొబ్బిలి రణబాలిరా నీ అక్క!” అంటూ మైక్‌లో గర్జించడంతో ఆ ప్రాంగణం మొత్తం ఈలలు, అరుపులతో మార్మోగిపోయింది. బ్రిటీషర్ల గుండెల్లో నిద్రపోయే ఒక విప్లవ వీరుడిగా విజయ్ నటన ఈ సినిమాలో నెక్స్ట్ లెవెల్‌లో ఉండబోతోందని ఈ ఒక్క సీన్‌తో తేలిపోయింది.
మన చరిత్ర పుస్తకాల్లో కొందరి పేర్లను మాత్రమే లిఖించి, నిజమైన యోధులను ఎలా విస్మరించారో విజయ్ ఈ సందర్భంగా గుర్తుచేశారు. “మనకు ఏ చరిత్ర తెలియకుండా దాచేశారో.. బుర్రకథలు, జానపదాల్లో మాత్రమే మిగిలిపోయిన మన విప్లవ వీరుల పేర్లను ప్రపంచానికి చాటిచెప్పే ప్రయత్నమే ఈ ‘రణబాలి’. ఆనాటి తీవ్ర కరవు నేపథ్యం, సింగనమల గడ్డ పోరాటం, మన పూర్వీకుల రక్తం మనలో ఎలా ప్రవహిస్తోందో చూపించే అద్భుతమైన కథ ఇది. తెలుగు సినీ చరిత్రలోనే అత్యుత్తమ స్క్రిప్ట్‌లలో ఒకటిగా ఇది నిలుస్తుంది” అని స్పష్టం చేశారు. ఈ వేడుకకు హీరోయిన్ రష్మిక మందన్న (జయమ్మ) షూటింగ్ వల్ల రాలేకపోవడంతో, విజయ్ స్వయంగా స్టేజ్ పైనుంచే ఆమెకు కాల్ చేసి ఆకట్టుకున్నారు. నా కెరీర్‌తో పాటు రష్మిక ఫిల్మోగ్రఫీలో కూడా ఇది చిరస్థాయిగా నిలిచిపోయే సినిమా అని ధీమా వ్యక్తం చేశారు. రాయలసీమ యాసలో బ్రిటీషర్ల వెన్నులో వణుకు పుట్టించిన సింగనమల బొబ్బిలి ‘రణబాలి’గా విజయ్ దేవరకొండ రాబోయే దసరా కానుకగా అక్టోబర్ 16న థియేటర్లలోకి అడుగుపెడుతున్నారు. ప్రస్తుతం విజయ్ చెప్పిన డైలాగ్ క్లిప్స్ సోషల్ మీడియాలో వైరల్‌గా మారాయి.